Ij Salm

72. Nosgnor! Dà al rè d’amor për la giustissia!

Cost Salm real a conten na preghiera për ël rè davidich. A l’é nen dël tut ciàir se ij vers 1-15 a sio na preghiera o a antivëddo un regn dl’avnì. A l’é na mës-ciada an tra na petission e na vision: preghiera d’overtura (v. 1), seguità da j’arzultà anticipà se la preghiera a l’é scot° (vv. 9-14); preghiera ‘d ciusa (vv. 15-17). S’a sìa na preghiera, na vision, o na combinassion dle doe, ël salm a pitura ‘l regn universal d’un rè ‘d pas e ‘d prosperità. Coma tal, a l’é indiret un salm messianich, përchè l’ideal ch’a manifesta a sarà realisà pien mach durant ël regn dël Messia an sla tèra.

¹Un salm ëd Salomon. Nosgnor! Dà al rè d’amor për la giustissia! Dà al fieul dël rè toa dritura. ²Ch’a governa tò pòpol con giustissia, ch’a renda giustissia ai bisognos. ³Che le montagne a dago ‘d pas al pòpol, che toe colin-e a sio fosonante. ⁴Giutlo a dësfende ij pòver, a salvé le masnà dij bisognos e a crasé ij sò craseur. ⁵Ch’a l’àbio ‘d timor reverensial për ti antant ch’a splendriss ël sol e la lun-a a resta ant ël cél. Éh, për sèmper! ⁶Che ‘l govern dël rè a rinfranca tanme la pieuva ant la prima an s’ ëd prà d’erba pen-a tajà, tanme ‘d pieuva ch’a anrosa la tèra. ⁷Che la gent onesta e divòta a Nosgnor a dësbandissa tanme ‘d fior sota sò regn. Ch’a-i sia ‘d prosperità fosonanta fin tant ch’a-i sìa pì nen la lun-a. ⁸Ch’a peuda regné da ‘n mar a l’àutr e dal fium Eufrate ai confin dla tèra. ⁹Ch’as prostërno dëdnans a chiel j’abitant dël desert; ij sò nemis a së sbasseran dëdnans a chiel ant la póer. ¹⁰Ij rè ‘d Tarsis e dle isle a-j porteran d’omagi; ij rè dl’Arabia e ‘d Seba a-j smonran dij present. ¹¹As prostërneran dëdnans a chiel tùit ij ré; tùit ij pòpoj a lo serviran. ¹²Chiel a salverà ij pòver quand ch’a crijeran për esse giutà; ¹³chiel a giuterà coj ch’a son crasà, coj ch’a l’han gnun ch’a-j peuda dësfende. ¹⁴A-j riscatrà dal crasament e da la violensa, përchè soe vite ‘d lor a-j son pressiose. ¹⁵Ch’a viva longament ël rè! Ch’a-j dago l’òr ëd Seba. Che ‘l pòpol a prega sèmper për chiel e ch’a chito mai ëd benedilo. ¹⁶Che ij camp ëd furment a foson-o ant ël pais e fin-a ant la sima dle colin-e. Che j’erbo da fruta a foson-o tanme j’erbo dël Liban, e che le sità a fiorisso tanme l’erba dij camp. ¹⁷Che sò nòm a sìa rendù inmortal, ch’a séguita a d’esse arcordà fin a tant che ‘l sol a splendriss. Che tute le nassion a sìo benedìje për sò mojen e ch’a-j pòrto ‘d làude. ¹⁸Benedì a sìa Nosgnor Dé, ël Dé d’Israel, l’ùnich ch’a fà ‘d maravije! ¹⁹Ch’a sìa benedì për sèmper sò nòm glorios, che soa glòria a ampinìssa tuta la tèra. Amen! Amen!

²⁰Fin dle preghiere ‘d David, fieul ëd Jessé.