Ij Salm

43. Nosgnor! Rendme giustissia!

Vàire manoscrit ebràich ëd l’età ‘d mess a buto ansema Psalm 42 e Psalm 43 an un ùnich Salm. Salm 43 a l’é ‘l sol salm ant la sconda partission dël Salteri (Salm 32-72) ch’a l’ha gnun-a intestassion. Sto fàit a sugeriss che ant l’origin a l’era la tersa session e l’ùltima dël Salm 42. Salm 43:5 a l’é identich al motiv dël Salm 42:11 e squasi identich al motiv an Salm 42:5.

¹Nosgnor! Rendme giustissia^[1], dësfend mìa càusa contra na nassion ch'at conòss nen^[2], liberame da gent ëd fràuda e 'd malissia, ²përchè Ti 't ses ël Dé ch'am dësfend e a guerna. Përché adess, nopà, më slontanes-to da Ti? Përchè l'avrij-ne da marcé coma s'i portèissa 'l deul a càusa dij mè nemis ch'am gavo 'l fià? ³Arvela Toa lus e Toa fidelità! A saran cole mia guida! A saran cole ch'am faran da scòrta fin-a ch'i 'rtòrna a Toa santa montagna, al leugh anté ch' it ëstas. ⁴Antlora i andrai a l'autar ëd Nosgnor, al Dé ch'am rend argiojissant, parèj ch'i manifesta mia arconossensa a Ti, ò Dé, mè Dé, con ël son dl'arpa. ⁵Përchè mai tuta sta tristëssa, ànima mia? Përchè mai costa comossion? Spera an Nosgnor! Përchè ancora i rendrai grassie a mè Dé ch'a l'é 'nteressasse a feme salv!

Nòte

1. O "fame vendeta".

2. O "nen fedel", "pagan".