Surtìa

40

Consacrassion dël Santuari e dij sacerdòt

¹Nosgnor a l’ha parlà a Mosè. A l’ha dije: ²“Ël prim dì dël prim mèis buta an pé ‘l Tabernàcol, l’é a dì, la Tenda dël Rëscontr. ³Butje al fond l’Érca dl’Aleansa e dëdnans a l’Érca dëstendje ‘l Ridò. ⁴Apress pòrtje dintra la tàula dij pan dl’oferta con ij sò asi dëdzora. Portje drinta ‘dcò la Girindòla e visca soe lampie. ⁵L’autar d’òr për l’ancens butlo dëdnans l’Èrca ch’a conten le Strument dl’Aleansa e buta a sò pòst ël ridò dl’intrada dël Tabernàcol. ⁶L’autar dj’olocàust butlo dëdnans a l’intrada dël Tabernacol, l’é a dì, dëdnans a la Tenda dël Rëscòntr. ⁷Sistema ‘l lavàbos an tra la Tenda dël Rëscòntr e l’autar, e ampinisslo d’eva. ⁸Apress, buta an pé la cort tut dantorn la tenda, e pend ël ridò dl’intrada dla cort.

⁹Peui pija l’euli dl’onsion santa e onz-ne ‘l Tabernacol e tut lòn ch'a conten. Consacr-lo con tùjt ij sò asi, parèj che tut a na resta consacrà. ¹⁰Onz ëdcò l’autar dj’olocàust con tùit ij sò asi; consacra l’autar, che parèj a sarà santissim. ¹¹Onz ëdcò ‘l lavàbos con sò sòco e consacr-lo.

¹²Apress, comanda che Aron e ij sò fieuj as avzin-o a l’intrada dla Tenda dël Rëscontr e as purifico con d’eva. ¹³Peui fà la vestission d’Aron butandle adòss soe vestimente sacrà e onz-lo, e parèj a sarà consacrà përchè a sìa mè sacerdòt. ¹⁴Ordina peui ch’as presento ij sò fieuj e vestje dle tùniche. ¹⁵Onzje com it l’has fàit con sò pare ‘d lor përchè a sio ij mè sacerdòt. Costa onsion a-j destinerà d’esse an përpètuo dij sacerdòt për tote soe generassion”.

Mosè a compiss j’órdin ëd Nosgnor

¹⁶Mosè a l'ha compì precis tut lòn che Nosgnor a l’avìa comandaje. ¹⁷Ël prim dì dël prim mèis dlë scond ann a l’é stàit butà an pé ël Tabernacol. ¹⁸Mosè a l’ha butalo an pé an piassand ij sòcoj, ij pianton, le travërse e le colon-e. ¹⁹Peui a l’ha fàit dëstende la covertura dëdzora dël Tabernacol e a l’ha fala quaté con le pej, precis coma Nosgnor a l’avìa comandaje. ²⁰Peui a l’ha pijà lë Strument dl’Aleansa e a l’ha butalo drinta l’Érca, a l’ha sistemà le stanghe dl’Érca e dzura a l’ha butaje ‘l Covercc dël Përdon; ²¹a l’ha fàir porté l’Érca ant ël Tabernacol, a l’ha fàit pende ‘ l Ridò e parèj l’Érca dl’Aleansa a l’é stàita stërmà darera dël Ridò, precis coma Nosgnor a l’avìa comandaje. ²²Peui a l’ha fàit sistemé la tàula dij pan dl’oferta ant la Tenda dël Rëscòntr, dëdnans al Ridò, an sël fianch nòrd, ²³e a l’ha presentà ij pan a Nosgnor, coma ch’a l’avìa comandaje. ²⁴A l’ha fàit sistemé apress la Girindòla drinta la Tenda dël Rëscontr, an sël fianch meridional dël Tabernacol, da la banda opòsta dla tàula, ²⁵e a l'ha viscà le lampie dëdnans a Nosgnor com a l’avìa comandaje. ²⁶A l’ha fàir sistemé l’autar d’òr ant la Tenda dël Rëscontr, dëdnans al Ridò dë drinta, ²⁷e a l’ha brusaje l’ancens aromàtich, precis coma Nosgnor a l’avìa comandaje. ²⁸Apress, a l’ha fàit pende ‘l ridò dl’intrada dël Tabernacol. ²⁹A l’ha fàit coloché l’autar dj’olocàust dëdnans a l’intrada dël Tabernacol, l’é a dì, dëdnans a la Tenda dël Rëscontr, e là a l’ha smonaje l’olocàust con l’oferta ch’a lo compagnava, precis coma Nosgnor a l’avia comandaje. ³⁰Ël lavàbos a l’ha falo coloché an tra la Tenda ël Rëscontr e l’autar e a l’ha ampinilo d’eva për le purificassion, ³¹dagià che Aron e ij sò fieuj a l’avìo da netiesse le man e ij pé ³²quand ch’intravo ant la Tenda dël Rëscontr e quand ch’as avzinavo a l’autar, precis coma Nosgnor a l’avìa comandà a Mosè. ³³A la fin a l’ha fàit pende le tende ch’a formavo la cort dantorn al Tabernacol e l’autar e ‘l ridò a l’intrada dla cort. A l’é parèj che Mosè a l’ha compìa tuta l’euvra.

La presensa gloriosa ‘d Nosgnor a ampiniss ël Tabernacol

³⁴A l’é antlora che la nivola a l’ha quatà la Tenda dël Rëscontr e la presensa gloriosa ‘d Nosgnor a l’ha ampinì tut ël Tabernacol. ³⁵Mosè a l’ha podù pì nen intré ant la Tenda, përchè ch’a l’era calaje la nivola e la presensa gloriosa ‘d Nosgnor a l’avìa ampinì tut ël Tabernacol.

³⁶Ora, tute vire che la nivola a partiva dal Tabernacol, ël pòpol a l’avrìa ancaminasse a andeje dapress. ³⁷Se la nivola, contut, as levava nen da lì, lor a restavo anté ch’a j’ero fin a tant che la nivola as na partiva. ³⁸Për tut sò sogiorn ant ël desert, tut ël pòpol a vëddìa, durant ël dì, la nivola ‘d Nosgnor ch’a stava dzura dël Tabernacol, e, dla neuit, a vëddìa ‘n feu.