Surtìa

25

Prescrission an sla costrussion dël santuari e ‘l cult (25-31)

Contribussion pr’ ël santuari

¹Nosgnor a l’ha parlà a Mosè e a l’ha dije: ²“Comandje a j’Israelita ch’a faso na coleta a mè favor an tra tuta la gent ëd bon-a volontà ch’a-i veulo concure. ³Vardé lòn ch’i podreve cheuje da lor coma contribussion: òr, argent e aram; ⁴tessù ‘d porpra viòla e rossa, dë scarlat, ëd damass e pluch ëd crava; ⁵pèil ëd moton tensù ‘d ross, e ‘d tasson, e bòsch ëd gasìa; ⁶euli për ël candlé, balsamin-a për d’onguent e për l’ancens përfumà; ⁷pere d’ònis e pere da sërtì ant l’efod e ant la petrorin-a. ⁸I veuj che j’Israelita am faso un santuari përch’ i peuda sté an mes a lor. ⁹Ël leugh anté ch’i starai e tùit ij sò furniment sacrà, feje dël tut conform al model. ch’i l’hai mostrate”.

L’Erca

¹⁰“Ch’a faso n’Erca ‘d bòsch ëd gasìa: a l’ha da esse larga sinch palme për tre d’autëssa. ¹¹Arvëstijla d’òr pur da drinta e da fòra con na bordura d’òr tut d’antorn. ¹²Fé fonde quat anej d’òr fissà ai quat canton ëd sota: doi anej da na banda e doi da l’àutra. ¹³Apress ëd lòn fé dë stanghe ‘d bòsch ëd gasìa tute arvëstìe d’òr, ¹⁴e feje passé dintra j’anej dij fianch ëd l’érca, për podèjla trasporté. ¹⁵Le stanghe a dovran resté ant j’anej dl’érca: a dovran esse mai gavà da lì. ¹⁶Dintra l’Erca i butreve ël document dl’aleansa^[1] che mi ‘t darai.

¹⁷Peuj për l’Erca faje ‘n covercc, ch’a sarà ‘l leugh dël përdon^[2]. A dovrà esse d’òr pur, ëd sinch palme ‘d larghëssa për tre ‘d larghëssa. ¹⁸Fà ‘dcò doi cherubin d’òr travajà a sbàuss con ël martel, ansima ai doi cò dël coercc. ¹⁹Fà che ij doi cherubin a sio ‘d facia l’un a l’àutr e ch’a vardo giù anvers ël coercc dël përdon. ²⁰Soe ale ‘d lor a l’han da esse dëstendue për tota la lunghëssa dël coercc, coma për soa protession.

²¹Buta andrinta l’Erca ël document dla Aleansa che mi it darai, peuj sara l’Erca con ël coercc dël përdon ansima. ²²A sarà là ch’it vnirai a trové. I parlerai con ti da dzora ‘l coercc dël përdon, an tra ij doi cherubin ch’a-i é dzora l’Erca ch’a conten ël document dl’Aleansa, e it farai savèj tuti j’òrdin destinà a j’Israelita.

La tàula dël pan dj’oferte

²³Fate ‘dcò na tàula ‘d bòsch ëd gasìa ‘d quat palme ‘d longhëssa për doi ‘d larghëssa e tre d’autëssa. ²⁴A l’ha da esse tuta placà d’òr pur. Tut d’antorn faje ‘dcò na bordura d’òr. ²⁵A la tàula, tut d’antorn, faje na curnis ëd na branca e ‘n bòrd d’òr për la curnis. ²⁶Faje quat anej d’òr e fiss-je ai canton dzura ij quat pé, ²⁷At serviran për feje passé le stanghe destinà a tramudé la tàula. ²⁸Le stanghe faje ‘d bòsch ëd gasìa e arvëstje d’òr, [at sërviran për porté la tàula da ‘n pòst a l’àutr]. ²⁹D’òr pur fà ‘dcò ij piat, le cope, j’ànfore e le tasse da dovresse për le oferte liquide^[3]. ³⁰Dzura la tàula butje ij pan dl’oferta^[4] ch’a l’avran da rësté për sèmper dëdnans a mi.

La girindòla

³¹Fate ‘dcò na girindòla^[5] d’òr pur sbaussà. Sò pé, ël bion, ij càles, ij but e le fior a l’avran da esse d’un sol tòch. ³²Fala ‘d ses brass ch’a seurto dal fust sentral, tre da na banda e tre da l’àutra. ³³Ansima a minca branca a l’ha da essje tre càles an forma ‘d fior d’amàndola, con soa siola e ij làver dla coron-a. ³⁴Ël fust dël candlé a l’avrà da esse placà con quat càles an forma ‘d fior d’amandola, con sò burb e soe coron-e, ³⁵e na siola sota ij doi branch ch’a seurto dal candlé. ³⁶Le branche e le siole formaran un sol tòch con la girindòla, tut ësbaussà a martel. ³⁷Fà ‘dcò set lampie da buté dëdzora ‘d manera da fé ciàir a lë spassi dëdnans. ³⁸Ij sò portamochèt e ij sandrié a l’han da esse d’òr pur. ³⁹Për la girindòla con tùit ij sò acessòri it l’has da manca ‘d trenta chilo d’òr pur. ⁴⁰Varda bin ëd fé tut conform al model ch’a l’é state mostrà an sla montagna.

Nòte

1. O “Testimoniansa”.

2. O “dl’arconsiliassion”, dit ëdcò “ël Propissiatori”.

3. O “libassion”.

4. O “Pan ëd presentassion”.

5. מְנֹרָה (mÿnorah).