2 Cronache 3

Scond lìber dle Crònache

capìtol 3

3:1 Salomon a l'ha ancaminà a constrùe 'l Templ ëd Nosgnor a Gerusalem an sla montagna Morija, ambelelà andova che sò pare David a l'avìa avù na vision dl'angel ësterminator. A l'era 'l leu prontà da rè David ant l'eira d'Ornan, ël Gebusé.

3:2 A l'ha prinsipià a constrùe dlë scond mèis dël quart ani 'd sò regn. 3:3 Costa-sì a l' é la mzura dle fondamenta che Salomon a l'ha fongà për edifiché 'l Templ ëd Dé: sessanta cùbit dla mòda veja ëd lunghëssa; nopà a l'ero largh vint cùbit. 3:4 Ël pòrtich dëdnans dël Templ a l'era longh vint cùbit e d'autërtant d'autëssa, D'andrinta a l'era tut quatà d'òr pur.

3:5 L' aula gròssa pì amportanta a l'era tuta arvestìa con bòsch d'arsipress, laminà d'òr pur e dzora a l'ha faje dissegné pàlme e feston. 3:6 Costa sala pì gròssa a l'era archincà 'd pére pressiose e d'òr soasì. 3:7 A l'ha arvëstì d'òr le pareti, ij trav, jë stibi e le pòrte. An sle pareti a l'ha fàit scurpì 'd cherubin.

3:8 peui a l'ha fàit constrùe l'àula dij Sant dij Sant, ch'a l'era tant longa, larga e përfonda: vint cùbit. A l'ha patinala 'd feuja d'òr pur, che a corispondìa al peis ëd sessent talent. 3:9 'Dcò ij ciò a l'ha fàit, mincadun a peisava sinquanta sicl. tute le càmere àute a son ëstàite arvestìe d'òr.

3:10 Drinta 'l Sant dij Sant a l'avìa fàit scurpì doi cherubin placà d'òr. 3:11 J'ale dij cherubin a l'avìo vint cùbit ëd longhëssa; minca n'ala a mzurava sinch cùbit e a tocava la parete dla sala; l'àutra, 'dcò 'd sinch cùbit, a tocava l'ala dl'àutr cherubin. 3:12 Dla midema manera n'ala dl'àutr cherubin a mzurava sinch cùbit e a tocava la parete; l'àutra ala, 'dcò 'd sinch cùbit, a tocava l'ala dl'àutr cherubin. 3:13 J'ale dij doi cherubin, dëspiegà, a mzuravo vint cùbit: lor as posavo ansima ai sò pe, con la facia sversa për andrinta.

3:14 Ël re a l'ha 'dcò fàit brodé 'l vel con fij 'd porpra, chërmisin e damass, andova a l'ero ricamà 'd cherubin. 3:15 Dëdnans al Templ a l'ha drissà doi colòne, longhe trantesinch cùbit, con 'd capitej dëdzora, àut mincadun sinch cùbit. 3:16 A l'ha 'dcò fàit ij feston parèj 'd coj dël Santuari e a l'ha butaje dëdzora dle colòne e sent pomgranà, antërsà ant ij feston. 3:17 Coste colòne a son peui stàite butà ant l'andron dël Templ, un-a a drita e l'àutra a mancin-a: cola 'd drita a l'é ciamasse Jachin, l'àutra Boas

À à È è É é Ì ì Ò ò Ó ó Ù ù Ë ë