Deuteronòmi

12

¹Costi-sì a son le lej e le prescrission ch’i l’avreve da guerné e da buté an pràtica tùit ij dì ‘d vòstra vita, ant ël pais che ‘l Signor, ël Dé dij tò antich, at dà an proprietà.

Un santuari ùnich

²Dësblé dël tut ij santuari piassà ‘n sël cò dle montagne, an sij truch o sota ‘n quai erbo sempeverd, anté che le nassion ch’i andreve a dësproprié a rendo l’adorassion ai sò dio. ³Fé droché ij sò autar, campé giù le colòne sacrà, brusé ij boschèt sacrà e dëstruve le stàtue dij sò dio. Che ‘d costi leugh a dësparissa fin-a l’arcòrd^[1].

⁴Quand ch’i rendereve l’adorassion al Signor, vòst Dé, i l’eve nen da imité lòn ch’a fan coste nassion^[2]. ⁵I l’eve, pitòst, da serché ‘l Signor, vòst Dé, ant ël pòst che chiel medésim a l’avrà sernù an tra tute vòstre tribù coma l’abitassion ch’a pòrta sò nòm. ⁶I portereve ambelelà vòstri olocàust e j’àutri sacrifissi, vòstre décime^[3] e contribussion^[4], ij don ch’i l’avreve promëttù al Signor con un vot^[5], j’oferte volontarie e ij prim nassù dij vòstri strop gròss e cit. ⁷Ambelelà, a la presensa dël Signor, vòst Dé, i mangereve ij past sacrà e i fareve festa con vòstre famije, ringrassiand ël Signor, vòst Dé, ch’a l’ha benedì vòst travaj.

⁸I l’avreve pa da fé coma ch’i foma ambelessì ancheuj, doa tùit a fan coma che jë smija mej, ⁹përch’i seve ‘ncora nen intrà ant la tapa^[6] final, l’ardità ch’at don-a ‘l Signor, tò Dé. ¹⁰Quand ch’i travërsereve ‘l Giordan e iv sistemreve ant ël pais che ‘l Signor, vòst Dé, av dà ‘n proprietà, chiel av acordrà la sosta da tùit ij nemis ch’a-i son ant j’anviron e i l’avreve na ca sicura. ¹¹Antlora i andreve al leugh che ‘l Signor, vòst Dé, a l’avrà sernù për ch’a pòrta sò nòm, ël leugh anté ch’a veul ësteje, i i-i presentreve j’oferte ch’iv comando: j’olocàust e j’àutri sacrifissi, vòstre décime e contribussion, e tut lòn ch’a-i sarà ‘d pì soasì dij don ch’i l’avreve promëttù a Nosgnor con un vot. ¹²Ambelelà, a la presensa dël Signor, vòst Dé, i fareve festa con vòstri fieuj e fije, con vòstri servent e servente, e con ij Levita ch’a stan con vojàutri, lor ch’a l’han arseivù gnun-a porsion ëd vòstra ardità.

Ël leugh anté ch’a l’é da fesse ‘d sacrifissi

¹³Pijte varda da smon-e ij tò olocàust ant ëd pòst sacrà ‘d toa sernìa. ¹⁴It l’has da smonje mach ant ël leugh che ‘l Signor medésim a l’ha sernù ant un-a ‘d toe tribù: smonje lì ij tò olocàust e fà tut lòn ch’it comando. ¹⁵D’àutra banda, it podras bin maslé e mangé la carn che mej at pias, a fà nen anté ch’it ëstaghe, coma che la bontà ‘dël Signor tò Dé at provëdd. Tuti a na podran mangé, a fà nen ch’a sìa pura o nen pura da la mira ritual, com it mange ‘d dàim o ‘d serv. ¹⁶Mach ch’i mange pa ‘d sangh: ël sangh it l’has da vërselo për tèra, parèj dl’eva.

