Amos 9

9

9:1 I l'hai vëddù Nosgnor an pe dzora dl'autar, e am disìa: "Colpis ël capitel e fà tramblé j'arsivòli! S-ciapa la testa a tuti, e coj che survivran i-j masserai mi con la spa. Gnun ëd lor a scamprà; gnun a-i la farà a scapé. 9:2 Fin-a se a calèisso a l'infern, mia man a-i j preleverà. E se a montèisso an cel, da là i - farai calé. 9:3 Dcò se a së stermèisso an sla ponta dël Carmel, ambelelà i-i andrìa a sërcheje e ciapeje. Se as coacèisso an sël fond dël mar për pa fesse vëdde da mi, e bin, da là i-j comandrai al Serpent ëd mòrdje. 9:4 E fin-a se a van përzoné dëdnans dij sò nemis, mi i-j comandrai a la spa 'd masseje, i fisserai j'euj ansima 'd lor, për soa dësgrassia e pa për sò boneur. 9:5 E Nosgnor, Dé dj'Armeje, chiel a toca la tèra e costa-sì a së slingua e tùit ij sò abitant a son an deul; chila a monta parèj dël Nil, tut antregh, e peui a së sbassa com ël Fium d'Egit. 9:6 Chiel a l'ha stabilì le stansie pì àute 'd sò palass ant ël cel e a ten sla tèra la fondassion dël firmament. Chiel a ciama j'eve dël mar e a jë spantia an sla facia dla teren. Sò nòm a l'é Signor. Israel a l'é na nassion, e a sarà tratà parèj 'd tute j'àutre, ma a sparirà pa. 9:7 "Fieuj d'Israel, forse che për mi seves-to pa parèj dj'Etìop?" - a dis Nosgnor - " Miraco che i l'hai pa fàit monté Israel dal pais d'Egit, e ij Filisté da Caftot¹ e j'Aramé da Chir?". Mach chi a l'é 'd bon cheur , as salverà ant la dëstrussion d'Israel. 9:8 Vardé, j'euj 'd Nosgnor Dé a son ëdzora dël regn pecador: "I vado a feje dësparì da la facia dël sol, tutun i-i faraj nen fòra 'd pianta la ca 'd Giacòb - oràcol ëd Nosgnor. 9:9 Përchè vardé che mi i darai le drite e i-j farai tramblé, an tra tute le gent, coma che as peul cicojesse la ca d'Israel con la siassa, e gnanca na gran-a tomberà për tèra. As passerà la siassa e la sessa an mes dël pòpol d'Israel. 9:10 Tùit ij pecador ëd mia gent a meuiriran dë spa, lor che a disìo: 'Ël maleur a s'avzinerà pa, a rivrà pa fin-a a nojàutri'.

Restaurassion dla Dinastìa Davìdica

9:11 An coj di-là, i drisserai torna la bënna 'd David, i restaurerai soe brece, i ausserai soe ruin-e, i l'ardrisserai com ant ij temp d'antan. 9:12 Përchè a peusso torné a esse padron ëd lòn che a-i resta d'Edom² e 'd tute le gent andova che mè nòm a l'é anvocà - oràcol dël Signor - che a farà sòn. 9:13 'Vardé, a-i rivran ëd di, a dis Nosgnor, andova che chi a làura a s'ancontrerà con chi a mësson-a, col che a vendëmmia con col che smen-a dë smens. Le montagne a stisseran most d'uva, tute le colin-e a në dagneran. 9:14 I stabilirai torna mia gent, Israel; lor a costruiran torna le sità vastà e a-i ëstaran, a piantran ëd vigne e a në beiveran ël vin, a coltivran ëd giardin e a në mangeran la fruta. 9:15 I-j trapiantrai dzora 'd soa tèra e lor a saran mai pì rancà via, da 'n sla tèra che i l'hai daje. "A l'é 'l Signor tò Dé ch'a l'ha parlà.

[La fin]

Nòte

1 Peul d'esse ch'a sia Creta.

2 Ant la Bìbia greca " dj'ëstanta " as les: Adam.