Salm 126

126

An arciamand a la ment ij temp ëd liberassion dël passà, ël pòpol ëd Nosgnor, comunità gropà ansema da 'n Pat, ciama a Dé ch'a-j fasa fé 'd neuve esperiense dël Sò podèj e a pensa: che bel quand nostra tristëssa a sarà cambià an gòj.

126:1 Cant an montand. An smijava nen vera¹ 'd vëdde j'esilià arportà dal Signor a Sìon². 126:2 I j'ero pien d'alegrìa e i cantavo 'd gòj. J'àutre nassion a disìo: "Che grande còse ch'a l'ha fàit për lor ël Signor!". 126:3 Sensa dubi 'l Signor a l'ha fàit còse maravijose për noi. I j'ero beà³! 126:4 Ò Signor, fane torna vëdde la prosperità 'd Sìon parèj dl'eva dij torent ch'a torna dé vita al desert. 126:5 Coj ch'a pioro për la fatiga ch'a fan për travajé⁴ la tèra, al mësson a crijeran ëd gòj. 126:6 Coj ch'a pioro an portand ël sach dla smens pr' ansëmné, a l'é sicur ch'a canteran ëd goj quand ch'a 'torneran an portand le gerbe dël forment.

Nòte

1 O "An parëssìa 'd sugné", "i j'ero coma coj ch'a fan un seugn".

2 O "che 'l Signor a l'avèissa antlora ristabilì 'l benesse 'd Sion".

3 O "Che gòj!".

4 O "sëmné".

https://lumina.bible.org/bible/Psalms+126

http://saintebible.com/psalms/126-1.htm

À à È è É é Ì ì Ò ò Ó ó Ù ù Ë ë