Salm 135

135. Laudé Nosgnor! Laudé ‘l nòm ëd Nosgnor

Ël poeta a ansiga ‘l pòpol ëd Nosgnor a laudé ‘l Signor përché Chiel a l’é ‘n De ch’as peul paragonesse a gnun d’àutri. Nosgnor a l’é sovran an sùl mond e a fà ‘d cose maravijose për Israel.

135:1 Laudé Nosgnor! Laudé ‘l nòm ëd Nosgnor! Smon-e ‘d làude, vojàutri servidor ëd Nosgnor 135:2 ch’i steve ant ël templ ëd Nosgnor, ant le cort dël templ ëd nòst De. 135:3 Laudé Nosgnor, përché Chiel a l’é bon! Canté ‘d làude a sò nòm, përché ch’a l’é agreàbil. 135:4 Sensa dubi Nosgnor a l’ha sernù Giacòb për sè medèsim, Israel për esse Soa proprietà particolar. 135:5 Vera,, mi i sai che Nosgnor a l’é grand e che nòst De a l’é pì grand che tùit ij dé. 135:6 Chiel a fa tut lòn ch’a-j pias, an cel e an sla tèra, ant ij mar e ant le profondità dj’océan. 135:7 Chiel a fà che le nìvole as levo ai confìn dla tèra, a fà che la lòsna a compàgna la pieuva e a tira fòra ‘l vent dai Sò depòsit. 135:8 Chiel a l’ha frapà ij prim nà dl’Egit, comprèis òm e bestie. 135:9 A l’ha fàit d’euvre maravijose e d’assion èd giudissi antrames ti, ò Egìt, contra ‘l Faraon e ij sò servidor.

135:10 Chiel a l’ha butà ‘n dèsrota motobin ëd nemis e massà dij re potent - 135:11 Sihon, èl re dj’amorita e Og, èl re ‘d Basan e tùit ij regn ëd Canaan. 135:12 A l’ha dàit an ardità le Soe tère, com’ an ardità a Sò pòpol Israel. 135:13Nosgnor! Tò nòm a l’é pèr sèmper, Toa reputassion a resta ‘d generassion a generassion, 135:14 pèrché Nosgnor a dà a Sò pòpol l’arvangia e a l’ha compassion dij Sò servidor.

135:15 Ij boracio religios dij pòpol a son mach d’argent e d’òr: a l’han faje ‘d man dj’òm. 135:16 A l’han la boca, ma a peudo nen parlé, a l’han dj’euj, ma a peudo nen vëdde. 135:17 A l’han dj’orìje, ma a peudo nen sènte, sensa dubi a peudo nen fiatì. 135:18 Coj ch’a-j fan a faran l’istèssa fin, parèj coma coj ch’a-j fan fèj. 135:19) O famija d’Israel, laudé Nosgnor! O famija d’Aaron, laudé Nosgnor! 135:20 O famija ‘d Levi, laudé Nosgnor! Vojàutri ch’i séguite Nosgnor, laudelo! 135:21 Nosgnor a mérita la làude an Sion - chiel ch’a sta ‘d cà a Gerusalem. Laudé Nosgnor!