Giosuè

16

La tribù ‘d Giusep

¹Ël teritòri assegnà për sòrt ai dissendent ëd Giusep, a comensava dal Giordan ëd Gérico, fin-a a j'aque 'd Gérico anvers orient, ch'a l'é ël desert; an montand da Gérico për la montagna fin-a Betel. ²E costa frontiera da Betel a rivava a Lus^[1], an passand da Ataròt, andova a vivìo j'Archita. ³Peui a dovìa calé an dëssendend anvers l'ossident, ai finagi dj'Jafletita, fin-a a le borne 'd Bet-Oron bassa. Da là a rivava a Gheser e a finìa ant ël Mar Gròss. ⁴A lé parèj che ij dëssendent ëd Giusep, visadì ëd Manasse e Efraim a l'han arseivù sò teritòri.

Teritòri assegnà a Efraim

⁵Ël teritòri assegnà a le famije d'Efraim a l'era costì: an partend da est sò finagi a andasìa da Ataròt-Adar e Bet-Oron bassa, ⁶Costa frontiera a dovìa seurte vers ël mar a Micmeta, da la banda dël setentrion a virava vers levant fin-a Tacanat-Silo, e an passand da orient, portesse a Janoa: ⁷Peui a calava da Janoach a Ataròt e a Nara, a tocava Gérico, për seurte ant ël Giordan. ⁸Da Tapuach, ël finage andasìa vers ponent fin-a al torent ëd Cana, për peui finì al mar. Costa l'ardità dla tribù dj'Efraimita, conform soe famije, ⁹con la gionta dle sità (tute sità con sò vilagi), butà da banda për j'Eframita an mes a l'ardità dij fieuj ëd Manasse.

¹⁰Ora, tutun, j’Efraimita a l'han pa taparà via ij Canané ch'a stasìo an Gheser; e ij Canané a stan ancora an mes d'Efraim fin-a al di d'ancheuj, combin a sio sogetà a ‘d pressassion forsà.

Nòte

1. Ant ël test ebràich Lus a vorìa esse 'l leu ëd testa dël finagi che a andasìa da Betel a Lus. An d'àutri versèt Betel e Lus a smijo esse ìl midem pòst, antramentre che ambelessì a son diferent. Da notè che la NIV a vòlta "da Bethel (visadì, Lus)" ambelessì, an seghitand la letura djë LXX, εiς Βαιθηλ Λουζα (eis Baithēl Louza, "da Betel a Lus).