Levìtich

5

Sacrifissi për vàire cas ëd colpeivolëssa

¹Se quaidun a l’é stàit ciamà a comparì coma ‘n testimòni d’un fàit e, apress d’avèj sentù la fórmola ‘d giurament ch’a l’òbliga a dì lòn ch’a l’ha vëddù o ch’a sà, a lo dis nen, a comëtt pëccà e as caria ‘d na colpa.

²Se quaidun, sensa rendse cont, a toca na quai còsa impura, ch’a sìa la caròpa ‘d na bestia impura, tant sarvaja che doméstia, o ‘d bestiòte impure, combin ch’a l’abia nen falo a pòsta, a resta impur e a l’ha comëttù na trasgression. ³Ëdcò ant ël cas che quaidun, sensa rendse cont, a toca na qualsëssìa ampurità uman-a ch’a rend impur col ch’a n’ha contàt, a l’ha comëttù na trasgression.

⁴Se quajdun as lassa scapé^[1] ‘n giurament^[2], pr' ël mal o pr' ël bin, con un ëd coj giurament che la gent a son sòlit ëd përnunsié con lingerëssa, bele se quand ch’a l’ha falo a l’é nen ancorzuss-ne, quand ch’as na rend cont, a l’ha comëttù na trasgression.

⁵Për conseguensa, col ch’a l’ha fàit ëd trasgression dë ste sòrt-sì, a l’ha d’arconòsse ‘l pëccà ch’a l’ha comëttù. ⁶Apress, për fene riparassion, a l’ha da smon-e a Nosgnor na feja o na crava coma sacrifissi pr' ël pëccà. Antlora ‘l sacerdòt a farà për chiel la sirimònia d’espiassion.

⁷S’a l’avèissa pa pro ‘d mojen për procuresse cole bestie, ch’a smon-a a Nosgnor, për la trasgression ch’a l’ha comëttùa, doi tórtore o doi colombòt: un an sacrifissi pr' ël pëccà e l’àutr an olocàust. ⁸A-j portrà al sacerdòt, ch’a presentrà prima l’osel ch’a l’é destinà al sacrifissi pr' ël pëccà. A jë s-ciaprà la testa tacà al cupiss, ma sensa dëstachèjla; ⁹peui a farà n’aspersion con un pòch dël sangh dla vìtima ans ij quatr canton dl’autar, e lòn ch’a vansa dël sangh a lo vërserà ai pé dl’autar. Sossì a l’é ‘n sacrifissi d’espiassion pr' ël pëccà. ¹⁰Apress, a smonrà l’àutr osel an olocàust scond la sirimònia ‘d costumansa.

¹¹Se quaidun a l’avèissa pa pro ‘d mojen për doi tórtore o doi colombòt, ch’a presenta coma n’oferta pr' ël pëccà tre chilo ‘d fior ëd farin-a, ma a l’avrà pa da gionteje d’euli nì a-i butrà ansima d’ancens, përchè ch’a l’é n sacrifissi d’espiassion pr' ël pëccà. ¹²A porterà la farin-a al sacerdòt ch’a na ciaprà na branca fasendla brusé an sl’autàr coma n’oferta ‘d memorial dzura dle vìtime consumà dal feu an onor ëd Nosgnor. A l’é n’oferta për fé l’espiassion dël pëccà.

¹³Quand ël sacerdòt a l’avrà fàit la sirimònia d’espiassion për la trasgression comëttua për cola përson-a ant un-a ‘d cole sircostanse, soa colpa a-j sarà përdonà. Lòn ch’a vansrà ‘d cola farin-a, l’istess che j’àutre oferte ‘d farin-a, a toca al sacerdòt”.

Sacrifissi ‘d riparassion

¹⁴Nosgnor a l’ha ancora parlaje a Mosè. A l’ha dije: ¹⁵“Se quaidun, sensa rendse cont, a l’ha sfrosà Nosgnor ant j’oferte ch’a-i sarìo tocaje, ch’a-j presenta, për riparé al tòrt ch’a l’ha faje, un moton ch’a l’àbia gnun difèt e ch’a costa un cert nùmer ëd sicl d’argent, conform a l’unità ‘d pèis ufissial dël santuari. Lolì a sarà un sacrifissi ‘d riparassion. ¹⁶Ëd pì, a darà për risarciment lòn ch’a l’ha sfrosà al santuari giontand-ne un quint ëd sò valor e a lo darà al sacerdòt. Quand che ‘l sacerdòt a l’avrà fàit për col-lì la sirimònia d’espiassion con lë moton ch’a serv ëd riparassion, soa colpa a-j sarà përdonà.

¹⁷Se quaidun a comëtt n’assion proibìa da ‘n quai comandament ëd Nosgnor, bele s’a l’é stàita për ignoransa, as carierà dël pèis ëd soa colpa. ¹⁸A presenterà al sacerdòt un moton sensa difèt scond ël valor estabilì pr' un sacrifissi ‘d riparassion. Quand ël sacerdòt a l’avrà fàit la sirimònia d’espiassion për la trasgression comëttùa da cola përson-a sensa volèjlo o për ignoransa, soa colpa a-j sarà përdonà. ¹⁹Lolì a l’é ‘n sacrifissi ‘d riparassion pr' ël tòrt, dagià che costa përson-a a l’avìa pëccà dëdnans a Nosgnor”.

²⁰Nosgnor a l’ha ancora parlà a Mosè. A l’ha dije: ²¹“Butoma che quaidun a pëcca an comëttend na fràuda contra Nosgnor, o negand a ‘n compagn un depòsit che sto-sì a l’avìa fidaje, o n’oget ch’a l’avìa amprëstaje, o an roband na quai còsa, o fasendje violensa, ²²o fin-a ant ël cas ch’a trovèissa quaicòsa ‘d përdù e a neghèissa d’avèjlo trovà, o an giurand ël fàuss, a l’avèissa fàit d’assion grame ‘d cole ch’as fan ëd sòlit, ²³collì a l’ha pëccà e a l’ha da dene sodisfassion. Prima ‘d tut, ant ël dì ch’a vorerà fé l’espiassion ëd soa colpa, a l’avrà da dé andarera l’òn ch’a l’ha robà o portà vìa dë sfros, o ‘l depòsit ch’a l’era staje fidà, o l’oget përdù ch’a l’avìa trovà, ²⁴o qualsëssìa còsa dont a l’avìa giurane ‘l fàuss. A l’avrà da restituilo për antregh, e a-i giontrà un quint ëd sò valor. ²⁵Com un sacrifissi për riparé soa trasgression, a presenterà a Nosgnor un moton sensa difèt, stimà conform al valor stipulà pr' un sacrifissi ‘d riparassion. ²⁶Quand ël sacerdòt a l’avrà fàit për col-lì la sirimònia d’espiassion dëdnans a Nosgnor, a-j sarà përdonà qualsëssìa dij pëccà ch’a l’avìa renduss-ne colpèivol.

Nòte

1. O “parland sensa penseje”.

2. O ”na bëstëmmia”.