Coelet 7

7

La vita a l’é corta e la mòrt a l’é sicura!

7:1 La bon-a arputassion a l’é mej che ‘n bon përfum¹, e 'l dì dla mòrt a l’é mej che 'l dì dla nassensa². 7:2 A l’é mej andé a na sepoltura che a na festa³ përchè la mòrt a l’é la sòrt ëd tùit j’uman: parèj che coj ch’a vivo a-j penso bin. 7:3 Mej ël sagrin che 'l rije, essenda che con un visagi trist as peul avèj ël cheur content. 7:4 Ël cheur dël savi a pensa soens a la mòrt, ma ‘l sensa sust a pensa mach a divertisse⁴.

Na vita legera contra la saviëssa

7:5 A conta 'd pì scoté 'l rimpròcc del savant che scoté le gavade dij fòj⁵ 7:6 përchè coma ch'a l'é 'l crep ëd le ronze sota dla pèila, dla midema manera a l'é 'l rije dël sensa sust, e 'dcò sòn a l'é vanità.

La sapiensa uman-a ranvërsà dai sagrin

7:7 L’estorsion a rend fòj fin-a ij savi, e onze le roe⁶ a corump ël cheur. 7:8 Terminé a l’é mej che comensé; a conta ‘d pì la passiensa che le pretèise. 7:9 Va nen a anvischete 'd flin-a, përchè 'l fot a stà ant ël cheur dij fòj. 7:10 A venta pa dì: "Coma ch'a peul esse che 'l passà a sìa mej che 'l present?"⁷ përchè a l'é pa la saviëssa che a men-a a costa domanda.

La saviëssa a peul slonghé la vita

7:11 La saviëssa a l’é fin-a mej quand ch’as peul gòde ‘d n’ardità. L’un-a e l’àutra a son ëd grand benefissi tut a travers la vita⁸. 7:12 La saviëssa e ij sòld a peudo procurene squasi tut, contut, mach la saviëssa⁹ a peul salvene la vita.

La saviëssa a l’arconòss la man ëd Nosgnor

7:13 Varda l'euvra 'd Dé: chi a podrà drissé lòn che chiel a l'ha piegà? 7:14 Ant ël dì dël boneur, ch'it sie argiojissant, e ant ël dì dël maleur, pensa bin a sossì: A l’é Nosgnor che an manda tant l’un che l’àutr. Arcòrd-te che an sta vita a-i é gnente ‘d sicur.

Ecession a la lej dla retribussion

7:15 I l’hai vëddù pròpi tut an costa vita sensa sens¹⁰: comprèisa la mòrt ëd giovo ch’a j’ero dij giust e la longa vita ‘d përson-e grame¹¹. 7:16 Sie nen tròp bon o tròp savi: përchè vories-to avèj ‘d disangani¹²? 7:17 D’àutra part, sie nen tròp gram, sie nen sensa sust: përchè meuire prima dël temp? 7:18 Tente bon a tut lòn ch’it diso ambelessì, përchè col ch’a l’ha timor ëd Dé a schivia sia l’un-a che l’àutra còsa.

I l’oma da manca dla saviëssa përchè a-i é gnun ch’a sìa giust përdabon

7:19 La saviëssa a procura da pì ‘d protession che des governador ant na sità. 7:20 A-i é gnun òm tant giust an sla tèra da fé 'l bin sensa mai peché. 7:21 Daje nen da ment a tut lòn ch'as dis, it podries ëdcò sente tò servitor ch’at malediss; 7:22 përchè ti ‘t sas bin quante vire che pròpi ti it l’has dìt mal ëd j'àutri.

La saviëssa uman-a a l’é limità

7:23 Mi i l’hai sèmper fàit dël mè mèj për chè la saviëssa a guidèissa ij mè pensé e assion. I l’hai dime: “I sarai giudissios!”, ma a l’è nen sèmpre stàit parèj. 7:24 La saviëssa a l’é sèmper da leugn e a l’é nen facil a trovela!¹³ 7:25 I l’hai sercala daspërtut; i son ampontame a trové la sapiensa e la rason dle còse. I son ëvnùit a la determinassion ëd prové a mi medésim che esse gram a l’é na ròba sensa sens e che la matarìa a l’é na gavada.

7:26 I l’hai trovà che na fomna anciarmanta a l’é pì mera che la mòrt: sò cheur a l’é tanme na tràpola da cassador e ij sò brass tanme le caden-e ‘d na përzon. Col ch’a l’é gradì a Nosgnor a jë scapa, ma ‘l pecador as fà ciapé. 7:27 Vardé lòn ch’i l’hai trovà, a dis Coèlet, confontand tut ansema, për trovene na rason. 7:28 Combin ch’i l’àbia tant sercà, i l’hai pa trovalo. Mach n’òm an tra ‘d mila a l’é onest, ma an tra le fomne gnanca un-a! 7:30 Mach sòn i l’hai dëscovert: Nosgnor a l’ha creà j’uman pr’ esse onest e virtuos¹⁴, ma lor a fan mach ëd rasonament gabolos për giustifiché ij sò malfé¹⁵.

Nòte

1 O “A conta 'd pì un nòm che d'euli fin”.

2 Pr’ ël giust la mòrt “a l’é mej” (Filipèis 1:23), përché ij chërden a son e a restran con ël Salvator Gesù Crist.

3 O “Mej andé a ca dël deul ch’andova ch’as fà disné”.

4 O “...l'é ant la cà dël deul, ël cheur dij sensa sust ant la cà dla gòj”.

5 O “la canson dël fòl”.

6 O “ij cadò”.

7 O “a së stava mej na vòlta”.

8 O “La saviëssa a l'é bon-a parèj ëd n'ardità, chila a l'é 'n profit për coj ch'a vëddo 'l sol”.

9 La vera saviëssa a dà ‘d benefissi an costa vita e an cola ch’a vnirà. Crist a l’é la saviëssa ‘d Dé ch’a pòrta la redension (1 Conrinti 1:30): lòn ch’a dà l’access a la saviëssa pr’ ij pecador,

10 O “‘d vanità”.

11 La question a l’é formulà in Geremia 12:1 e ant ij salm 37 e 73.

12 O “destruve te medésim”.

13 Gnun a peul comprende dël tut la ment ëd Dé, ch’a l’é motobin diversa da la conossensa uman-a (8::16,17; 1 Corinti 2:11).

14 Dé a l’ha creà l’òm bon e moral (Genesi 1:31), ma tùit a fan ëd pecà (Roman 3:23; 5:12).

15 O “a serco mach ed gabole”.

À à È è É é Ì ì Ò ò Ó ó Ù ù Ë ë