Salm 24

Ij Salm

24. A l'é 'd Nosgnor la tèra e tut lòn ch'a-i é

Lë scritor a fortiss la regalità universal dël sovran Creator e a 'rciama a la ment a Sò pòpol che mach a coj ch'a l'han un cheur pur a l'é consentije d'adorelo. Peuj a celebra Sò splendrior coma un vajant rè guerié.

¹A l'é 'd Nosgnor la tèra e tut lòn ch'a-i é, ël mond e tuti coj ch'a-i stan. ²A l'é stàit Chiel ch'a l'ha pogiane le fondassion an sij mar përfond e a l'ha renduje freme tant che le corent a-j podo nen dësbogeje.

³A chi ch'a l'é acordaje d'andé an sla montagna ‘d Nosgnor? Chi é-lo ch'a peul monté a sò tempi sant? ⁴Coj ch'a l'ha 'n cheur sincer e le man sensa colpa, ch'as fido nen a 'd divinità fàusse, né ch'a fan ëd giurament mach pr' angané. ⁵A son coj-lì ch'arseivran ëd benedission da Nosgnor, ch'arseivran ij favor dël Dé ch'a-j salva. ⁶Col-lì a l'é 'l pòpol che Nosgnor a serca, ij dissendent ëd Giacòb ch'a Lo prego.

⁷Pòrte antiche: duverteve! Porton antich, duverteve, ch'a l'ha da intré 'l Rè 'd glòria! ⁸Chi ch'a l'é sto Rè 'd glòria? A l'é Nosgnor, vajant e poderos! Nosgnor, poderos ant ël combatiment! ⁹Pòrte antiche: duvertteve! Porton antich: duverteve, ch'a l'ha da intré 'l Rè 'd glòria! 24:10 Chi ch'a l'é cost Rè 'd glòria? A l'é Nosgnor ëd l'univers, a l'é Chiel ël Rè 'd glòria!