Giòb

15

Scond dëscors d’Elifas

¹Antlora Elifas ël Temanita a l’ha torna pijà la paròla e a l’ha dije a Giòb: ²“Podrìa-la na përson-a giudissiosa rësponde con ëd discors tant campà për ària^[1] ch’a smijo a ‘d breugg ch’a ven-o da na pansa pien-a d’ària càuda^[2]? ³Tirerìa-lo fòra d’argomentassion ëd gnun valor e ‘d bele frase ch’a giuto pròpi gnun?⁴Nen mach, a l’é la religion midéma ch’it dësble përchè con ij tò discors ti, gnentemen-o, it ëslontan-e^[3] la gent da Nosgnor! ⁵Lòn che ti ‘t dise a trova soa ispirassion dal pëccà e toe paròle a la fin as arvelo mach ëd tromparìe. ⁶Nen mi, ma a l’é toa boca ch’at condana^[4]; a l’é ij tò làver ch’a testimònio contra 'd ti.

⁷Ses-to stàit ti ël prim òm a nasse? Ses-to vnùit al mond anans ëd dle montagne? ⁸A smija ch’it conòsse fin-a ij pensé segret ëd Dé. O it ses pijate mach për ti la saviëssa? ⁹Còs sas-to che nojàutri i sàpio nen? Còs a l'é ch'it capisse che noi i podoma pa comprende?¹⁰Ëdcò an tra nojàutri a-i é ‘d gent sàvia con ij cavèj gris^[5] e d’ansian ch’a son fin-a pì d'età che tò pare!

¹¹It l’has bin arseivù da Nosgnor paròle ‘d consolassion e ‘dcò nojàutri i soma stait con ti rispetos e gentij, ma a smija che për ti tut lolì a l’abia gnun efet.¹²Chi ch’a l’é ch’a l’ha portate vìa^[6] la rason^[7]? Ij tò euj a sghicio ¹³përchè a s'adrëssa contra 'd Dé toa flin-a. Da t oa boca a seurto ‘d paròle ch’a fan ëscheur! ¹⁴Còs é-lo mai l'òm përchè a l’àbia da chërdse pur o che a stima d'esse giust un ch’a l’é nassù da na fomna? ¹⁵Varda, se Nosgnor a l'ha gnanca fiusa dij sò àngej^[8] e gnanca ij cej a son nen dël tut pur ai sò euj, ¹⁶tant da pì l'òm a l'é n'esse abominèivol e corrompù, ch'a bèiv ël mal com a fùissa d'eva!

¹⁷I veuj spieghétlo, scotme, it conterai lòn ch'i l'hai vëdù, ¹⁸lòn che ij savant a diciaro, nen stërmà da la tradission dij sò grand;¹⁹a lor a l'é stàita acordà sta tèra, sensa che ancora gnun forësté a-i fussa ancora passà. ²⁰Për tùit ij di ëd soa vita a l’é mach ël gram ch’as tormenta e ch’a conta 'l numer dj'agn arzervà al përvèrs. ²¹Rabel ëd teror arson-a an soe orije e an temp ëd pas as vëdd atacà dai predon. ²²Chiel a chërd nen ëd podèj scampé da j'ëscurità: as sent marcà da la spa. ²³A l’é chiel ch’a va ‘n gir tanme ‘n vagabond, destinà an past ai voltor. Chiel a sà che ij dì ‘d top a-j s’avzin-o lest. ²⁴Ël di ‘d top a lo sbaruva, miséria e angossa a-j volo a còl parèj d'un rè ch’a va a l'atach, ²⁵përchè a l'ha dëstèisa contra Dé soa man, a l'é ancalasne a fesse fòrt^[9] con ël Tutpotent. ²⁶A cor contra 'd chiel a testa àuta, a la sosta dlë spessor gimbà 'd sò fòrt ëscù!

²⁷Tutun, chiel a l’é tròp pesant e bondos^[10] për combate; a l’ha tròp lard^[11] dantorn ai sò fianch. ²⁸Chiel a vivrà an sità ruinà e an ciaborne andova ch'a së stà pa pì, pronte mach a vnì ‘d drocheri. ²⁹A vnirà pa rich e sò boneur a durerà nen; soe proprietà a s’angrandiran pa an sla tèra.

³⁰N’òm parèj a scamperà nen al top; buf ëd calor a sëccheran ij sò gich e sò frut a volerà via portà dal buf ëd la boca 'd Dé. ³¹Gnun-e fiuse ant na vanità falëtta, përchè a sarà na ruin-a. ³²Soa frasca a sarà povà prima dël temp e ij sò branch a fioriran pa pì. ³³A sarà dëspojà parèj ëd na vigna 'd soe rape vërde e a përdrà ij sò fior parèj dl'uliv. ³⁴Përchè tùrgia a l'é la rassa dël përvers e 'l feu a consuma le tende dl'òm venal. ³⁵Chiel a consepiss malissia e a génera maleur: drinta 'd chiel a pronta mach ëd delusion.

Nòte

[1] L'ebràich a l'é: דַעַת־רוּחַ (daʿat ruach): valadì conossensa ch'a serv pa, conossensa van-a, a dzoneus.

[2] Cost termin a l’é l’istess che “vent oriental”. Ël vocàbol për “vent oriental,” קָדִים (qadim), a l'é paralel a “spìrit, vent” ëdcò an Osea 12:2. Ël vent dl'est a l'era malegn përchè motobin càud.

[3] A-i é sì la paròla La paròla שִׂיחָה (sicah) ch’a vorerìa dì: “complenta; pior; meditassion.” Giòb a influenserìa le përson-e a dësfidé Dé e a nen preghé për chiel.

[4] Ël verb עָנָה (ʿanah) con ל (lamed) a veul dì “testimoniי contra.” Për Elifas, a l'é già pro lòn ch'a l'ha sentù da Giòb për condanelo.

[5] Ël partissipi שָׂב (sav), da שִׂיב (siv, “avèj ij cavej bianch”; vëdde 1Samuel 12:2), a ven fòra ant la Bibia mach ant le session aramàiche d'Esdra. La paròla יָשִׁישׁ (iashish, “d'età”) a-i é 'dcò an 12:12.

[6] L interrogativ מָה (mah) sì a l'ha 'l sens ëd ''përché?''(vëdde Giòb 7:21).

[7] O “cheur”.

[8] O “sant”.

[9] La coniugassion riflessiva Hitpael ëd גָּבַר (gavar) a veul dì “agì con fòrsa” o “comportesse da eròe.” L'ideja a sarìa che 'l gram a blaga ancalorà dëdnans a Nosgnor.

[10] O “Përchè a l'ha quatà soa facia con grassa”. Quaidun a dëfend ël significà 'd “covertin-a”, dal verb עָשָׂה (ʿasah).

[11] פִּימָה (pimah), a l'י n'hapax legomenon, ch'a as treuva 'dcò ant l'Arabic: faʾima, “esse grass.”