Ij Salm

67. Che Nosgnor a sìa misericordios anvers ëd nojàutri

Ël Salmista a làuda Nosgnor për le benedission ch’a arversa an sù sò pòpol e a cissa le nassion a laudelo përché Chiel a l’é col ch’a governa ‘l mond con giustissia.

¹Pr’ ël magìster dël còro. Con jë strument a còrda. Un salm, càntich. Che Nosgnor a sìa misericordios anvers a nojàutri e an benedissa; ch’an fassa vëdde la lus ëd soa fàcia ch’an sorida. [Pàusa]. ²Ch’ij tò senté a sio conossù për tuta la tèra, e tùit ij pòpoj a vëdran la salvëssa. ³Che tute le nassion at làudo, ò Nosgnor! Pròpe parej! Che tute le nassion at làudo. ⁴Che tut ël mond a canta ‘d gòj, përchè ti ‘t governe le nassion con giustissia e it guide ij pòpoj dla tèra antrega. [Pàusa]. ⁵Che tute le nassion at làudo, ò Nosgnor! Pròpe parèj! Che tute le nassion at làudo! ⁶Antlora la tera a l’avrà dj’arcòlt fosonant e Nosgnor, nòst Dé, a benedirà con abondansa. ⁷Pròpe parèj! Nosgnor an benedirà, e tùit ij pòpoj pr’ ël mond a l’avran timor ëd chiel.