1 Samuel

8

Israel a ciama d’avèj un rè

¹Samuel a l'era giumaj vej, e parèj a l'ha nominà giùdes d'Israel ij sò doi fieuj. ²Sò fieul pì grand as ciamava Gioel e 'l pì giovo Abià. A ministravo la giustissia a Beerseba. ³Tutun, lor as portavo nen second l'esempi 'd sò pare, ma a corìo dapress ai sòld e acetavo volenté 'd cadò ‘d corussion. Parèj a përvertìo la giustissia. ⁴Tuti j'ansian d'Israel, donca, a son radunasse e a son andàit a trovè Samuel a Ramà ⁵për dije: "Varda, ti 't ses giumaj vej e tò fieuj as porto nen coma ti. Dane 'n rè ch' an governa, parèj 'd tute j'àutre nassion". ⁶A Samuel, contut, l'é piasuje pròpi për gnente ch'a l'avèisso dije: "Dane 'n rè ch'an governa". Antlora Samuel a l'ha butà st'afé dëdnans al Signor an preghiera.

⁷Nosgnor a l’ha rësponduje: "Fà pura tut lòn ch' ël pòpol a l'ha ciamate, përchè a l'é nen toa autorità che lor a ‘rfudo, ma la mia. An efet, lor a veulo pa che mi i sia sò Rè. ⁸A l'é stàit parèj fin-a da quand ch'i l'avìa portaje fòra da l'Egit: a l'han butame da banda^[1] e a l'han preferì deje l'adorassion^[2] a d'àutri dé. Adess lor at trato ant l'istessa manera. ⁹Fa pura tut lòn ch'at ciamo, ma butje bin an guardia e spieghje la manera ch' un rè a governrà dzura 'd lor” .

¹⁰Antlora Samuel a l'ha faje savèj al pòpol ch'a l'avìa ciamaje 'n rè tut lòn ch' ël Signor a l'avia dije. ¹¹A l’ha dije: “Costa-sì a sarà la manera ch' un rè a governrà dzora 'd voi: A organisrà la coscrission obligatòria^[3] dij vòstri fieuj e a-j butrà ant ij sò cher ëd guèra e an soa cavalerìa; a marceran danans a sò cher. ¹²Quaudun ëd lor a vniran ëd generaj e 'd capitani; d'àutri a-j farà lauré i sò camp e sijé sò gran; a-j farà fabriché soe arme e j'utiss dij sò cher ëd guèra. ¹³Chiel a pijerà vòstre fije coma përfumiste, cusinere e pastissere. ¹⁴As pijerà ‘l possess dij mej camp, dle mej vigne e dij mej ulivè për deje ai sò cortisan. ¹⁵A pretendrà la décima part ëd vòstra smëns e 'd vòstre vigne për paghé ij sò fonsionari e ij sò cortisan. ¹⁶A farà la requisission dij vòstri serv e dle vòstre serve, dle vòstre mej bestie e dij vòstri borich për feje serve ant ij travaj publich. ¹⁷A pretendrà la décima part ëd vòstri strop e vojàutri medésim i sareve ij sò servitor. ¹⁸Ant col dì-là i suplichereve d’esse liber dël rè ch'i l'avìe ciamaje, ma Nosgnor av scotrà nen".

¹⁹Malgré lolì, ël pòpol a l'ha nen vorsù scoté j'avertiment che Samuel a-j fasìa e a l'ha replicà: "Nò, no! I voloma avèj 'n rè! ²⁰I voloma esse tanme j'àutre nassion e avèj 'n rè ch'a ministra la giustissia, ch'a vada anans a nòstra armea e ch'a combata nòstre guère!". ²¹Antlora Samuel, dòp avèj scotà la rispòsta dël pòpol, a l'ha fajla savèj a Nosgnor, ²²e Nosgnor a l'ha dit a Samuel: "Fà lòn ch'a l'han ciamate e daje 'n rè". Peuj Samuel a l'ha dije a j'ansian dël pòpol ch'a l'avrìa falo e a l'ha daje congé.

Nòte

1. O "a l'han bandoname".

2. O "serve".

3. O "sërvissi 'd leva".