Provèrbi

31

Paròle dël rè Lemuel

¹Paròle dël rè Lemuel, oràcol che soa mare a l'avìa mostraje. ²Mè car fieul! Fieul ëd mè sen! Fieul ed la promëssa! ³Pensa nen mach a core apress le fomne, ch'at porto vìa le fòrse, né a lòn ch'a l'é la ruin-a dij rè. ⁴A va nen bin che 'n re as daga al bèive 'd vin, Lemuel. A va nen bin che coj ch'a governo a sbeivasso, ⁵sëdesnò a podrìo bèive e dësmentiesse 'd lòn che la lej a diciara e neghé ij drit dij pòver. ⁶Dà pitòst da bèive a coj ch'a son perdù, ëd vin a coj ch'a son ant l'amarëssa. ⁷Ch'a bèivo e ch'a dësmentio soa miseria: ch'as arcòrdo pì nen ëd soa pen-a. ⁸Parla an favor ëd coj ch'a l'han nen na vos; sostiniss ij drit ëd coj ch'a peudo nen dësfendse. ⁹Dì le còse coma ch'a stan sensa tëmma, giudica con giustissia; dësfend ij drit dij pòver e dij bzognos.

Na fomna ‘nteligenta ch'as fà onor

Alef ¹⁰Chi podrìa-lo trové na fomna virtuosa? A l'é pì pressiosa che 'd rubìn!

Bet ¹¹Sò marì a l'ha fiusa an chila e chiel a n'avrà 'n grand guadagn.

Ghimel ¹²Chila a-i fà 'd bin e nen ëd mal tùit ij dì 'd soa vita.

Dalet ¹³Chila a va a serne la mej lan-a e 'l lin e a l'ha piasì 'd travajé con soe man.

He ¹⁴A l'é tanme le nav mercantij: a pòrta 'l mangé da leugn.

Vav ¹⁵As àussa 'd bonora e a pronta 'l mangé për soa famija, sensa dësmentiesse dle servente.

Zain ¹⁶Quand ch'a trova 'n camp ch'a pensa ch'a daga na bon-a produssion, a lo cata. Da ij sò guadagn a cata na vigna.

Het ¹⁷A comensa sò travaj con bon-a veuja e as tira sù le mànie ëd brass vigoros.

Tet ¹⁸Chila a sa che soe marcansie a son ëd prima qualità e quand ch'a l'é neuit soa lampia a resta anvisca.

Jòd ¹⁹A dëstend le man për ciapé la roca e a ten strèit ël fus.

Caf ²⁰Chila a doverta la man për giudé ij pòver e a proved ai sò bzogn ëd lor.

Lamed ²¹A l'ha nen tëmma che soa famija a patissa 'l frèid perchè a proved ch'a sio tuti bin quatà.

Mem ²²As fà daspërchila soe veste e a son tute 'd lin fin ëd color scarlata.

Nun. ²³Sò marì a l'é bin conossù quand ch'as seta an tra j'ansian press a le pòrte dla sità.

Samech ²⁴Chila a fabrica 'd vestimente 'd lin e a jë vend. Ij mërcant a ven-o a serché ij bindej che chila a l'ha fàit.

Ain ²⁵A l'é arvestìa 'd fòrsa e 'd dignità e a rij dël dì 'd doman.

Pe ²⁶Quand ch'a parla tuti a arconòsso sò bon sens e an sla lenga a l'ha sèmper ëd consèj bon da dé.

Sade ²⁷A vija con diligensa dzora soa famija e mai a mangia 'l pan ëd pigrissia.

Cof ²⁸Ij sò fieuj as ausso e a-j diso grassie për tut lòn che chila a fà për lor e sò marì a manca mai 'd feje le làude.

Res ²⁹A-j dis: "A son tante le fije ch'a l'han fàit còse 'd valor, ma ti 't l'has sorpassaje tute!".

Sin ³⁰L'anciarm a l'é n'angann e la blëssa a passa prest, ma na fomna ch'a l'ha timor ëd Dio a l'é vreman da laudé!

Tau ³¹Arconòss ël bon frut ëd sò travaj e fà conòsse a j'ansian dla sità ël gran valor che chila a l'ha!