Surtìa

38

L’autar dj’olocàust

¹Bessalel, peui, a l’ha dovrà ‘d bòsch ëd gasìa për fabriché l’autar quadrà për j’olocàust. A l’era largh doe branche, lungh doe branche e àut ses branche. ²Ch’a na spontavo dl’istess tòch a l’ha faje coma ‘n còrn për mincadun dij sò quatr canton. A l’ha arvëstì tut l’autar ëd bronz. ³Ëd bronz a l’ha fàit ëdcò tùit j’asi dl’autar: dij vas për cheuje la sënner, ëd palëtte, ëd gaviòt, ëd forchetton, e ‘d brasé. ⁴Për l’autar a l’ha ‘dcò fàit na grija ‘d bronz a forma ‘d rèit e a la butala sota la cornis dl’autar fin-a a metà dl’autëssa. ⁵A l’ha fàit fonde quatr anèj e a l’ha fissaje ai quat canton dla grija ‘d bronz për feje passé le stanghe. ⁶Le stanghe a l’ha fàile ‘d bòsch ëd gasìa, a l’ha arvëstìe ‘d bronz, ⁷e a l’ha faje passé ant j’anèj ch’a-i ero ai fianch dl’autar për podèjlo trasporté. L’autar dintra a l’era veuid e a l’era fàit ëd plancie. ⁸Ëd bronz peui a l’ha fàit ël lavàbos con ij sò sostegn. A l’ha otnulo da jë spe-cc ëd bronz donà da le fomne ch’a servìo a l’intrada dël Tabernacol.

La cort dël Tabernacol

⁹Apress ëd lòn, Bessalel a l’ha fabricà la cort dël Tabernacol, ch’a l’era cintà da ‘d tèile fàite ‘d lin bin filà. An sël fianch meridional coste tèile as estendìo për na longhëssa ‘d sinquanta méter. ¹⁰A l’ero sostnue da vint pianton bin fissà an sù vint sòcoj ‘d bronz. Le tèile a l’ero tacà sù con dj’ansin e d’anèj d’argent. ¹¹Ant l’istessa manera a l’ha fàit na série ‘d tèile për ël fianch nòrd - sinquanta méter ëd tèile sostnùe da vint pianton fissà bin an ëd sòcoj ëd bronz. Le tèile a l’ero ‘dcò tacà sù con dj’ansin e d’anèj d’argent. ¹²Al fianch ëd ponent, le tèile as estendìo për vintesinch méter. A l’avìo des pianton con ij sò des sòcoj. J’ansin e j’anèj ch’a-j tnisìo sù a l’ero d’argent. ¹³Ël fianch ch’a dà a levant a l’era ‘dcò ëd vintesinch méter. ¹⁴L’intrada dla cort a l’era an sël fianch ëd levant fianchegià da doe tèile. La tèila a drita a l’era ‘d set méter e a l’era sortnùa da tre pianton fissà an tre sòcoj. ¹⁵La tèila an sël fianch ëd mancin-a a l’era ‘dcò ‘d set méter e a l’era sostnùa da tre pianton fissà an tre sòcoj. ¹⁶Tute le tèile dovrà për la cort a l’ero fàite ‘d lin bin filà. ¹⁷Minca ‘n pianton a l’avìa ‘n sòco ‘d bronz, e j’ansin e j’anèj a j’ero d’argent. La punta dij pianton dla cort a l’ero arvëstì d’argent, e j’anèj ch’a sërvìo për tnì sù le tèile a l’ero fàit d’argent. ¹⁸Ëd lin bin filà a l’ha fàit la tèila për l’intrada dla cort e a l’ha brodalo con ëd fil tenzù ‘d pórpra violeta, vermèja e scarlata. A l’era larga doi méter e àuta doi méter e mes, l’istess dle tèile dla cort. ¹⁹A l’era tnùa sù da quatr pianton, mincadun fissà bin an sij sòcoj ëd bronz. Le ponte dij pianton a l’ero arvëstìe d’argent e j’anèj a j’ero ‘dcò d’argent. ²⁰Tùit ij pichèt për sostnì ‘l Tabernacol e la cort ch’a-j stasìa dantorn a l’ero ‘d bronz.

Inventari dij materiaj

²¹Për órdin ëd Mosè, ij levita, sota la diression d’Itamar, fieul dël sacerdòt Aron, a l’han fàit n’inventari dël material ch’a l’era stàit dovrà ant la fabricassion dël Tabernàcol dl’Aleansa. ²²Bessalel, fieul d’Uri e novod d’Ur, dla tribù ‘d Giuda, a l’ha fàit tut lòn che Nosgnor a l’avìa comandà a Mosè. ²³Sò colaborator a l’era Oliab, fieul d’Achisamach, dla tribù ‘d Dan, sislador e artista brodeur ëd tëssù ‘d lin fin tenzù ‘d pórpra violeta, vermèja o scarlata.

²⁴L’òr dovrà ant la fabricassion dël santuari, l’òr ch’a l’era stàit n’oferta dël pòpol, a pèisava an tut mila chilo, conforma l’unità ‘d pèis ufissial dël santuari. ²⁵La quantità d’argent cujìa an tra coj ch’a j’ero stàit anregistrà ant ël censiment dla comunità, a l’era ‘d tre mila quatsent e vint chilo, conform a l’unità ‘d pèis ufissial dël santuari. ²⁶Costa quantità a corispond a l’oferta ‘d sinch grama d’argent për testa, l’é a dì la metà dl’unità ‘d pèis ufissial dël santuari, ëd mincadun dij ses-sent tre mila sinch-sent e sinquanta anregistrà dal censiment da l’età ‘d vint agn an sù. ²⁷Për fonde ij sent sòcoj corespondent al santuari e a sò ridò, a son dovrasse tre mila quat-sent chilo d’argent, l’é a dì, trenta-quatr chilo për sòco. ²⁸Con ij vint chilo d’argent ch’a l’é restaje a l’han faje ij rampin e j’anèj dij pianton e a l’han arvëstì ij capitej.

²⁹Ël pèis dël bronz presentà a Nosgnor a l’era ‘d doi mil quat-sent vint-un chilo. ³⁰Së bronz a l’é stàit dovrà për fé ij socoj dl’intrada dla Tenda dël Rëscontr, l’autar ëd bronz con soa grija e tùit j’asi dl’autar, ³¹ij socoj dla cort tut dantorn, ij socoj dl’intrada dla cort, tùit ij pichet dël Tabernacol e tùit ij pichet dla cita dla cort.