Isaia

29

Ariel assedià

¹Trist a ti, Ariel^[1]! Ariel, la sità che David a l’avìa butaje l’assedi^[2]! Va pura anans a fé toe sirimònie religiose! Fà pura toe feste quand ch’a n’é ‘l temp! ²I mnasserai Ariel^[3]. A dventerà ‘dnans ëd mi tanme n’autar dovrà për bruseje dzora ij sacrifissi. ³I butraj l’assedi tut dantorn^[4] a chila; it cinterai ëd trincere, contra 'd ti i tirerai sù ‘d rampar^[5]. ⁴Antlora it tomberas e it parleras da për tèra, e toe paròle fiape as alveran da la póer; toa vos^[6] a smijerà cola ‘d në spirit evocà da l’infern^[7]; lòn ch’it diras a sarà parèj d'un bësbij ch’as àussa da 'n mes a la póer.

⁵La burià d’invasor ch’a rivrà a sarà parèj ëd póer fin-a e coma 'd brenn ëspatarà ant ël mugg dij tò lagosin bofà vìa dal vent. Sossì a capiterà a l’improvista, ant un moment. ⁶Un giudissi a tomberà da part dël Signor dl’univers^[8], compagnà da tron, arbomb, ciadél ch’a strunis; a rivrà con d’orissi, tormenta e ‘d fiame 'd feu ch'a ravasa. ⁷A sarà parèj d'un seugn, na vision nuiteja. A-i sarà na burìa ‘d tute le nassion ch'a marcio contra d'Ariel, ëd coj ch'a taco soa fortëssa con ëd màchine da guèra prontà contra 'd chila. ⁸A sarà parèj ëd n'afamà che a seugna 'd mangé, ma ch’as dësvija con lë stòmi veuid; coma un che a l'ha sèi e a seugna 'd bèive, ma as dësvìja strach e con ël gargaròt sùit: a capiterà parèj al mond ëd tute le nassion ch'a marcio contra dël mont ëd Sion.

Ël pòpol ëd Dé a l’ha gnun-a sensibilità spiritual

⁹Antlora i sareve maravijà e sburdì^[9]. Vojàutri i seve dël tut borgno! Lor a son cioch, ma pa ‘d vin; lor a strabuco, ma nen për vìa dla bira. ¹⁰Përchè Nosgnor a l'ha fàit calé 'dzora 'd vojàutri n'ëspìrit dla seugn, a l'ha sarà vòstri euj (vojàutri profeta), a l'ha coatà vòste teste (vojàutri andvin). ¹¹Për vojàutri minca na vision a sarà parèj ëd le paròle d'un lìber cacëtà: as dà a un che a sà pa lese disendje: “Leslo!”, ma chiel a rëspond ch’a peul pa përchè a l'é cacëtà. ¹²Opura as dà 'l lìber a un ch'a sà nen lese disendje: “Leslo!”, ma chiel a rëspond ch'a sà pa lese.

¹³Ël Signor a dis: Da già che 's pòpol am làuda mach con la boca e a m'onora mach con ij làver antant che sò cheur a l'é bin leugn da mi e soa religion ëd lor a l'é mach na tradission, ëd paròle mandà a memòria, ¹⁴vardé, mi i farai torna ‘d ròbe da fé meravijé - d’euvre dël tut strasordinàrie. Ij savant a l’avran pì gnente da dì e ij savi a l’avran pa pì dë spiegassion da dé”.

¹⁵Trist a coj ch’a vorìo stërmé da la vista ‘d Nosgnor ij sò proget e ch’a travajo ant lë scur e a diso: “Chi mai an podrà vëdde?” o “Gnun an conòss!”. ¹⁶Lòn ch’i feve a l’ha gnun-a lògica! Miraco che 'l tupiné a l'é parèj dla crèja? Na ròba a peul dì 'd col ch'a l'ha fala: “Përchè ch’it l’has fame parèj?” E 'n tupin a peudrìa fòrse dì a col ch’a l’ha falo: “Ti ‘t capisse nen coma ch’as fan ij tupin!”.

As ancamin-o ij cangiament

¹⁷Sicura, ancor për pòch e 'l Lìban as cangerà ant un vërzé e 'l vërzé a sarà piàit për na foresta. ¹⁸An col di-lì ij ciòrgn a sentiran le paròle lesùe da ‘n lìber, j'euj dij bòrgno^[10] a podran s-ciairé fin-a ant lë scur pì sombr. ¹⁹La gent ch’a l’era stàita umilià as arlegrerà torna ant ël Signor e ij pì pòver a argiojiran ant ël Sant d'Israel. ²⁰Përchè ij prepotent a-i saran pa pì, jë sbefios a dëspariran; a saran fàit fòra tuti coj ch'a l'han machinà 'd gramissie - ²¹coj ch’a dan ëd testimonianse fàusse^[11], coj ch’a tiro 'd trabucèt al giùdes ch’a sta a le pòrte dla sità, e, con d’acuse fàusse aj nossent a-j gavo la speransa ‘d giustissia .

Nòte

1. N’àutr nòm për Gerusalem, Sion.

2. Ebràich: “la sità dova che David a l'ha butà camp”. Ël verb חָנָה (canah, “camp”) a l'ha nuansa: “buté d'assedi” ambelessì.

3. Ël term אֲרִיאֵל (ʾariʾel, “Ariel”) a l'é sinònim ëd “foalé, fornel, cheur dl'autar, autar”.

4. Ël test ebràich a l'ha: כַדּוּר (caddur, “parèj d'un sercc”), opura, “parèj ëd/con na muraja rionda.” A-i é 'dcò chi a coregg la resh con dàlet: כְּדָוִד (cdavid, “coma David”), com a l'han fàit jë LXX: ως Δαυιδ (see v. 1), ma a podrìa esse 'dcò un bàilo ch'a l'ha fàit ciapé dàlet (ד) con resh (ר).

5. Pa sicur ël significà 'd: מֻצָּב (mutsav) Dal moment che sò prim significà a l'é: “utiss d'assedi”, cheicadun a translata “tor.” Ël sostantiv a riva da נָצַב (natsav, “ciapè posission”).

6. Ebràich: “ e toa vos a sarà parèj 'd na tampa rituala da la tèra. L'ebràich אוֹב (ʾov, “poss ritual”) a s'arferiss a 'n poss, fossà, tampa dovrà dai mascon për evoché jë spìrit da l'infern.

7. O “da sota la tèra”.

8. Ebràich: “da Nosgnor dj'armeje dël cel, ambelelà a sarà la visitassion.” Forma verbal passiva a la tersa përson-a feminin-a תִּפָּקֵד (tippaqed, “a sarà visità”) dovrà ambelessì an sens pa përsonal.

9. La forma הִתְמַהְמְהוּ (hitmahmhu) a l'é na coniugassion imperativa Hitpalpel da מָהַהּ (mahah, “limocé, esité”). Da lòn a peul esse voltà con “fërmesse e resté ambajà.”

10. Ebràich: “Feve bòrgno/Sborgneve e esse bòrgno!” riflessiv Hitpalpel e forma 'mperativa Qal ëd שָׁעַע (shaʿaʿ, “esse bòrgno”) a son butà ansema për evidensié la diciarassion. J'imperativ a l'han la fòrsa 'd n'assersion enfàtica.

11. Ebràich: “coj che a fan n'òm pecador con na paròla.” La coniugassion causativa Hiphil ëd חָטָא (cataʾ) ambelessì a l'ha un sens delocutiv: “diciaré n'òm colpèivol.”