Salm 52

Salm[modifiché la sorgiss]

52. Përché ch’it vantes ëd fé ‘l mal, ò guerié vajant?

Ël Salmista, ch’a l’ha fiusa an Nosgnor, as confronta con ij sò nemis e a fortiss che Nosgnor a-j mandrà an ruin-a ij malfasent e ch’a vendicrà ij giust.

¹Për ël magìster dël còro: un salm ëd David riguard al temp che Doeg, l’Idumé, a l’ha dije a Saul: “David a l’é andait a trové Achimelech”. Përché ch’it vantes ëd fé ‘l mal, ò guerié vajant? Rendes-to nen cont che la giustissia ‘d Nosgnor a vnirà mai a mai a manché? ²Për tut ël dì ti’t complòte d’antrigh. Toa lenga a taja tanme ‘n rasor afilà; ti’t ses pròpi bon a conté ‘d busiardarìe. ³At pias pròpi tant ëd fé lòn ch’a l’é mal e nen lòn ch’a l’é bin, e ti’t dises ëd busiardarìe da pì che ‘d vrità. [Pàusa]

⁴Ti’t preferisse ‘d paròle ‘d distrussion, busiard ch’it ses mach! ⁵Nosgnor, contut, a të sbatrà giù për sèmper. At tirerà fòra da ca e at dësreisrà da la tèra dij viv. [Pàusa].

⁶Ij giust a lo vëdran e a na saran pià ‘d surprèisa. As butran a ghigné e a diran: ⁷“Vardé mach lòn ch’a càpita ai guerié vajant ch’a l’han gnun-a fiusa an Nosgnor! Lor as fido ‘d soe richesse ‘d lor e a chërso sèmper ëd pì an gramissia”. ⁸Ma mi i son tanme n’uliv ch’a chërs fosonant ant la ca ‘d Nosgnor. I l’avrai sèmper fiusa ant l’amor ëd Nosgnor ch’a vnirà mai a manch. 54:9 It laudrai për sèmper, Nosgnor, për lòn ch’it l’has fàit. I l’avrai fiusa an tò bon nòm a la presensa ‘d tò pòpol fedel.