Osèa

12

Angann e busiardarìa d’Israel

¹Nosgnor a dis: “Coj d’Efraim a l’han ambrojame con ëd busiardarìe e coj d'Israel a l’han anganame con la fràuda. Giuda a s'arvira contra 'd Nosgnor, ch’a l’é tut sant. ²Efraim as alimenta 'd vent; tut ël dì a-j va dré al vent d'orient; a moltìplica busiardarìe e violense; a fan d'aleanse con l'Assiria e as pòrto via l'euli an Egit. ³Nosgnor a rusa con Giuda e a-j ciama cont a Giacòb për soa condòta, a-j farà paghé për ël mal ch’a l’ha fàit

⁴Chiel già da la fàuda dla mare a l'ha piaje 'l pòst a sò frel e da grand a l'ha lotà con Nosgnor. ⁵A l'ha lotà con n'àngel e a l'ha vagnà; a l’ha suplicalo e a l’ha otnune sò favor. Nosgnor a l’é andàit a trovelo a Betel e ambelelà a l'ha parlà a nojàutri: ⁶“Nosgnor a l’é ‘l Dé dl’univers. A l’é con ësto nòm-sì ch’i l’oma da invochelo. ⁷Ti, donca, torna a tò Dé, sie fedel e giust, spera sèmper an tò Dé”.

⁸Nosgnor a dis: “Coj ëd Canan a ten-o an man ëd balanse fàusse, a-j pias d’ambrojé. ⁹E coj d’Efraim a diso: “Ël cas a l’é ch’i soma sgnor, i soma fane na fortuna, e an tuti nòstri guadagn, gnin a na troverà nì colpa nì pëccà”. ¹⁰Ora, mi, ël Signor, ch’a son vòstr Dé da quand ch’i j’ere an Egit, av farà torna vive sota ‘d tende, com ant ij dì dël Rëscontr. ¹¹I l’hai parlà ai profeta, i l’hai acordaje tante vision, e për ël mojen dij profeta im dëspiegherai”.

¹²Se Galad a l'é mach përversità, lor a son nen d'àutr che faussità. A Gilgal a fan ëd sacrifissi ai tòr, për lòn ij sò autar a saran parèj ëd pere an sle preus dij camp. ¹³Giacòb a scapa ant ël pais dj’Aramé, Israel a l'é servì da na fomna, e për na fomna a goerna jë strop. ¹⁴Grassie a ‘n profeta Nosgnor a l’ha fàit fà monté Israel da l'Egit, e për un profeta a l'é stàit goernà! ¹⁵Coj d’Efraim, contut, a l'han ofendù con ameiror sò Signor e lor a-j rendrà responsabij dël sangh vërsà, sò Signor a-j camprà an facia sò oltrage.