2 Cronache 4

2Cronache 4

4:1 Ël re a l'ha 'dcò fàit construe n'autar ëd bronz, longh e largh vint cùbit e àut des.

4:2 A l'ha fàit ël bassin gròss, o Mar, ëd bronz fondù, che a mzurava des cùbit d'un canton a l'àutr: a l'era n'anel complet e a fongàva sinch cùbit. Na forma 'd coron-a, longa tranta cùbit, a fassava an broa tuta soa sirconferensa. 4:3 Sota l'orlo tut d'antorn, a l'era ansërcià da bestie da la smijansa'd beu, des për cùbit, an doi file e fondù ansema al bassin. 4:4 La vasca as pogiava dzora 'd dódes beu: tre a vardavo anvers tramontan-a, tre a ponent, tre a mesdì e tre vers orient. Ël gran bassin as pogiava ansima e soe part darera a l'ero voltà anvers l'intern. 4:5 A l'era spèss na branca e an brova a l'avìa la midema forma dël bòrd ëd na copa, parèj 'd na fior ëd liri. A podìa conten-e tremila mzure 'd bat.

CANDLÉ, TÀULE E CORT

4:6 A l'ha 'dcò fàit des bassin e a l'ha butane sinch a drita e sinch a gàucia, për lavé lòn ch'a sarìa stàit sacrificà e che ventava purifiché, ma ij prèive as lavavo drinta 'l Mar ëd bronz. 4:7 A son fasse 'dcò, des candlé d'òr, conform la forma prescrivùa, e a l'ha butaje ant la navà dël templ, sinch a drita e sinch a snistra; 4:8 a son ëstàite fàite des tàule che a l'ha butà ant ël templ, sinch a drita e sinch a mancin-a, e sent bassin d'òr.

4:9 A l'é fasse la cort dij prèive, la cort gròssa e le pòrte dla midema cort, ch'a l'ha arvëstì 'd bronz. 4:10 Ël bassin a l'ha butalo da la banda drita, a sud-est.

4:11 Curam a l'ha fàit le caudere, le palëtte e j'aspèrges. Chiel a l'ha finì sò travaj ant ël templ ëd rè Salomon: 4:12 le doe colòne, ij doi balon dij capitej dzora dle colòne, doi grije për cheurvie ansima ai capitej e dzora dle colòne, 4:13 quatzent pomgranà për le doe grije, doi file 'd pomgranà për minca grija e për cheurve ij doi balon dij capitèj dëdzora dle colòne, 4:14 ij des ampeduss e le des àmole an sle basi, 4:15 ël bornel, ùnich, e ij dódes beu che a-i jë stan sota, 4:16 caudere, palëtte, forcheton e tùit j'utiss che Curam-Abi a l'avìa fàit an bronz soasì për ël templ ëd rè Salomon. 4:17 Ël rè a l'ha faje fonde ant la valada dël Giordan, ant la fonderìa, an tra Sucòt e Zereda. 4:18 Tùit sti asi Salomon a l'ha faje fé an gròssa quantità, da nen podèj conté 'l pèis dël bronz.

4:19 Salomon a l'ha fàit tùit oget për ël templ: l'autar d'òr e le tàule, andova che as butavo ij pan da smon-e, 4:20 ij candlé e le làmpie d'òr d'anvischesse, com a l'era stàit prëscrivù, an facia a la cela, 4:21 le fior, làmpie e jë stopalum d'òr, dël pì fin, 4:22 ij cotej, j'aspèrges, le cope e ij brasé d'òr fin. Për lòn ch'a rësguarda le pòrte dël templ, ij batent d'andrinta vers ël Sant dij sant e ij batent ëd la navà dël templ a l'ero d'òr.