Levìtich

9

Presentassion dij prim sacrifissi[

¹Ël dì ch’a fà eut, Mosè a l’ha convocà Aron con ij sò fieuj e j’ansian d’Israel, ²e a l’ha dije a Aron: “Ciapa ‘n veilèt da strop pr’ ël sacrifissi pr’ ël pecà e un moton për l’olocàust, tùit e doi ch’a l’abio gnun difèt, e presentje dëdnans a Nosgnor. ³Dije ‘dcò a j’Israelita: “Pijé un boch giovo pr’ ël sacrifissi pr’ ël pecà, un veilèt e un babero, tùit e e doi d’un ann e sensa difèt, për smonje an olocàust. ¹Pr’ ël sacrifissi ‘d comunion, ciapé un tòr e un moton e presenteje dëdnans a Nosgnor, e lolì con la gionta ‘d n’oferta ‘d farin-a ampapëttà d’euli, përchè d’ancheuj Nosgnor as manifesterà a vojàutri”.

⁵A l’han donca pijàit tut lòn che Mosè a l’avìa comandaje e a l’han portalo dapara dla Tenda dël Rëscontr. Antratant, tuta la comunità a l’é avzinasse e a l’é tenusse dëdnans a Nosgnor. ⁶Antlora Mosè a l’ha dit: “Sossì a l’é lòn che Nosgnor a l’ha comandà ch’i fèisse për ch’as manifesta soa presensa gloriosa”. ⁷E Mosè a l’ha dije a Aron: “Acostete a l’autar e smon-a tò sacrifissi pr’ ël pecà e tò olocàust, e fà ‘l rit d’espiassion pr’ ij tò pecà e pr’ ij sò. Smon-a ‘dcò ‘l sacrifissi dël pòpol e fà ‘l rit d’espiassion a sò favor ëd lor, precis coma ch’a l’ha comandà Nosgnor. ⁸Antlora Aron a l’é acostasse a l’autar e a l’ha scorzà ‘l veilèt ëd sò sacrifissi pr’ ël pecà. ⁹Peui ij sò fieuj a l’han presentaje ‘l sangh e chiel, mojà ‘n dil ant ël sangh, a l’ha onzune ij canton dl’autar. Peui a l’ha vërsà ‘l sangh ai pé dl’autar. ¹⁰Apress, a l’ha fàit brusé an sl’autar la grassa, ij rognon, e ‘l loèt dël fidich dla vìtima smonùa coma ‘n sacrifissi pr’ ël pecà, precis coma Nosgnor a l’avìa comandà a Mosè. ¹¹Ma la carn e la pell dla vìtima a l’ha brusaje fòra dël campament.

¹²Apress, Aron a l’ha sgorzà la vìtima dl’olocàust. Ij sò fieuj a l’han presentà ‘l sangh e chiel a l’ha fàit n’aspersion ëd sangh ai quat canton dl’autar. ¹³A l’han peui sporzuje a Aron, ansema a la testa, le porsion dla vìtima squartairà, e a l’ha fàit brusé tut an sl’autar. ¹⁴A l’ha arzentà le ventraje e le piòte, ch’a l’ha peui faje brusé an sl’autar, dë dzura dij rest dl’olocàust.

¹⁵An séguit, a l’ha smonù l’oferta dël pòpol. A l’ha ciapà ‘l boch dël sacrifissi pr’ ël pecà dël pòpol, a l’ha sgorsalo e a l’ha smonulo dl’istessa manera ch’a l’avìa fàit con la prima oferta. ¹⁶A l’ha ‘dcò smonùe le vìtime dl’olocàust conform al ritual ëstabilì. ¹⁷A l’ha smonù l’olocàust compagnandlo con l’oferta ‘d farin-a: a l’ha ciapane na bon-a brancà e a l’ha fala brusé an sl’autar. A l’ha smonù cost olocàust për gionta dl’oferta ch’as fa minca na matin. ¹⁸Peui a l’ha sgorzà ‘dcò ‘l tòr e ‘l moton che ‘l pòpol a l’avìa presentaje pr’ ël sacrifissi ‘d comunion. Ij sò fieuj a l’han presentaje ‘l sangh e chiel a l’ha fane n’aspersion ai quat canton dl’autar. ¹⁹La grassa dël tòr e dël moton, la coa, e lòn ch’a quata ventraje e rognon, e ‘l loèt dla fricassà, ²⁰a l’han butaje ansema al pét, e Aron a l’ha falo brusé tut an sl’autar. ²¹Ël pét e la cheussa ‘d drita, Aron a l’ha presentaje dëdnans a Nosgnor precis coma Mosè a l’avìa comandà.

²²Quand Aron a l’ha terminà dë smon-e ‘l sacrifissi pr’ ël pecà, l’olocàust e ‘l sacrifissi ‘d comunion, a l’ha aussà soe man anvers al pòpol, a l’ha benedije e a l’é calà da l’autar. ²³Peuj Mosè e Aron a son intrà ant la Tenda dël Rëscontr, e dòp ch’a l’ero surtine, a l’han benedì ‘l pòpol. A l’é antlora che la presensa gloriosa ‘d Nosgno a l’é manifestasse a tut ël pòpol. ²⁴Da ‘n facia ‘d Nosgnor a l’é surtine ‘n feu ch’a l’ha consumà dzura dl’autar ël sacrifissi dl’olocàust e la grassa dj’àutri sacrifissi. Tut ël pòpol, an vëdendlo, a l’han butasse a crijé ‘d gòj e a son prostërnasse con la front a tèra.