Lamentassion 3

III

3:1 ALEF Mi i son l'òm che a l'ha conossù 'l sagrin, sota 'l foet ëd soa flin-a. 3:2 Chiel a l'ha portame e fame marcé ant ël top e sensa lus. 3:3 Contra'd mi sol, chiel a vira e a toira soa man tut ël di. 3:4 BET Chiel a l'ha fàit ëvnì veja mia carn e mia pél: rompù ij mè òss. 3:5 A l'ha costruì contra 'd mi, sagrinà mia testa con afél e tribulassion. 3:6 Chiel a l'ha fame sté ant ij pòst ëscur, coma se i fùissa un che a l'é mòrt da vàire. 3:7 GHIMEL A l'ha murame viv e i l'hai pa podù seurte; a l'avìa grevà le mie caden-e. 3:8 Quand ëdcò mi i dovèissa crijé e ciamé, chiel a stenz mia preghiera. 3:9 Chiel a l'ha sbarà mie stra con ëd pere da costrussion, stopà ij mè vieuj. 3:10 DALET Chiel a l'é për mi n'ors a l'avàit, përparèj d'un leon ëstermà. 3:11 Fasendme dëstorné da mie stra, chiel a l'ha strompame, a l'ha fàit ëd mi n'oror. 3: 12 A l'ha fàit bandé sò arch e a l'ha colpìme parèj d'un bërsaj për soe flece. 3:13 HE A l'ha piantà le flece 'd soa faretra ant ij mè ren. 3:14 I son ëvnùit a esse la fàula 'd tuta mia gent, për lor la ciabra tut ël di. 3:15 I son svers d'ameiror, chiel a l' ha anciarmame d' absint. 3:16 VAV A l'han s-ciapame ij dent con dla giàira; a l'han quatame 'd sënner. 3:17 Mia ànima a l'é fòra da la pas e mi i l'hai dësmentià 'l boneur! 3:18 I l'hai dit: mia esistensa a l'é finìa, a l'é mia speransa che a ven da Nosgnor: 3:19 ZAIN Arcòrdte 'd mia aflission e 'd mia angossa, a l'é absint e afél. 3:20 As n'avisa, as n'avisa mia ànima, e a së sbassa drinta 'd mi. 3:21 A l'é mè cheur che i ciamrai për arpijé dë speransa. 3:22 HET Ij favor ëd Nosgnor a son pa finì, nì a son tombà soe compassion. 3:23 Lor as arneuvo tute le matin, soa fedeltà a l'é granda. 3:24 " Nosgnor a l'é mia part! A dis mia ànima, a l'é për lòn che mi i spero an chiel". 3:25 TET Nosgnor a l'ha 'd misericòrdia për col che a lo speta, për l'ànima ch'a lo serca. 3:26 A l'é bin ëspeté tranquil la salvëssa 'd Nosgnor. 3:27 A l'é bin për l'òm che a peussa porté 'l giov ëd soa gioventura. 3:28 IOD Che a peussa setesse da sol e an goernand ël silensi, quand che Nosgnor as fà padron ëd chiel. 3:29 Che a vada a buté la boca ant la poer: a peul desse che a-i sia dë speransa! 3:30 Che chiel a spòrza la ciafërla e che a sia frapà, che a peussa sentisse arpatà d'umiliassion. 3:31 CAF Përchè Nosgnor a possa pa andaré j'òm për sèmper: 3:32 përchè se l'òm a l'é sagrinà, chiel a compassion-a conforma soa binvolensa granda. 3:33 Përchè a l'é dë stracheur che chiel a sagrin-a e a umilia ij fieuj ëd l'òm! 3:34 Ant ël moment che a së scarpiso e as craso tùit ij përzoné d'un pais, 3:35 cand che a së sfàussa 'l dirit ëd n'òm dëdnans a la presensa dël Pì Àut, 3:36 quand che as fà tòrt a n'òm ant un process, miraco che Nosgnor vëdd-lo pa? 3:37 MEM Chi é-lo col che a l'avrìa mach da parlé përchè le ciòse a sio? Ë-lo pa Nosgnor ch'a decid? 3:38 Miraco che a l'é pa da la man dël Pì Àut che seurt-lo 'l mal e 'l bin? 3:39 Che rason l'avrìa-lo l'òm ëd barboté? Che n'òm a sia pì brav contra dij sò pecà! 3:40 Vardoma nòstra stra, beicómla da bin e tornoma a Nosgnor. 3:41 "Aussuma nòst cheur e nòstre man anvers Nosgnor che a stà an cel. 3:42 Nojàutri, mach nojàutri i l'oma pecà; noi, noi i soma stàit d'arviros; ti, ti 't l'has pa përdonà! 3:43 SAMECH Ti 't ses anvlupate 'd flin-a e it l'has përseguitame, massacrand sensa pietà. 3:44 It ses anvlupate drinta na nìvola përchè la preghiera a peussa nen passé. 3:45 Ti it l'has fàit ëd nojàutri d'amis, n'arfud ëd le gent. 3:46 PE Lor a l'han dovertà la boca contra 'd nojàutri, tùit ij nòstri nemis. 3:47 Tëmma e trabucèt a j'ero stàit ëdzora 'd noi, rabel e desolassion". 3:48 Ij mè euj a së slinguo an bialere për ël dësastr ëd la fija 'd mia gent. 3:49 AIN Ij mè euj a pioro e as fërmo pa, sensa gnun arlass, 3:50 fin-a al moment che Nosgnor a varda e a vëd da l'àut dël cél. 3:51 Ij mè euj am fan mal, për tute le fije dla mia sità. 3:52 SADE A l'han dame la cassa, dame dapress parèj 'd n'osél, coj che am esecravo sensa na rason. 3:53 Lor a l'han pressipità mia vita ant na tampa, a l'han ciapame a prassà. 3:54 J'eve a l'han passà mia testa; i disìa " I son përdù!". 3:55 COF I l'hai ciamà tò Nòm, Nosgnor, dal fossal ancreus. 33:56 Ti 't l'has sentù mè crij, scotà mia preghiera e mè apél. 3:57 Ti 't ses fate pròssim, ant ël di che i l'hai ciamate. Ti 't l'has dit: "Gnun-e tëmme". 3:58 RES Ti 't l'has difendù, Nosgnor, la càusa 'd mia ànima, ti 't l'has dësangagià mia vita. 3:59 Ti 't l'has vëddù, Nosgnor, ël tòrt che a l'é stame fàit: rendme giustissia. 3:60 Ti 't l'has vëddù soa flin-a, tùit sò complòt contra 'd mi. 3:61 SIN It l'has sentù ij sò oltragi, Nosgnor, tùit ij sò complòt contra 'd mi, 3:62 lòn che ij mè aversari a ciosion-o contra 'd mi, për tut ël di. 3:63 Che as seto o che as levo, varda, i son na cansonëtta për lor. 3:64 TAU Daje 'l contracambi, Nosgnor, conforma l'euvra 'd soe man. 3:65 Faje vnì dur ëd cheur, che toa maledission a peussa esse dzora 'd lor! 3:66 Lassje ant la flin-a e faje vnì gnente sota 'l cel, Nosgnor!