Salm 48

Ij Salm

48. A l'é grand Nosgnor

Cost Salm a l'é ciamà "la Càntica ‘d Sion” e a celebra la grandëssa e la glòria dël leugh andoa Nosgnor a l'ha sernù coma soa ca, Gerusalem. Soa presensa ant la sità a la eleva dzura d’ògni àutra sità e a-j sicura soa protession.

¹Un càntich dij fieuj 'd Corè. A l'é grand Nosgnor, e degn d’ògni làude ant la sità ëd Nosgnor an sò mont sant, ²sima magnìfica, gòj ëd la tèra antrega. Ël mont Sìon a smija a le sime 'd Sàfon, ma a l'é chila la sità dël gran' Rè. ³Nosgnor medésim a l'é ant le tor ëd Gerusalem, ch'as arvela coma sò difensor. ⁴Ij rè dla tèra a l'ero aleasse për atachela tùit ansema, ⁵ma quand ch'a l'han vëddula a son ëscapà tuti dëstornà. ⁶A son ëstàit ciapà da lë sparm e a son dobiasse dal dolor tanme na fomna ch'a l'é press a partorì. ⁷Ti 't l'has dëstruvije tanme le gran' nav ëd Tarsis fracassà da 'l poderos vent d'orient.

⁸Nojàutri i l'avio bin sentì dì 'd la glòria 'd cola sità, ma adess i l'oma vëddula con nòstri euj medésim - la sità dël Dà dl'univers. Nosgnor a la mantniss ëstabil për sèmper. [Pàusa].

⁹Quand ch'i soma an tò Templ ch’it adoroma, i pensoma a tò amor ch'a na ven mai a manch. ¹⁰Nosgnor! Tò nòm a lo merita pròpi, ti 't saras laudà d'un cap a l'àutr dla tèra. Toa man a l'é pien-a 'd salvëssa.

¹¹Ch'as arlegra 'l pòpol an sël mont ëd Sìon. Che tute le sità 'd Giuda a faso festa për motiv ëd toa giustissia. ¹²Andé a përcore la sità 'd Gerusalem; fé 'n gir dantorn a soe muraje, conté le tor ch'a-i é. ¹³Pijé nòta 'd tute soe fortificassion. Passé a l'arvista soe sitadele, parèj ch'i podreve parlene a le generassion ch'a vniran. ¹⁴Parèj a l'é nòst Dé. Chiel a l'é e sarà nòst Rè për sèmper. A sarà Chiel nòstra guida fin tant ch'i saroma 'n vita.