Salm 118

118

L'autor a ringrassia Dé për la salvëssa ch'a l'ha daje e cissa d'àutri a fé l'istess.

118:1 Ringrassié Nosgnor, përchè Chiel a l'é brav! Sò amor fedel a dura për sèmper! 118:2 Che Israel a disa: "Sò amor fedel a dura për sèmper"! 118:3 Ch' ij dissendent d'Aaron, ij sacerdòt, a diso: "Sò amor fedel a dura për sèmper"! 118:4 Che tuti coj ch'a l'an timor ëd Nosgnor a 'rpeto: "Sò amor fedel a dura për sèmper"!

118:5 Ant ël pì ben mes dël perìcol i l'hai 'nvocà Nosgnor e chiel a l'ha rispondume. Adess i son lìber. 118:6 Nosgnor a l'é da la mia part, I l'hai gnun-a tëmma. Còsa podrio-ne mai feme la gent? 118:7 Éh, Nosgnor a l'é da la mia part, Chiel am giutrà: i vardrai coj ch'am veulo mal con në sguard ëd trionf.

118:8 A l'é mej trové n'arfugi an Nosgnor che fidesse dla gent. 118:9 A l'é mej trové n'arfugi an Nosgnor che fidesse dij prinsi. 118:10 Combin che dle nassion nemise a l'avèisso anserciame, i l'hai tute butaje 'n diròta con l'autorit๠dël Signor. 118:11 Éh, a l'han anserciame e tacame da tute le diression, ma l'hai tute butaje 'n diròta con l'autorità dël Signor. 118:12 A l'han gitame tut d'antorn tanme në scòp d'avìje; a l'han anfiamasse contra 'd me tanme n'incendi furios, ma l'hai tute butaje 'n diròta con l'autorità dël Signor. 118:13 Ij mè nemis a l'han tentà 'd tut mach për masseme, ma 'l Signor a l'ha giutame e i na son sortì fòra al sicur.

118:14 Ël Signor a l'é mia fòrsa e mè cant ëd trionf: a l'é Chiel ch'a l'ha dame vitòria. 118:15 Canson ëd gòj e 'd vitòria a son cantà ant ël camp ëd coj ch'a son da la part dël Signor. Ël Signor, con Sò bras fòrt dla drita a l'ha fàit ëd còse gloriose! 118:16 Ël bras fòrt dël Signor a l'é levasse an trionf. Ël Signor, con Sò bras fòrt dla drita a l'ha fàit ëd còse gloriose! 118:17 I meuirai nen, i vivrai për conté lòn che Nosgnor a l'ha fàit. 118:18 A l'é vera che Nosgnor a l'ha castigame sever, ma a l'ha nen fame meuire.

118:19 Deurbime le pòrte da 'ndoa ch'a passo ij giust, e mi i intrarai për ringrassié Nosgnor. 118:20 Cole pòrte-là a men-o a la presensa 'd Nosgnor, e ij giust a-j passo travers. 118:21 It ringrassio përchè Ti 't l'has scotà mia preghiera e 't l'has dame vitòria.

118:22 La pera ch'i murador a l'avìo scartà a l'é dventà la pì 'mportanta. 118:23 Costa-sì a l'é l'euvra 'd Nosgnor e a l'é magnifica da vardé. 118:24 Sto-sì a l'é 'l dì ch' Nosgnor a l'ha fàit: arlegromse e foma festa! 118:25 Ah, Signor, dane la salvëssa! Ah, Signor, dane la vitòria!

118:26 Ch'a sìa benedì col ch'a ven ant ël nòm dël Signor! I l'oma benedite da la ca dël Signor! 118:27 Nosgnor a l'é Dé: Chiel a splendriss dal cel. Porté la bestia da sacrifiché e gropela a l'autar. 118:28 Ti 't ses mè Dé e mi it laudrai! Ti 't ses mè Dé e mi it esaltrai! 118:29 Ringrassié Nosgnor përchè Chiel a l'é brav! Sò amor fedel a dura për sèmper!

Nòta

1 O "ant ël nòm dël Signor".