Michea 1

Michea 1

Introdussion

• (1) Paròla 'd Nosgnor ch'a l'é stàita adressà a Michea 'd Moreset, al temp ëd Iotam, d'Acas e d'Esechìa, re 'd Giuda. Soe vision a rësguard ëd Samarìa e Gerusalem.

Ël Giudes a l'é 'n camin ch'a riva

• (2) "Scoté, tuti vojàutri le gent! Tèra, fà atension, con tut lòn che a t'ampiniss! Nosgnor a l'é 'n camin ëd testimonié contra 'd voi, ël Signor, ant ël seurte da Sò palass sacrà!

• (3) Përchè varda-là Nosgnor ch'a seurt da sò leugh sant: Chiel a cala, Chiel a marcia su àut an sla tèra.

• (4) Le montagne a së slinguo sota ai sò pass, le valade a fondo parèj ëd la sira dëdnans al feu, parèj dl'eva spantià an sle pendiss.

• (5) Tut lòn, për ël delit ëd Giacòb, ël pecà dla ca d'Israel. Col che a l'é 'l delit ëd Giacòb? L'é-lo nen Samarìa? Col ch'a l'é 'l pecà dla ca 'd Giuda? A l'é pa Gerusalem?

• (6) Mi i farai 'd Samarìa na ruin-a ant la campagna, na tèra da vigne. I farai rotolé soe pere ant la comba, i dëscoaterai soe fondamenta.

• (7) Tute soe statue a saran fàite a tòch, tute soe paghe brusà dal feu, tuti ij sò ìdoj, mi i-j darai an podèj ëd la solitudin, përchè a son ëstàit ambaronà con ël salari dle bagasse e sòn a sarà torna salari da putan-e.

• (8) Për sòn, i farai 'd plente e i crierai, im n'andrai dëscùuss e patanù, i ucherai com a fan jë siacaj, i gëmmerai coma jë struss.

• (9) Përché a-i é pa cura a le piaghe 'd Nosgnor; a son rivà fin-a a Giuda, a së spantio fin-a a la pòrta 'd mè pòpol, fin-a a Gerusalem.

• (10) A Gat, nunsejlo nen, an Acri pioré pa! Ant la ca d'Afra, ravioleve ant la poer!

• (11) Son-a con ël còrn, popolassion ëd Safir! Patanùa, coatà mach ëd vërggògna, chila a l'é pa surtìa da soa sità, cola ch'a sta an Canaan! Bet Esel a l'é rancà da soe fondassion, dal basament dova ch'a l'é stà!

• (12) La popolassion ëd Maròt a së spetava 'l boneur, nopà 'l maleur ch'a l'é calà da part ëd Nosgnor fin-a a la pòrta 'd Gerusalem.

• (13) Taca ij cavaj al cheur, ti che të staghe a Lachis! Sòn a l'é stàit ël prinsipi dël pecà, për la fija 'd Sìon, perchè a l'é an ti che as treuvo j'infedeltà d'Israel.

• (14) Dcò ti it l'avras da vërsé na dòta për Moreset-Gat. La ca d'Aczib a sarà n'ingan pr' ij re d'Israel.

• (15) Col che a ardita la tèra at rivrà ancora, ti che të staghe an Maresa! Chiel a rivrà fin-a a Adulam, la glòria d'Israel.

• (16) Ranca ij tò cavèj, toson-je, për ij tò fieuj che a fasìo toa gòj! Slarga toa cirià com ël voltor, përchè lor a son esilià lontan da ti!

Majo Galin-a, mars 1987

https://lumina.bible.org/bible/Micah+1

À à È è É é Ì ì Ò ò Ó ó Ù ù Ë ë