Giòb

18

Scond dëscors ëd Bildad

¹Bildad ël Suchita a l'ha torna ciapà a dì: ²“Fin-a a che mira andras-to ancora anans con ëd dëscors coma coj ch’i l’oma sentì^[1]? Ti’t dovrìe prima dì còse ch’a l’àbio ‘d sens, se ti ‘t veule che nojàutri i disa la nòstra. ³Chërdes-to che nojàutri i sia ‘d bestie sensa sust^[2]? Penses-to che nojàutri i sia ‘d beté? ⁴An toa flin-a ti 't piores a còl. Pënses-to che la tèra a sia chità^[3] për salvete ti? O che ròch e priòche a sio dësbogià da sò pòst për fete piasì a ti?

⁵A l’é sicur che la lampia dij gram a sarà dëstissà e che la giòla ‘d sò feu a splendrà pì nen. ⁶La lus ch’as vëd drinta soa tenda ‘d lor a vnirà sèmper pì fiapa e ‘l lum ch’a-i é dzora ‘d lor as dëstiss-rà. ⁷Ij sò pass vigoros a së scurseran^[4] e ij sò progèt a-j faran andé an ruin-a^[5], ⁸përchè a ‘ndran a ‘ngambalesse con ij pe ant na rej e a marceran dzora d'un trabucèt^[6]. ⁹Na liassa^[7] a-j ciaprà për ël garèt, un neu scorsor a lo strensrà. ¹⁰A l'han stërmaje sot tèra un soastr e na trapola a l'é tendùa an sël vieul ch’a passo.

¹¹A saran sbaruvà da tute le bande e a-j seguitran^[8] a le còste. ¹²La fam^[9] a consumrà soe fòrse ‘d lor e ‘l maleur a speta mach ch’as antrapo. ¹³Na malandra a dvorerà soa pel^[10], ël contacc dla mòrt a rusierà ij sò còrp. ¹⁴A saran gavà da la tenda andova a j’ero sicur për esse rabastà^[11] al rëscontr dël rè djë sbuj. ¹⁵La ca dij gram a pijerà feu; na pieuva ‘d sorf afoà a tomberà dzora ‘d soe ca. ¹⁶As sëccheran sota soe rèis e a saran copà dzora ij sò branch. ¹⁷An sla tèra, as perdrà fin-a la memòria ‘d soa esistensa, e pì gnun as arcorderà dij sò nòm. ¹⁸Da la lus a saran campà ant ël top e a saran bandì dal mond. ¹⁹Lor a l’avran nì ‘d fieuj nì ‘d novod^[12], e pì gnun a starà ant la ca andova ch’a stasìo^[13]. ²⁰Ël pòpol dl'ossident^[14] a restrà ambajà da sò destin ëd lor; la gent dël levant a na sarà sburdìa. ²¹A diran: “Vardé lòn ch’a l’é capitaje a ‘d gent grama; vardé coma ch’a l’é finì ‘l leu ëd coj ch’a vivìo coma se Nosgnor a esistèissa pa.

Nòte

1. Ebràich: קִנְצֵי לְמִלִּין (qintse lëmillin); valadì “fin ëd le paròle,” da קֵץ (qets, “fin”).

2. Ebràich: נִטְמִינוּ (nitminu); a podrìa 'dcò esse volta an: ''esse spòrch o stùpid''.

3. A podrìa 'dcò esse dla rèis עָזַב (ʿazav): “rangesse”.

4. Ël verb צָרַר (tsarar) a vorerìa dì: “esse strèit, curt, sacrificà; esse riondà o sircondà.

5. Jë LXX a l'han: “a lo fà antrapé (falì, sbalié: σφάλαι).” Ël verb ebràich a l'é שָׁלַךְ (shalach, “campé”).

6. La paròla שְׂבָכָה (svacah) a l'é dovrà ant la scritura për la grija o fnestra reticolar. (2 Rè 1:2). ËI corispondent àrab a veul dì “da antërsé. ” Për conseguensa: ''rej slongà dzora 'd na tampa''.

7. Ël vocàbol פָּח (pach) al singular e ant lë specìfich a s'arferiss a la liassa për ciapé volaja —tanme na tràpola da osèj, un ''bers''. Ma sò plural a s'arferiss an general a le rej. (vëdde Giòb 22:10).

8. Ebràich פּוּץ (puts): “seghité (ij sò pe)” e “spantié.”

9. Ebràich: אֹנוֹ (ʾono). Ëdcò “vigor”: a la létera “soa fòrsa a l'ha fam.”

10. Ebràich: בַּדֵּי (badde, “mèmber ëd, pel”) prima part ëd בִּדְוָי (bidvay, “da na maladìa”).

11. Ebràich: צָעַד (tsaʿad, “portà, taparà via”).

12. A son doi vocàboj נִין (nin, “pròla”) e נֶכֶד (neched, “posterità”) e a son sempe ansema a formé n'aliterassion.

13. Ël verb גּוּר (gur) a veul dì. “avèj residensa; sogiorné, sté” për pòch temp.

14. La paròla אַחֲרֹנִים (ʾacaronim) a vorerìa dì: “coj-lì [òmo] ch'a rivo apress, valadì da òvest, dal Mar Mediteràni.” E la paròla ch'a ven apress, קַדְמֹנִים (qadmonim), a veul dì: “coj-lì, [òmo] vnend anans, visadì da est, dal Mar Salà (Mòrt)”.