Isaia

62

Nosgnor a treuva Soa delissia an Sion

¹Pròpi përch' i veulo bin a Sìon, i starai nen ciuto. Pròpi përch' i sosnisso Gerusalem, i peudo nen steme chet. I chitrai nen ëd preghé për chila fin-a a tant che soa giustissia a splendrà nen tanme 'l sol a l'alba, e soa salvëssa^[1] a brusrà nen tanme 'n flambò foà. ²Le nassion a vëdran toa giustissia. Tùit ij rè dël mond a saran sbalucà da toa glòria. A ti at sarà dàit un nòm neuv da la boca midèma 'd Nosgnor. ³Nosgnor at tnirà 'n man parèj che tùit a't vëddo - na splèndida coron-a ant le man ëd Dé. ⁴Mai pi it saras ciamà "La sità bandonà" o "Tèra 'd desolassion". Tò nòm neuv a sarà: "Sità delissia dël Signor" e "La sposa 'd Dé", përché an ti Nosgnor a trova Soa delissia e at vorà coma Soa sposa.

⁵Ij tò fieuj a faran anvers a ti un giurament ëd fidelità, ò Gerusalem, pròpi tanme 'n giuvnòt ch'as angagia con na giovna. Antlora 'l Signor a s'arlegrerà an ti tanme në spos ch'a s'arlegra 'd soa fomna. ⁶Gerusalem!I l'hai butà 'd guardie an sù tò murajon: lor a vijaran an preghiera neuit e dì. Pijeve gnun arpòs, ò vojàutri ch'i pregheve Nosgnor. ⁷Dè al Signor gnun-a requie fin-a a tant che Chiel a finìss sò travaj, fin-a a tant che Chiel a fasa 'd Gerusalem l'orgheuj dla tèra. ⁸Nosgnor a l'ha giurà a tuta fòrsa^[2]: "Mai pi it consignerai ai tò nemis. Mai pì a vniran dij guerié strangé për portete vìa tò forment e tò vin neuv. ⁹It ses stàit ti a coltivé 'l forment e ti 't lo mangeras ringrassiand-ne Nosgnor. Ant le curt dël Templ i sareve vojàutri a bèive 'l vin ch'i l'eve torcià. ¹⁰Seurte fòra dai porton e preparé la strà parèj che Mè pòpol a peussa 'rtorné. Spiané le strà, gavé le pere d'antrap ch'a-i son, aussé 'n drapò parèj che tute le nassion a lo vëddo. ¹¹Nosgnor a l'ha mandà 's mëssagi a tùit ij pais: "Dì al pòpol d'Israel: Vardé: vòstr Salvator a l'é an camin ch'a riva. Vardé, con chiel a l'ha dcò n'arcompensa".

¹²Lor a saran ciamà: "Ël pòpol sant", "Coj ch' ël Signor a l'ha riscatà". E Gerusalem a sarà ciamà: "Leugh ch'a l'é 'n piasì da steje" e "La sità pì nen bandonà".

Nòte

1. O "liberassion".

2. O "Con Soa man drita e con Sò bras potent".