Levìtich

15

Pèrdite seminaj e mëstruassion

¹Nosgnor a l’ha ‘ncora parlaje a Mosè e Aron. A l’ha dije: ²“Parlé a j’Israelita e dije: ‘Se n’òm a seufr dë scol o ‘d polussion, a l’é impur dla mira ritual. ³Ant ël cas de pèrdita ‘d giuss l’òm a sarà an condission d’impurità ritual tant quand che sò fluss a scor che quand ch’a l’arten.

⁴Ël let anté ch’as cogia col ch’a patiss dë sto mal a l’é impur, e l’istess andova ch’as seta. ⁵Tuti coj ch’a toco sò let a l’avran da netiesse soe vestimente ‘d lor e a saran impur fin-a sèira. ⁶Chi ch’as seta dzura a cheicòsa andova a l’é setasse st’òm, a l’avrà da netiesse soa vestimenta con d’eva e chiel istess a restrà impur fin-a sèira. ⁷Dl’istessa manera chi ch’a toca quaidun ch’a patiss dë sto mal a l’avrà da lavesse la vestimenta, a la laverà con d’eva e chiel istess a restrà impur fin-a sèira. ⁸Se col ch’a patiss ëd pèrdite seminaj a dovèissa spuvé ansima na përsona ch’a l’é pura, sta-sì a l’avrà da netiesse la vestimenta, a la laverà con d’eva e a restrà impur fin-a sèira. ⁹Nen mach lòn, ma tute le sele andov’ a sia setasse col ch’a patiss ëd pèrdite seminaj a son ëdcò impure. ¹⁰Tuti coj ch’a toco cheicòsa ch’a sia staje dzura col ch’a patiss dë sto mal, a restrà impur fin-a sèira, Chi ch’a l’avèissa da trasporté cole còse a l’avrà da netiesse sò vestiari, a lo laverà con d’eva e chiel istess a restrà impur fin-a sèira. ¹¹Se un a dovèissa esse tocà da un malavi dë sta sòrt sensa ch’a sia nen lavasse le man, a netierà ij sò vestì, a-j laverà con d’eva e chiel medésim a restrà impur fin-a sèira. ¹²Un vas ëd teracheuita tocà da chi a patiss ëd pèrdita seminal as ventrà s-ciapelo; ma s’a l’é ‘d bòsch, a l’é da lavesse da bin con d’eva.

¹³Ant ël moment che ‘l malavi dë scol as sentirà varì, a l’avrà da conté set di da soa varision, peui as netierà ij sò vestì, a-j laverà con d’eva corenta e chiel medèsim a restrà pur. ¹⁴Ël dì ch’a fà eut, a ciaprà doi tórtore o doi colombòt con chiel e as presentrà da Nosgnor a l’intrada dla Tenda dër Rëscontr e a-j darà al sacerdòt. ¹⁵Ël sacerdòt a smonrà un dj’oslin com un sacrifissi pr’ ël pëccà, e a smonrà l’àutr an olocàust. Ël sacerdòt a farà an favor ëd chiel dëdnans a Nosgnor ël rit d’espiassion për la pèrdita seminal.

¹⁶Cora che n’òm a l’ha na polussion, a dovrà lavesse tut antregh con d’eva e a restrà impur fin-a sèira. ¹⁷S’a l’é cascaje ‘d lìquid seminal dzura qualsëssìa vestimenta o pel, a l’avran da esse lavà con d’eva, e a restrà impur fin-a sèira.

¹⁸Na fomna e n’òm ch’a l’àbio avù ‘n rapòrt con efussion seminal, a dovran lavesse con d’eva tùit e doi e a restran impur fin-a sèira.

¹⁹Cora che na fomna a l’avrà sò fluss ëd sangh, a restrà impura për set dì; tuti coj ch’a la toco a restran impur fin-a sèira. ²⁰Tut andova ch’a sarà cogiasse durant soe mëstruassion, a restrà impur. ¹² Col ch’a dovèissa tochene ‘l let, a l’avrà da netiesse ij vestì, a-j lavera con d’eva e chiel medésim a restrà impur fin-a sèira. ²²uti coj ch’a dovèisso toché cheicòsa andova che chila a l’é setasse, a l’avrà da netiesse ij vestì, a-j laverà con d’eva e chiel medésim a restrà impur fin-a sèira. ²³Se quaidun a toca na còsa qualsëssìa ch’a sia stàita dzura dël let o cadrega anté la fomna a l’é setasse, pr’ ël fàit d’avèilo tocà a restrà impur fin-a sèira. ²⁴Se n’òm as cogia con chila, la fomna a-j trasmëttrà l’impurità ‘d soa mëstruassion, a restrà impur për ij set dì e ‘dcò a rendrà impur un let qualsëssìa anté chiel as cogia.

²⁵Cora che na fomna a perd ëd sangh për vàire dì, fòra dël temp ëd soe mëstruassion, o cora che la pèrdita a dura pì dël temp ch’a l’é ‘d nòrma, a restrà impura për tut ël temp ëd sò fluss ëd sangh, l’istess coma quand a l’ha soe mëstruassion. ²⁶Tùit ij let andoa ch’as cogia, o tute le cadreghe anté ch’a seta mentre ch’a dura la pèrdita ‘d sangh. ²⁷Tuti coj ch’a dovèisso toché coste ròbe a restran impur; a l’avran da netiesse ij vestì, a-j laveran con d’eva e lor medésim a restran impur fin-a sèira.

²⁸¹Quand che ‘l fluss ëd sangh a sarà chità, chila a conterà set dì për purifichesse. ²⁹Ël dì ch’a fà eut, chila a pijerà doi tórtore o doi colombòt e a-j portrà al sacerdòt ant l’andron dla Tenda dël Rëscontr, ³⁰¹Ël sacerdòt a smon-rà un dj’oslin coma sacrifissi pr’ ël pëccà e a smonrà l’àutr an olocàust. Apress a farà an favor ëd chila, dëdnans a Nosgnor, ël rit d’espiassion për l’impurità ‘d sò fluss ëd sangh.

³¹A l’é parèj che j’Israelita a saran separà da soe impurità e andran pa a meuire për lòn an contaminand mè tabernàcol ch’a l’é an mes a lor. ³²Costa-sì a l’é la lej a riguard dl’òm ch’a l’ha polussion ch’a lo rend impur; ³³dle mëstruassion dla fomna, dle pèrdite seminaj dl’òm o le pèrdite ‘d sangh dla fomna, a riguard dl’òm ch’as cogia con na fomna ch’a sia an condission d’impurità ritual.