¹⁷Ant le sita andova che të staghe, it podras pa mangé le décime dël forment, nì ‘d tò vin, nì tò euli, nì ij prim-nassù ‘d tò strop gròss e cit cabial, nì lòn ch’a l’é votiv e j’oferte volontàire, nì le contribussion arzervà dël frut ëd tò travaj. ¹⁸Mangg-ne mach a la presensa ‘d Nosgnor ant ël leugh che ‘l Signor, tò Dé, a l’avrà sernù. Mangg-ne là con ij tò fieuj e toe fije, con ij tò servent e servente, e con ij Levita ch’a stan an toe sità. Fà festa a la presensa ‘d Nosgnor, ringrassiandlo che tò travaj a l’ha fate prosperé. ¹⁹Damentre ch’it vive an toa tèra, vardte dal bandoné mai ij Levita.

²⁰Quand ël Signor, tò Dé, a l’avrà slargà tò teritori^[7] coma ch’a l’ha promëttù ‘d fé e ti ‘t t’has anvìa ‘d mangé ‘d carn, ti ‘t ses liber ëd mangé ‘d carn ògni vòlta ch’it veule. ²¹A podrìa desse che ‘l leugh designà pr’ ël cult - ël leugh che ‘l Signor, tò Dé a sern për ch’a-i sìa onorà sò nòm - a sia tròp da leugn da toa ca. S’a l’é parèj, it peude maslé un quai cap ëd bestiam, feja o crava che ‘l Signor a l’ha date, e ti ‘t ses liber ëd mangene la carn an toa sità, conform a lòn ch’i l’hai comandate. ²²Chicassìa, ch’a sia pur o nò da la mira serimonial, a peul mangé cola carn-lì, pròpi com it farìe con na gasela o ‘n cerv. ²³Vardte mach dal mangene 'l sangh, përchè ‘l sangh a l’é la vita^[8], e it deuve pa mangé la vita con la carn! ²⁴Donca, ti 't në mangeras nen ëd pianta, ma it lo spantieras për tèra, parèj dl'eva. ²⁵S’it faras parèj, tut a ‘ndrà bin a ti e ai tò dissendent, përch’ it l’avras fàit lòn ch’a pias^[9] a Nosgnor.

²⁶Pòrta al leugh che ‘l Signor a l’avrà sernù, e mach lì, tut lòn ch’it consacre o lòn ch’it ësmon-e an compiment d’un vot. ²⁷S’as trata d’olocàust, smon-a la carn e ‘l sangh dzura dl’autar dël Signor, tò Dé. S’as trata ‘d sacrifissi ‘d comunion, ël sangh a l’ha da esse vërsà an sl’autar dël Signor, tò Dé, ma it podras mangene la carn. ²⁸Osserva con diligensa tut lòn ch’it comando, fà tut lòn ch’a-j pias al Signor, tò Dé, e tut a ‘ndrà bin a ti e ai tò dissendent për sèmper.

Le tràpole dla religion cananèa

²⁹Ël Signor, tò Dé, a farà sparì^[10] da ‘dnans a ti le nassion ch’it ëstas për conquisté. Quand ch’it ëstaras an sò pais, apress d’aveje dësproprià, ³⁰e eliminaje da dnans a ti, vardte dal casché ‘nt la tràpola d’imiteje o d’anteressete dij sò dio; ciama gnanca coma lor a-j rendìo l’adorassion për fé l’istess ëd lor. ³¹It deuve nen rende l’adorassion al Signor tò Dé ëd la manera che j’àutre nassion a rendo l’adorassion ai sò dio, përchè lor, pr’ij sò dio, a fan d’assion detestabij che ‘l Signor a l’ha ‘n òdio. A son fin-a rivà a brusé ant ël feu ij sò fieuj e fije an sacrificandje an onor ëd soe divinità.

Nòte

1. O ël nòm”.

2. O “fé an n’àutra manera”.

3. La décima part dij vòstri arcòlt.

4. A gionta “dle vòstre man”, le part dël frut ëd vòstr travaj.

5. O “oferte votive”.

6. O “l’arpòs”.

7. O “a estend ij tò finagi”.

8. Visadì, la vita a dipend da l’esistensa e da la sirculassion dël sangh.

9. O “lòn ch’a l’é bon e giust dëdnans al Signor” .

10. O “a sterminerà”.