2 Cronache 5

2Cronache 5

5:1Parèj che lòn che Salomon a l'avìa dësponù për ël templ, a l'é stàit portà a la fin. Antlora Salomon a l'ha fàit porté j'utiss sacrà da David sò pare e a l'ha deposità òr, argent e tùit ij furniment ant ël tesòr dël templ.

TRAMUD ËD L'ERCA

5:2 Salomon a l'ha convocà a ciambreja an Gerusalem j'ansian d'Israel e tùit ij captribù, ij prinsi dle casà israelita, për tramudé l'erca dl'aleansa dël Signor da la sità 'd David, visadì Sion. 5:3 A son assemblasse tacà 'l rè tùit j'Israelita për la festa che a rivava ant ël sétim mèis. 5:4 Quand che tùit ij notàbij d'Israel a l'ero rivà, ij Levita a l'han aussà l'erca. 5:5 A l'han tramuvà l'erca e la tenda dla radunansa e tùit j'asi sacrà che a l'ero ant ël tabernàcol; a son ëstàit ij prèive e ij Levita a porteje. 5:6 Rè Salomon e tuta la comunità d'Israel, convnùa dacant ëd chiel, a sacrificàvo dëdnans a l'erca 'd feje e'd beu, tant da pa podèisse conté nì calcolé për ël nùmer gròss. 5:7 Ij prèive a l'han fàit intré l'erca dl'aleansa 'd Nosgnor a sò pòst ant la stansia dël templ, ant ël Sant dij sant, sota j'ale dij cherubin. 5:8 An efet ij cherubin a slargavo j'ale dzora dl'erca; lor a curvìo l'erca e soe bare da dzora. 5:9 Le stanghe a l'ero pì longhe, e për lòn sò ponton as prolongàvo dë dlà dl'erca anvers la stansia, ma da fòra as vedìo pa; parèj coma che a l'é ancora al di d'ancheuj. 5:10 Ant l'erca a-i j'era nen d'autr che le doe tàule, che Mosé a l'avìa butaie an sl'Oreb, le tàule dl'aleansa conclodùa da Nosgnor con j'Israelita ant ël moment che a l'ero surtì da l'Egit.

5:11 Ore a l'é ancapità che, surtì ij sacerdòt dal Sant (an efet tùit ij preive che a l'ero present a l'ero santificasse sensa deje da ment a le classi) 5:12 antramentre che tùit ij Levita cantor, visadì Asaf, Eman, Idutun e sò fieuj e frej, vestì 'd damasch, con cìmbaj, arpe e setre as në stasìo an pé a levant dl'autar e ant ël mentre dacant a lor sentevint sacerdòt a sonavo le trombe, 5:13 a l'é vnùit che, quand ij musicant e ij cantor a l'han fàit sente tanme un son sol, la vos për laudé e selebré Nosgnor e'l son ëd le trombe, dij cìmbaj e dj'àutri strument aussandse a laudé 'l Signor përchè '' bon, përchè soa grassia a dura për sempe:'' antlora 'l templ a l'é ampinisse 'd na nìvola, ëd la glòria 'd Nosgnor. 5:14 Ij sacerdòt a-i la fasìo pa a resteie për sò servissi për motiv ëd la nìvola, përchè la glòria dël Signor a l'avìa ampinì 'l templ ëd Dé.