Levìtich

19

Le conseguense dla santità ‘d Nosgnor

¹Nosgnor a l’ha ancora parlà a Mosè e a l’ha dije: ²"A tuta la comunità dj’Israelita daje coste disposission-sì: ‘I l’eve da esse sant, përchè ch’a l’é ni ch’i son sant, ël Signor vòst Dé. ³Minca un ëd vojàutri a l’ha da porteje rispet a sò pare e soa mare. I l’eve sèmper da osservé ‘l dì d’arpòs^[1] ch’i l’hai stabilì. Mi i son ël Signor, vòst Dé.

⁴4 An gnun-a manera adressé vòstre preghiere a d’idoj e fabricheve nen ëd mistà ‘d metal fondù. Mi i son ël Signor, vòst Dé.

⁵Quand ch’i smon-e al Signor un sacrifissi ‘d comunion^[2], felo ‘d manera che a Nosgnor a-j piasa përdabon^[3]. ⁶Mangé la carn dël sacrifissi l’istess dì o l’indoman. Tut lòn ch’a resta fin-a al ters dì, a l’ha da esse dël tut brusà. ⁷Se quajdun a na mangia ël ters dì, i l’acetrai pa; cola carn a l’é coma sìa fussa na caròpa. ⁸Col ch’a na mangia a portrà ‘l pèis ëd soa colpa, përchè ch’a profanrìa na còsa consacrà a mi, ël Signor, e a sarìa chiel istess tajà fòra^[4] dal pòpol d’Israel.

⁹Al temp dl’arcòlt, mësson-e nen lòn ch’a l’é chërsù an sla broa dij camp, e tiré nen sù ‘l gran ch’i mëssonor a fan tombé, ¹⁰Fé l’istess ant la vëndumia - cheuje nen dël tut l’uva ch’a-i é ant le vis o ch’a l’é cascà a tèra. Lassela pitòst për ij pòver e jë strangé ch’a-i é ant ël pais. Mi i son ël Signor, vòst Dé.

¹¹Roba nen. Busiarda nen. Ambroja nen quajdun dël pòpol. ¹²Giura nen ël fàuss për mè nòm. Cola-lì a sarìa na profanassion dël nòm ëd tò Dé. Mi i son ël Signor.

¹³Sfruta nen tò pròssim nì portje vìa lòn ch’a l’é ‘l sò. Speta nen fin-a a l’indoman ëd deje la paga ai travajeur giornalié ch’it l’has pijà. ¹⁴Daje nen ëd nòm^[5] a un ch’a l’é ciòrgn e fà nen trapëtta a un ch’a l’é bòrgno. Pensa che tò Dé a vëdd tut. Mi i son ël Signor.

¹⁵Ant ij giudissi, fé nen ëd sentense ingiuste. Fé nen ëd parsialità an favor dij pòver o djë sgnor e dij potent. Giudiché sèmper con giustissia. ¹⁶Va nen an gir an tra toa gent a spantié ‘d maldicense. Presenteve nen coma ‘d testimòni për fé meuire vòst prossim. Mi i son ël Signor. ¹⁷Cova nen ëd malànim contra tò frel, ma al cas coregg-lo, parèj it të faras nen responsàbij ëd sò pëccà.

¹⁸Piete nen l’arvangia nì cova ‘d rancor contra gnun ëd tò pòpol. Veule bin a tò prossim tanme a ti medésim. Mi i son ël Signor.

¹⁹Osserva ‘dcò coste régole-sì. Cobia nen ëd bestie dë specie diversa; sëmna pa an tò camp ëd smens ëd sòrt diversa; butte nen adòss na vestimenta antërsùa ‘d doe diverse qualità ‘d fibra.

²⁰Se n’òm as cogia con na s-ciava ch’a l’é concubin-a ‘d n’àutr e ch’a l’é nen ëstàita riscatà o rendùa lìbera, apress d’avèj anvestigà ‘l cas, col-lì a l’avrà da paghé ‘n risarciment, ma a saran nen condanà a mòrt, dagià che la fomna a l’é ‘ncora na s-ciava. ²¹L’òm, contut, a smon-rà un moton l’intrada dël Tabernàcol coma ‘n sacrifissi ‘d riparassion. ²²Ël sacerdòt, con ës sacrifissi ‘d riparassion, a farà la sirimònia d’espiassion për ël pëccà che col òm a l’ha comëttù; parèj a oten-rà ‘l përdon ëd sò pëccà.

²³Quand ch’intreras ant la tèra dla promëssa e a-i pianteras d’erbo ‘d tute le sòrt, për ij prim tre agn mangg-ne nen ij frut e tenje për profan^[6]. ²⁴Tuti j’erbo ch’a daran ëd frut l’ann ch’a fà quàter, consacrje al Signor con ëd càntich ëd làuda^[7]. ²⁵A partì da l’ann ch’a fà sinch i podras mangene ij frut. S’i faras parèj ti tl’avràs ël mej arcòlt. Mi i son ël Signor, vòst Dé.

²⁶Mangia nen la carn ch’a sia nen ëstàita svoidà da sò sangh. Pràtica nen l’art dl’andvinassion nì j’incantésim. ²⁷¹Tajte nen ij cavèj ai pols ëd la testa, nì spont-te ij cant dla barba. ²⁸Fate nen d’incision an sla pel coma ‘n segn ëd deul nì ‘t faras fete ‘d tatuagi an sla pel. Mi i son ël Signor. ²⁹Profan-a nen toa fija an fasendje fé la bagassa, dësnò ‘l pais as ampinirìa ‘d prostitussion e as quatarìa d’ignomìnia.

³⁰I l’eve sèmper da osservé ‘l dì d’arpòs ch’i l’hai stabilì e d’avèj reverensa për mè santuari Mi i son ël Signor. ³¹Antamneve nen andasend a consulté ij mascon o coj ch’a fan l’evocassion dij mòrt. Mi i son ël Signor, vòst Dé.

³²Àuss-te an pé dëdnans a j’ansian e rend onor a coj ch’a l’han ij cavèj bianch. Àbie timor ëd Dio. Mi i son ël Signor. ³³Quand un migrant a ven a sté dacant a voi, profitene nen^[8]. ³⁴Al opòst, considerelo coma un dël pòst, coma un ëd vojàutri. Volèje bin tanme i veule bin a voi medésim, che ‘dcò vojàutri i j’ere ‘d migrant ant ël pais d’Egit. Mi i son ël Signor vòst Dé.

³⁵Fé gnun-e ingiustissie ant ij giudissi, nì faussifiché ij méter, ij pèis, o le mzure. ³⁶Che vòstre bilanse, pèis e mzure a sio precise. Mi i son ël Signor, vòst Dé, ch’a l’ha fave seurte da l’Egit.

³⁷Osservé tute mie ordinanse e régole. Mi i son ël Signor.

Nòte[modifiché]

1. O “ij saba”.

2. O “ëd pas”.

3. Conform a Soa volontà

4. O “rajà”.

5. O “insulta nen”.

6. O “proibì”.

7. O “coma na selebrassion ëd làude”.

8. O “sfrutelo nen”.