1 Cronache 13

Tramud ëd l'arca

• (1) David, dòp che a l'avìa fàit ciambreja con ij cap rësponsàbij dij mila e dij sent òm e con tuti ij prinsipaj dël pòpol,

• (2) a l'ha dije a tuta la ciambreja d'Israel; se a vë smija che a vada bin e se a lo veul ël Signor, nòst Dé, i manderoma'd mëssagé a j'àutri nòsti frej ëd tuti ij teritòri d'Israel, e dcò ai preivi e ai Levita che a stan an soe sità e ant ij pasturagi dj'anviron, përchè a peusso butesse ansema a nojàutri,

• (3) e i portroma ambelessì l'arca'd nòst Dé, che dai temp ëd Saul i l'oma pa pì soagnà.

• (4) Tuta la comunità a l'é staita d'acòrdi; tuta la gent a l'ha vëddula bin.

• (5) Antlora David a l'é andàit a buté ansema tuti j'Israelita, dal torent d'Egit, a l'estrem mesdì, fin-a'l vàlich d'Amat, për porté andaré l'Arca'd Nosgnor da Chiriat-Jearim.

• (6) Con coj che a lo companiavo da tuta Israel, a son andait a Baala, davzin a Chiriat-Jearim ëd Giuda, për tramudé da ambelelì l'Arca'd Dé che a pòrta'l nòm ëd Nosgnor e che a l'é stà an sij Cherubin.

• (7) Donca a l'han pijait l'Arca'd Dé da la ca d'Abinadab e a l'han butala ansima a'n chèr neuv. Usa e Achio a portavo'l chèr.

• (8) David e tuti j'Israelita a dansavo dëdnans a Nosgnor con tuta l'argiojissansa, an cantand al son d cetre, tambornin, cìmbali e trombëtte.

• (9) Rivà a l'eira'd Chidon, a-i è staie un moment che ij beu a l'avìo fait tramblé l'Arca'd Dé, e Usa a l'ha pogià soa man ansima për sostnila.

• (10) Ma Nosgnor, andignasse contra d'Usa, che a l'avìa tocà l'Arca con la man [ a l'era pa un Levita], a l'ha falo meuire a l'amprovista, dëdnans a Nosgnor.

• (11) David a l'é restà motobin frapà dal fait che Nosgnor a l'avìa fulminà Usa, e për lòn a l'ha daje a col leu'l nòm ëd Peres-Usa [che a veul dì "division, rotura s-ciopé d'Usa"], e parej as ciama ancora al di d'ancheuj.

• (12 ) Col di David a l'ha avù na gran tëmma'd Nosgnor e a l'ha pensà; "Com che i peus-ne porté l'arca'd Dé an mè palas?"

• (13) E a l'ha pa portà l'Arca a sò palas, ant la sità'd David, nopà a l'ha portala a ca d'Obed- Edom, ëd Gat.

• (14) L'Arca' d Dé a l'é restà tre meis con la famija d' Obed-Edom, e Nosgnor a l'ha benedì soa ca e tut lòn che a l'avìa.

À à È è É é Ì ì Ò ò Ó ó Ù ù Ë ë