Geremìa 33

33

Nosgnor a fa la sconda vòta la promëssa ‘d ristabilì Israel e Giuda

33:1 Mentre che Geremia a l’era ancora confinà ant la cort ëd le guardie, Nosgnor a l’ha torna comunicaje soa paròla. 33:2 A l’ha dije: “Sossì a dis ël Signor, col ch’a l’ha fàit ël mond, ch’a l’ha formalo e l’ha rendulo frem e ch’a l’ha për nòm ‘ël Signor’. 33:3 Ciamame e mi it rëspondrai e t’arvelerai ëd grand segret che ti ‘t conosse nen ëd lòn ch’a l’ha da rivé. 33:4 Sossì a dis ël Signor, ël Dé d’Israel: I l’eve dësblà le ca dë sta sità e fin-a ‘l palass real për trové ‘d materiaj për rinforsé le muraje contra le rampe d’assedi e lë spa dël nemis. 33:5 I chërde ‘d podèj combate contra ij babilonèis¹, ma parèj i ampinireve mach cole ca dij cadàver ëd coj che mi i farai meuire con l’ardor ëd mia zara, përchè i l’hai bandonaje për motiv ëd soa gramissia.

33:6 Malgré sòn, a vnirà ‘l temp che mi i varirai le ferije ‘d Gerusalem e a-j darai a pien-e man la pas e la sicurëssa. 33:7 I arnovrai la vita dël pòpol ëd Giuda e d’Israel e i arcostruvrai soe sità tal coma ch’a j’ero anans. 33:8 I-j purifichrai da tùit ij pecà ch’a l’avìo comëtù contra ‘d mi, a-j përdonrai la colpa d’avèj pecà contra ‘d mi², d’ess-me stàit nen fedej.

33:9 A l’é antlora che costa sità am darà ‘d gòj, glòria e d’onor dëdnans a tute le nassion dla tèra! Ij pòpoj dël mond a vëdran tut ël bin ch’i faso a mè pòpol, e a së sburdiran quand ch’a vëdran la pas e la properità che mi i-j provëdrai.

33:10 Sossì a l’é lòn ch’a dis ël Signor: An ës leugh, dont i dise: ‘A l’é na ruin-a, sensa ‘d gent e ‘d bestie’, a le sità ‘d Giuda e ai leugh ëd Gerusalem che adess a son devastà, e ch’a-i son nì ‘d gent nì ‘d bestie, ancora as tornerà a sente 33:11 ij crij ‘d gòj e ‘d festa, ij cant djë spos e dle spose. As tornerà a sente la vos ëd coj ch’a porteran al templ dël Signor soe oferte ‘d ringrassiament, an cantand: ‘Ringrassié ‘l Signor dl’univers! Përchè ‘l Signor a l’é brav. Sò amor fedel a ven mai a manch!’. Përchè ‘l Signor a dis: ‘I arnovrai la vita dël pais tal coma ch’a l’era anans’.

33:12 Sossi a l’é lòn ch’a dis ël Signor ëd l’univers: ‘An ës leugh, ch’a l’é na ruin-a, sensa ‘d gent e ‘d bestie, e a tute le sità, a-i tornerà a esse ‘d pasture andova ch’ij bërgé a podran mneje ij sò strop. 33:13 A le sità dle colin-e, ai pé ‘d Giuda e dël Neghev, al teritori ‘d Beniamin, a le vzinanse ‘d Gerusalem e a tute le sità ‘d Giuda, a torneran a passé jë strop a la goerna dij bergé ch’a-j conteran. Mi, ël Signor, i l’hai parlà!’.

Nosgnor a arconfërma Sò pat con David, Israel e Levi

33:14 A vnirà ‘l dì, a dis ël Signor, che mi i farai pr’ Israel e për Giuda tute le bon-e còse ch’i l’hai promëtuje. 33:15 An coj dì-lì e an col temp-lì, i farai seurte, da la dessendensa dël rè David, n’arbut ëd giustissia. A sarà chiel ch’a farà lòn ch’a l’é giust e drit për tut ël pais. 33:16 An coj dì-lì Giuda a sarà salvà e Gerusalem a vivrà an sicurëssa, e la sità a sarà ciamà: “Nosgnor a l’é nòstra giustissia³”. 33:17 Sossì a l’é lon ch’a dis ël Signor: “David a l’avrà un sucessor ch’as setrà an sël tròno d’Israel për sèmper. 33:18 E a-i saran sàmper ëd sacerdòt levìtich ch’a më smonran dj’olocàust, d’oferte brusà, d’oferte ‘d gran e ‘d sacrifissi”.

33:19 Peui Nosgnor a l’ha comunicà a Geremìa costa paròla. A l’ha dije: 33:20 “Sossì a l’é lòn ch’a dis ël Signor: ‘Ant ël dì ch’i sareve bon a s-ciapé mè pat con ël dì e la neuit, parèj che un a seguita pa l’àutra, 33:21 mach anlora a sarà s-ciapà mè pat con mè sërvent David. Mach antlora chiel a l’avrà pa pì un dessendent ch’a regna an sò tròno. L’istess a sarà con mè pat con ij sacerdòt levìtich ch’a fan ij sò ufissi dëdnans a mi. 33:22 Coma che lë stèile dël cél as peudo nen contesse e coma che la sabia dla riva dël mar a peul nen esse mzurà, parèj i multiplicrai la dessendensa ‘d mè sërvent David e dij levita ch’ufissio dëdnans a mi”.

33:23 Nosgnor a l’ha comunicà n’àutra paròla a Geremìa. A l’ha dije: 33:24 “Sentes-to nen lòn ch’a dis costa gent? ‘’Nosgnor a l’ha sernù Giuda e Israel e peui a l’ha bandonaje!’. A fan le svergne e peui a diso che Israel a peul nen consideresse na nassion. 33:25 Contut, sossì a l’é lòn ch’a dis ël Signor: “S’a l’é sicur che mi i l’hai fàit un pat con ël dì e la neuit e i l’hai fissà le lej dël cél e dla tèra, 33:26 a l’é ‘dcò sicur ch’i bandonrai mai ij dessendent ëd Giacòb e ‘d David, mè sërvent, o cambié ‘l pian che ij dessendent ëd David a governran ij dessendent d’Abraam, d’Isaac e ‘d Giacòb. A l’opòst, i-j ristabilirai ant sò pais e i l’avrai misericòrdia ‘d lor”.

Nòte

1 O “ij caldé”.

2 O “tùit ij sò pecà d’arvira”.

3 O “salvëssa”.

À à È è É é Ì ì Ò ò Ó ó Ù ù Ë ë