Salm 53

Ij Salm

53. A son pròpi 'd fòj

Cost Salm a smija motobin al Salm 14. Soa diferensa pì granda a ven ant ël vers 5, ch’a corispond, bele s’a l’é nen pròpi l’istess, a 14:5-6 e ant la manera ch’a dovra ‘l nòm ëd Nosgnor. Salm 14 a dovra “ël Signor” (יְהוָה, yhvah, YHWH) an vv. 2a, 4, 6, and 7, mentre che Salm 53 a dovra “Dé” (אֱלֹהִים, ’elohim) për tut ël Salm, anté che YHWH a compariss nen soens. Ël Salmista a fà l’oservassion che la rassa uman-a a l’é coròta da la mira moral. Ij malfasent a craso ‘l pòpol ëd Nosgnor, ma le Salmista a l’ha fiusa ant la protession ëd Nosgno e a ved nen l’ora che Dé a vèndica Israel.

¹Për ël diretor dël còro, scond ël ton ëd “Machalat”. Un psalm ëd David. A son pròpi 'd fòj coj ch'a diso drinta 'd lor^[1]: "Tant, Nosgnor a-j n'anfà gnente 'd lòn ch'i foma^[2]!". A son mars coma 'd bolé, a son ëd malfator; gnun ëd lor a fà lòn ch'a l'é giust^[3]. ²Nosgnor a bèica dal cel e a marca j'òm për vëdde s' a-i sia quajdun ch'a l'abia 'd bonsens e ch'a lo serca. ³Nò, tùit a l'han voltaje le spale, tùit a son përvertisse; a-i é gnun ch'a fasa 'l bin, gnanca un. ⁴Amprendran-ne mai coj-là? Mè pòpol as lo mangio ant un bocon tanme 'd pan; a-j passa gnanca 'nt la ment dë scoté^[4] Nosgnor. ⁵Contut ël dì a vnirà quand ch'a saran ciapà da lë sparm, në spavent ch’a l’han mai conossulo prima, përchè Dé a dëspërdrà j’òss dij tò nemis; a l’avran da vërgognesse përchè Dé a l’avrà faje artiré^[5]. ⁶Ch’a ven-a da Sion la salvassion d’Israel! Quand Nosgnor a ‘rneuvrà la vita ‘d sò pòpol, Giacòb a sarà ‘mpinì ‘d gòj, Israel as arlegrerà.

Nòte[modifiché]

1. O "An sò cheur".

2. O "Dé a-i é nen", "Dé a ved nen".

3. Ij verb dë sto vers a fëscrivo la condòta tìpica 'd coj ch'a fan ël mal. La rassa uman-a antrega a l'é caraterisà da na condòta grama e pien-a 'd pëccà. Cost ateism pràtich - ëd gent ch'a viv coma s'a l'avèissa pa da rëspond ëd sò comportament a Nosgnor - a-j rend dë stupid përché la caraterìstica dij stupid a l'é 'd nen rendse cont o 'd neghé ch'a-j son sèmpe 'd conseguense negative, prima o peuj, ëd sò comportament ëd lor.

4. O “invoché”, “preghé”.

5. O “a l’ha arpossaje”.