Deuteronòmi

24

Régole pr’ij mariagi

¹Quand n’òm ch’a l’ha pijasse na fomna, a l’ha mariala e consumà sò matrimòni, a l’é pì nen content për ch’a l’ha trovà an chila quaicòsa d vërgognos, chiel a podrà pronté ‘n document ëd divòrsi^[1], dejlo e mandejla via da ca. ²Chila, quand ch’a sarà andass-ne, a podrà, s’a veul, dventé la fomna ‘d n’àutr. ³Se lë scond marì ‘dcò a l’arfuda e peuj as divorsia, a-j dà ij papé, e a la manda vìa da ca, o se lë scond marì, ch’a l’avìa maridala, a meuir, ⁴a sò prim marì, ch’a l’era divorsiasse da chila, a l’é nen consentije ‘d maridela torna, përchè a l’é dventà impura da la mira ritual. Maridela torna a sarìa n’abominassion a j’euj ëd Nosgnor. It deuve nen profané con un pëccà parèj ël pais che ‘l Signor, tò Dé, at dà an ardità.

⁵Se un a l’é mariasse da pòch, a l’é nen obligà a ‘ndé soldà, nì a podrà esse carià d’àutri servissi pùblich. Ch’a sia dispensà da qualsëssìa prestassion për n’ann; ch’a resta a soa ca e ch’a fasa sté contenta la fomna ch’a l’ha marià.

Lej riguard ai gagi

⁶Gnun a podrà pijé an gage na pera ‘d mulin, ni cola dzora, ni cola ‘d sota, përchè a sarìa coma pijé për garansìa ij mojen dla vita midema.

Sequestr ëd përson-e

⁷S’as dëscheuvr che quaidun a l’ha sequestrà un dij sò frej israelita për rendolo në s-ciav o vendlo, ël rapitor a l’avrà da meuire. Ranca vìa ‘l mal da ‘n mes ëd ti.

La lebra

⁸Quand ch’a seurto ëd maladìe dla pel^[2], fà bin atension d’osservé con deuit j’istrussion dij sacerdòt levita; procura ‘d fé tut conform a lòn ch’it l’hai comandate. ⁹Arcòrdte 'd lòn che 'l Signor tò Dé, a l'ha fàit a Mìriam ant ël viage, dòp d'esse surtì d'Egit.

D’àutre istrussion riguard ai gagi

¹⁰Quan ch’it fas n’ampréstit qualsëssìa a n’àutr, intra pa a soa ca për pijene ti quaicòsa për garansìa. ¹¹It l’has da stet-ne fòra e la përson-a ch’it jë fase n’amprestit at porterà lòn ch’at smon-a an garansìa. ¹²Se cola përson-a a l’é póvra e at da ‘n garansìa sò mantel, tenlo mach fin-a che chiel a vada a doerme. ¹³Dajlo andré l’ora ch’a cala ‘l sol, përchè chiel a peussa deurme con sò mantel tanme na coerta. Chiel at benedirà e ‘l Signor, tò Dé, a tnirà cont dla bon-a assion ch’it l’has fàit.

Ij pòver a son da rispetesse

¹⁴Crasa pa ‘d travaj ‘n giornalié pòver e bzognos, ch’a sìa n’ tò frel Israelita o ‘n foresté ch’a sta ant na sità ‘d tò pais. ¹⁵It l’has da deje soa paga ant ël dì midem ch’a l’ha travajà, anans ch’a cala ‘l sol, përchè soa vita a dipend da lòn. An difet, chiel a crijerìa a Nosgnor e ti ‘t sarìes colpèivol d’un pëccà.

Responsabilità përsonaj

¹⁶As faran pa meuire ij pare për colpa dij fieuj; nì as butrà a mòrt ij fieuj për motiv dij pare: mincadun a podrà esse condanà a mòrt mach pr’ ij crimen che chiel istess’a l’ha comëttù.

Mzure an favor dij pòver

¹⁷A l’han pa d’esse violà ij dirit d’un foresté o dj’orfanin. Pija nen për garansìa d’un préstit la vesta ‘d na vidoa. ¹⁸Arcòrd-te che ti medésim it j’ere në s-ciav an Egit e che ‘l Signor, tò Dé, at n’ha liberate. A l’é për lòn ch’it comando ‘d buté an pràtica coste prescrission.

¹⁹Quand ch’it fase la mësson ëd tò camp, s’it dësmentie ‘d cheuje dë spi, torna pa ‘ndré për pijeje. Lassje për jë strangé, j’orfanin e le vidoe. ²⁰L’istess, quand ch’it ëspèrte j’uliv, arpassa nen ij branch na sconda vira. Lassa lòn ch’a-i resta pr’ij foresté, j’orfanin e le vidoe. ²¹Quand ch’it fase la vëndumia, ràpola pa j'asinej ch'it lasse ‘ndré, ma làssje pr’ ij forësté, j’orfanin e le vidoe. ²²Arcòrdte che ti 't ses stài në s-ciav an Egit. A l’é për lòn ch’it comando ‘d buté an pràtica coste prescrission.

Nòte

1. O “d’arpudi”.

2. O “la lebra”.