Lamentassion 5

Plente 5

5:1 Ten a ment, Nosgnor, lòn che a l'é ancapitane, varda e consìdera nòst obròbi. 5:2 Nòstra ardità a l'é passà a 'd forësté, nòstre ca a dë strangé. 5:3 I soma vnùit a esse òrfo e sensa pare, nòstre mare a son parèj ëd vìdoe. 5:4 I beivoma nòstra eva për dël dne, nòst bòsch as cata a pagament.

5:5 Con un giov an sël còl i soma përseguità, soma svers, a-i é pa pì d'arpòs për nojàutri. 5:6 i l'oma sporzuje la man a l'Egit, e a l'Assiria, për gavesse la fam ëd pan. 5:7 ij nòstri pare a l'han pecà e a-i son pì nen, noi i portoma la pen-a 'd soa përversità. 5:8 Dë s-ciav a comando dzora 'd nojàutri, a-i é pa col che an lìbera da soe man.

5:9 Is procuroma 'l pan a l'arzigh ëd nòstra vita, dëdnans ëd la spa ant ël desert. 5:10 Nòstra pél a l'é fasse afoà coma na fornasa për motiv ëd j'ardor ëd la fam. 5:11 A l'han ëdzonorà le fomne an Sion, le vèrgin ant le sità 'd Giuda. 5:12 Ij cap a son ëstàit pendù da soe man, ij visagi dij vej a son ëstàit rëspetà.

5:13 ij giovo a l'han virà la mòla; ij fieuj a son tombà sota 'l pèis dël bòsch.* 5:14 J'ansian a l'han disertà la pòrta, ij giovo sò strument a còrda.* 5:15 la gòj a l'é dëstissasse ant ij nòstri cheur, la dansa a l'è vnùita a esse deul.

5:16 A l'è tombà la coron-a 'd nòstra testa; guai a nojàutri, përchè i l'oma pecà! 5:17 Për sòn a l'é vnùit a esse magonà nòst cheur, për sòn ij nòstri euj a son anebiasse: 5:18 përchè la montagna 'd Sion a l'é desolà; le volp a-i van da si e da là.

5:19 Ma ti, Nosgnor, resta për sèmper, tò tròno 'd generassion an generassion. 5:20 Për che motiv veus-to dësmentiene për sèmper? 5:21 Fane torné a ti Nosgnor, e noi i torneroma; fà torna neuv ij nòstri di com ant ij temp d'antan, 5:22 përchè it l'has pa arfudane për sèmper, nì sensa lìmit it ses piatla contra 'd nojàutri.

5:13 ij giovo a l'han masentà 'l gran; ij fiolin a son tombà antramentre a portavo 'l bòsch. 5:14 J'ansian a son andàit via da la pòrta( dova l'ero setà), ij giovo a l'han chità 'd soné.