Salm 12

Ij Salm

12. Nosgnor: giutme perchè ‘d brava gent as treuvo pì nen

Ël Salmista a sùplica Nosgnor d’anterven-e, përchè la società a l’é dominà da gent aroganta e sensa religion ch’a crasa la pòvra gent e coj ch’a fan giust a son sèmper ëd men-o. Quand ël Signor a nunsia soa intension ëd goerné coj ch’a son crasà, ël Salmista a ‘rnova soa fiùsa ant la promëssa ‘d Nosgnor.

¹Për ël diretor dël còro: un Salm ed David da companiesse con në strument a eut còrda^[1]. Nosgnor: giutme perchè ‘d brava gent as treuvo pì nen. Ij fedej a son dësparì da la facia dla tèra! ²Tut lòn ch’as diso l’ùn l’àutr a son mach ëd tromparie, frut ëd làver busiard e ‘d cheur pront a ‘ngabiolé. ³Che ‘l Signor a sara la boca ch’a l’han, pien-a ‘d lusinghe e ch’a fasa sté ciuto cole lenghe ch’a spuvo arogansa. ⁴Lor a diso: “I soma brav a parlé, i savoma bin coma dësfend-ne. Chi é-lo mai ch’a podrìa fërmene?”. ⁵Ma ‘l Signor a rëspond: “I l’hai bin vëddule le violense ch’i l’eve fàit a coj ch’a peudo nen dësfendse. Adess mi’m leverai a salveje, përchè a l’han ciamame agiùt”. ⁶I podoma avèj pien-a fiusa dle Paròle 'd Nosgnor. A son sensa difèt tanme d'argent purificà ant un forn da mon, anté ch'a ven rafinà dël tut.⁷A l’é për lòn ch’i savoma che ti, Nosgnor, i goerneras coj ch’a son crasà, e a-j preserveras për sèmper da costa generassion ëd busiard. ⁸J’ingiust as na van an gir daspërtut, quand lòn ch'a l'é mal as na fà la promossion.

Nòte[modifiché]

• 1. Andé↑ O “Conform a le Seminit”