Ij Salm

112. Beat coj ch’a l’han tëmma ‘d Nosgnor

Cost Salm sapiensial a fà na lista dij benefissi ch’a ven-o da na vita conform a la volontà ‘d Nosgnor. Second lë stile dla poesìa ebràica a séguita ‘l model ëd na frase për minca litra dl’abecé ebràich.

¹Aleluja^[1]! [Àlef] A son beat coj ch’a l’han tëmma ‘d Nosgnor^[2] [Bet] e ch’a l’han piasì dij sò comandament! ²[Ghimel] Soa dissendensa ‘d lor a l’avrà na bon-a riussìa an tut lòn ch’a fà^[3]. [Dalet] na generassion antrega ‘d gent ëd pietà^[4] a sarà benedìa. ³[He] A soa ca a l’avran ëd richëssa e d’abondansa. [Vau] Soa bontà a dura për sèmper. [Zain] ⁴Për la gent ëd pietà la lus a splendriss ant lë scur. [Het] A son ëd gent compassionèivola, benigna e giusta. [Tet] ⁵A-i ven dël bin a coj ch’ amprësto ‘d sòld ëd manera generosa e [Iod] a fan ij sò afé con onestà. [Caf] ⁶Ëd gent tanme cola-lì a sarà mai crasà dal mal. [Làmed] e për tant temp as arcordrà ‘d lor. [Mem] ⁷A l’han nen tëmma ‘d cative neuve. [Nun] A l’han fiùsa che Nosgnor a-j giutrà sèmper. [Sàmech] ⁸A l’é ‘d gent fiososa e sensa tëmma e [Ain] a peudo dësfidé ij sò nemis sicur ëd trionfene. [Pe] ⁹A compartisso lòn ch’a l’han e a son generos con coj ch’a son ant lë bzògn. [Sade] Soe bon-e euvre a saran arcordà për sèmper. [Cof] A peudo aussé la testa pien ëd glòria. [Res] ¹⁰Ij gram ch’a vëddo tut sossì a na saran infurià. [Sin] Con rabia lor a argrignëran ij dent. [Tau] j’ambission dij gram a finiss an gnente.

Nòte

1. O “laudé Nosgnor!”.

2. O “timor dë Dio”.

3. O “a sarà grand ant ël pais”.

4. O “ëd giust”.