Daniel

1

Ij privilegi 'd Daniel a Babilònia

¹Ant l'ann che a fà tre dël regn ëd Gioachim, re 'd Giuda, Nabucodonésar, re'd Babilònia, a l'é portasse sota 'd Gerusalem e a l'ha butala sota blòch. ²Nosgnor a l'ha butaje ant le man Gioachim, re'd Giuda, e 'dcò na part dj'utiss dla ca'd Nosgnor. Nabucodonésar a l'ha tramudà costi asi ant ël pais ëd Sinear ant ël templi dij sò dio, depositàndje ant la ca dël tesòr dij sò dio.

³Ël re a l'ha dije a Aspenas, sò cap eunuch, ëd pijé na partìa 'd fiolin ëd rassa nòbil e real: ⁴a dovìo esse sensa difet, ëd bela presensa^[1], vërsà an vàire mire 'd saviëssa, bin anformà e pien ëd sust; adat a serve a la cort dël re. Aspenas a l'avrìa mostraje a lese e a parlé ant la lenga dij Caldé. ⁵Ël re a l'ha fissaje le proviande 'd tùit ij di con ël mangé e'l vin piàit da la tàula dël re. A sarìo stàit educà për ël temp ëd tre ani; dòp, lor a sarìo presentasse dëdnans dël re. ⁶An tra'd lor a j'ero Daniel, Ananìa, Misael e Asarìa, tuti Giudé. ⁷Ël cap ëd j'eunuch a l'ha ‘dcò cambiaje ‘l nòm: Daniel a sarìa ciamasse Baltasar; Ananìa: Sadrach; Misael: Mesach e Asarìa: Abed-Nego (Servent ëd Nego).

⁸Daniel ch'a l'avìa car ël nen antamnesse con ël mangé e 'l beive dla tàula real, a l'ha ciamaje al cap eunuch d'esse vansà da cola apostasìa^[2]. ⁹Nosgnor a l'ha conceduje a Daniel d'arsèive fiusa e grassia dal cap eunuch. ¹⁰Ma l'eunuch a l'ha butà an vardia Daniel. A l’ha dije: “Mi i l'hai tëmma 'd mè signor e rè; chiel a l'ha fissave da mangé e da beive e, s'av trovèissa màire ant ël visage, conforma j'àutri fieuj 'd vòsta età, ansima a mia testa a tomberìa na colpa a j'euj dël re”.

¹¹Antlora Daniel a l'ha dije a la vardia che 'l cap eunuch a l'avìa mandà për Daniel, Ananìa, Misael e Asarìa: ¹²“It na prego, buta ij tò servent a la preuva për des di: ch’a vado a dene mach ëd vërdura da mangé e d'eva da bèive. ¹³Ti it podras confronté nòste face con cole dj'àutri fieuj ch’a mangio da la tàula dël re e it faras conforma lòn che it l'avras vëddù”. ¹⁴L'òm a l'ha dit che 'd sì a lòn che a l'avìo ciamaje e a l'ha butaje a la preuva për des di. ¹⁵Passà ch'a son ëstàit ij des di, lor a stasìo mej e a l'ero pì grass ëd tùit ij fiolin che a l'avìo mangià da la tàula dël re. ¹⁶Da lòn, la vardia a l'ha gavaje 'l mangé e la rassion ëd vin che a dovìo bèive e a l'ha daje mach ëd vërdura, ¹⁷A coj quat giovo Nosgnor a l'ha daje savèj e istrussion an tute le forme 'd lètere e d'amprende. A Daniel a l'é stait dàità l’abilità d'antërpreté tute sòrt ëd vision e 'd seugn.

¹⁸Al termo fissà dal re përchè a fùsso mnà da chiel, ël cap dj'eunuch a l'ha portaje dëdnans a Nabucodonésar. ¹⁹Ël rè a l'ha parlà con lor e an tra ij fieuj gnun a l'é stàit parèj 'd Daniel, Ananìa, Misael e Asarìa. Përparèj lor a son ëvnùit a fé part dël séguit dël re, ²⁰e, ansima a tute le cos-cion ëd prudensa e conossensa ch'a vnisìo anterogà, ël re a-j trovava des vire pì anans che tùit ij mascon e j'andvin ëd sò regn.

²¹Daniel a l'é restà ambelelà fin-a a l'ann I dël re Ciro.

Nòte

1. O “bin piantà”.

2. O “stat d’impurità legal”.