1 Cronache 23

23

23:1 David a l'era vej, arpatà da na vita longa. Për sòn a l'ha nominà re d'Israel sò fieul Salomon. 23:2 Antlora a l'é andait convoché ij cap d' Israel, con ij sacerdòt e ij levita. 23:3 E a l'é fasse 'l cens dij levita da trant'ani an su: sò nùmer, contà për testa, a l'ha dait 38.000 òm. 23:4 David a l'ha dit: "ëd costi-sì 24.000 për l'atività [1] dël Tempi ëd Nosgnor,6.000 scrivan e giùdes e 4.000 guardian, 23:5 për laudé Nosgnor con j' ëstrument ch'a servìo a compagné 'l cant. 23:6 David a l'ha dividùje an ëstrop, corispondent ai tre dissendent ëd Levi: Gerson, Cheat e Merarì. 23:7 Fieuj ëd Gerson: Ladan e Simì. 23: 8 Fieuj 'd Ladan: tre an tut, Iechiel ël prim, peui Setam e Gioel. 23:9 Simì a l'avia tre fieuj: Selomit, Casiel e Aran. Costi-sì a saran ij cap dla casà 'd Ladan. 23:10 Simì a l'avia quat fieuj: Iacat, Zisa, Ieus e Berià. 23:11 Iacat a l'era 'l cap, Zisa lë scond; Ieus e Berià a l'han avù pa vaire 'd fieuj; për sòn censì, a contavo na class sola, n'ùnich casà. 23:12 Cheat a l'avia avù quat fieuj: Amram, Isar, Ebron e Usiel. 23:13 Ij fieuj d'Amram a son ëstait Aron e Mosé. Aron e ij sò dissendent a son ëstait sernù për semper al ministeri ant ël leu pì Sant, për brusé d'ancens ant ël Tempi, për ël servissi a Nosgnor e për benedì la gent ant ël nòm dël Signor fin-a a la fin dij temp. 23:14 Ij fieuj 'd Mosé, òm ëd Dé, a l'ero stait censì con la tribù 'd Levi. 23:15 Fieuj 'd Mosé: Ghersòm e Elieser. 23:16 Ël fieul ëd Ghersòm a l'era Sebuel: ël cap. 23:17 Col d'Elieser a l'era Recabià. Elieser a l'avria pa avù d'autri fieuj. Tutun Recabià a l' avrà na dissendensa bondosa. 23:18 Ël fieul d'Isar a l'era Chelòmit, ël cap. 23:19 Fieuj d'Ebron: Ierià 'l cap; Amarià lë scond; Jacasiel ël ters, e Jecameam , quart. 23:20 Fieuj d' Usiel: Micà, ël cap, e Isià, lë scond. 23:21 Fieuj 'd Merarì: Maclì e Mossì. Fieuj 'd Maclì: Eleasar e Chis. 23:22 Eleasar a l'é andait a meuire sensa fieuj; tant a l'avia mach ëd fije che a son mariasse con ij cusin ëd lor: ij fieuj 'd Chis. 23:23 Mossì a l'avia avù tre fieuj: Malì, Eder e Gerimòt. 23:24 Costi-sì a son ij fieuj ëd Levi conform a sò casà, cap ëd lignagi, scond ël censiment, contà un për un, për nòm , con l'ancàrich dij travaj al servissi dël Tempi 'd Nosgnor, da vint ani an su. 23:25 David , an efet, a l'avia dit: "Nosgnor, Dé d'Israel, a l'ha conceduje arlas a soa gent e a l'ha stabilì soa abitassion a Gerusalem për semper.

23:26 Dcò ij levita a l'avran pa pì da tramudé 'l Tabernàcol, nì j'asi për sò servissi." 23:27 A l'era stait conform a le deriere dësposission ëd David che 'l censiment dij fieuj ëd Levi a l'é stait da vint ani an su. 23:28 Sò travaj al servissi dël Tempi a l'era a j'órdin dij dissendent d'Aron: a guernavo le cort, le stansie, la purëssa ritual ëd tuti j'asi sacrà, e a pijavo part al servissi religios ant ël Tempi 'd Dé. 23:29 Për ij pan dla presentassion, ij fior ëd farina, le fogasse sensa alvà, lòn che a j'era da barghisé[2] an sla grija, la ròba da fricassé e tute le mzure cite e gròsse. 23:30 Minca na matin e tute le seire a dovio fé assistensa al Tempi, për deje grassia a Nosgnor e laudelo.

23:31 Parej coma dcò j'olocàust smonù a Nosgnor ant ij Sabat, ant le lun-e neuve, ant le fëste comandà, conform a la lej përpetua che a l'avio prëscrita. 23:32 Ij levita a dovìo custudì la Tenda dël Rescontr[3] e dj'utis sacrà e a giutavo ij dissendent d'Aron, sò parent, ant ël servissi religios ant ël Tempi.

Nòte

• [1]: Euvra

• [2] Visadì cheuse ai fer ("barghisé" a l'é un termo ebraich piemonteis dovrà për ël rit)

• [3] O dla Radunansa