Salm 58

Ij Salm

58. Vojàutri ij governant, conossevene lòn ch’a veul dì giustissia?

Ël Salmista a sùplica Nosgnor ch’a castìga ij giudes coròt përchè na ciàira dimostrassion dël giudissi divin a persuada la gent che Nosgnor a l’é ‘l Giudes giust ch’a rend giustissia ai giust.

¹Për ël diretor dël còro. Un Salm ëd David da cantesse second ël ton ëd “Dësbla pa”. Vojàutri ij governant, conossevene lòn ch’a veul dì giustissia? Vojàutri ij giudes, giudichevene con dritura? ²Nò! An vòst cheur i studie mach la manera ‘d përvertì la giustissia; i spantie la violensa për tut ël pais.

³Gent d cola sòrt a nass già përversa, fin da cit a san bin coma dì ‘d busìe; a fan mach lòn ch’a-j passa për la testa. ⁴A spuvo ‘d tòssi tanme ‘d serp anvelenà; a son tanme d’aspo ch’a dan da ment a gnun. ⁵Le mùsiche dj’anciarmeur a-j farìo gnun efet, a l’é l’istess vàire ch’a sìo brav a soné.

⁶Nosgnor! S-ciapa ij sò dent anvelenà, fracassa le ganasse dë sti leon. ⁷Ch’a dësparisso tanme d’eva sbrincià an s’un terèn sèch; fà che soe arme a-j sio dësùtil an soe man. ⁸Ch’a sio tanme ‘d lomasson ch’a-j na resta mach la bava, tanme na masnà abortìa ch’a riva pa a vëdde ‘l sol. ⁹Nosgnor a-j ramasserà vìa, sia vej che giovo, ëd na manera pì lesta che na pignata a beuj dzura ‘d fassin-e afoà.

¹⁰Ël giust a farà gran’ festa che giustissia a l’é fàita, as laverà ij pé ant ël sangh dij përvers. ¹¹Peui, a la fin, tuti a diran: “Përdabon a-j é n’arcompensa për coj ch’a vivo për Nosgnor; bin sicur a-i é sì an sla tèra ‘n Dé ch’a giùdica con giustissia.