Levìtich

1

J’olocàust

¹Nosgnor a l’ha ciamà Mosè da la Tenda dla Radunansa. A l’ha dije: ²“Comanda sossì a j’Israelita: ‘Quand quaidun ëd vojàutri a presenta al Signor n’oferta, s’a l’é ‘d bestie, i l’eve da smon-e dai vòstri strop un cap ëd bestiam gross o ‘d bestiam cit^[1].

³Se l’oferta a l’é n’olocàust ëd bestie bovin-e, ciapé ‘n mas-cc ch’a l’abia gnun difet e mnelo a l’intrada dla Tenda dla Radunansa parèj ch’a sia acetà da Nosgnor. ⁴Pogé la man dzura la testa dla vitima, e antlora a sarà acetà coma n’oferta d’espiassion. ⁵Peuj i sgorgereve la bestia a la presensa ‘d Nosgnor, e ij sacerdòt - ij dissendent d’Aron, a na smonran ël sangh e a lo spantieran tut dantorn dl’autar ch’a l’é a l’intrada dla Tenda dla Radunansa. ⁶Col ch’a pòrta la vitima a dovrà peuj gaveje la pel e a la farà a tòch, ⁷e ij dissendent d’Aron, ël sacerdòt, a vischeran ël feu an sl’autar e a-i rangeran dzora ‘d bòsch. ⁸Antlora, ij fieuj d’Aron, ij sacerdòt, a na pogeran ij tòch, la testa e la grassa, dzura dël bòsch dël feu an sl’autar. ⁹Apress, l’ofertor a laverà con d’eva le ventraje e le piòte dla vitima, e un dij sacerdòt a bruserà ‘l tut an sl’autar. Lolì a l’é n’olocàust, n’oferta consumà tuta dal feu, n’oferta d’odor agreàbil për Nosgnor.

¹⁰Se l’oferta a l’é un olocàust ëd bestiam cit, babero o cravòt ch’a sia, col ch’a la presenta a ciaperà un mas-cc sensa difet. ¹¹A lo sgorsrà dapara dl’autar, vers tramontan-a, a la presensa ‘d Nosgnor, e antlora ij sacerdòt, ij dissendent d’Aron, a na spantieran ël sangh dzura ij quatr canton dl’autar. ¹²Col ch’a pòrta la vitima, a la tajerà a tòch e na separerà la testa e la grassa, e un dij sacerdot a la pogerà dzura ‘l bòsch dël feu dl’autar. ¹³Apress, l’ofertor a na laverà con d’eva ij buej e le piòte dla vitima, e ‘l sacerdòt a lo smonrà tut a Nosgnor e a lo bruserà an sl’autar. Lolì a l’é n’olocàust, n’oferta consumà tuta dal feu, n’oferta d’odor agreàbil për Nosgnor.

¹⁴Se l’oferta ch’as presenta an olocàust a Nosgnor a l’é n’osel, ch’a së smon-a na tórtora o ‘n colombòt. ¹⁵Ël sacerdòt a porterà la vìtima a l’autar, a-j dëstracrà la testa e a la bruserà an sl’autar, e a na farà core ‘l sangh pr’ ij fianch dl’autar. ¹⁶Apress, a-j gavrà ‘l gosé e le piume, e a-j camprà aranda dl’autar anvers Orient andova ch’a-i saran lë sënner. ¹⁷Peui a lo s-ciaprà an doi për j’ale sensa dividlo dël tut, e ‘l sacerdòt a farà brusé la vìtima dzura ‘l bòsch dël feu dl’autar. A l’é n’olocàust, n’oferta consumà tuta dal feu, n’oferta d’odor agreàbil për Nosgnor’.

Nòte

1. Feje o crave.