Salm 28

Ij Salm

28. Nosgnor, mia ròca! A ti va mia sùplica

L’autor a ciama a Nosgnor ch’a-j fasa vendeta; a-j ciama che ai sò nemis Nosgnor a-j dìa la paga ch’a mérito për soe malfàite ‘d lor, e a fortiss che Nosgnor a goerna ij sò.

¹Nosgnor, mia ròca! A ti va mia sùplica: resta nen lontan da mi, statne nen ciuto! Se ti’t fas nen cas ëd mi, i dventerai tanme coj ch’a son calà giù mòrt ant na tampa. ²Scota mia sùplica, quand chi crijo a ti perchè ‘t më giutes, quand ch’i levo mie man al cél anvers tò santuari sant^[1].

³Rabast-me pa vìa con coj ch’a son colpèivol, nì con coj ch’a faso ‘l mal. Lor a parlo ‘d pas ai sò compagn, ma a stërmo la malissia and sò cheur. ⁴Faje sporghé lòn ch’a l’han fàit, le malfàite ch’a l’han compì. Daje la paga ch’as mérito për le euvre ‘d soe man ed lor.

⁵A lor a-j n’anfà gnente ‘d lòn che ‘l Signor a l’ha fàit, ëd j’euvre ‘d soa man. A l’é për lòn che lor a saran tanme ‘d fabricà ch’a ven-o dësblà për pì nen esse arcostruì!

⁶Che Nosgnor a sia laudà përchè a l’ha scotà mia sùplica. ⁷Nosgnor a l’é mia fòrsa, lë scu ch’am dà protession. Mè cheur as confida an chiel. A l’ha giutame e mè cheu as n’alegra. I veuj laudelo con ij mè cant.

⁸Ël Signor a l’é la muraja ‘d sò pòpol, ël bastion ch’a salva ‘l rè ch’a l’ha consacrà^[2].

⁹Salva tò pòpol! Benediss toa ardità! Ch’it sie sò bërgé! Prendje an brass për sèmper.

Nòte

1. O “ant la tampa dla mòrt”.

2. O “sò onzù”.