Abacuch 1

1

Ël profeta a ciama n'agiùt a Nosgnor

¹Presagi che 'l profeta Abacuch a l'ha arseivù an vision.

²"Fin-a che mira, Nosgnor, it ciamrai n'agiut sensa che ti t' im ëscotes? Fin-a che mira i l'avrai da crié anvers ëd ti:" Am fan ëd violensa!" sensa che ti t'im salves? ³Përchè t 'im fase vëdde la përversità e it reste mach në spetator ëd l'opression? Mi i vëddo gnente d'àutr che dëstrussion e violensa; daspërtut ëd ruse, e 'd gent che a va pa d'acòrdi. ⁴Dcò la Lej a l'é pa pì rëspetà, ël dirit a l'é nen aplicà! Òi, 'l përvers a pija an bala 'l giust, e dcò ij giudissi a son ësfaussà!".

Ij Caldé: foet ëd Nosgnor

⁵Nosgnor a dis: "Vardé da bin an tra le gent, beiché, i në sareve stupì e surprèis! Përchè mi i farai dij vòsti di na ciòsa che mach a contela i-i chërderìe pa. ⁶Òi! I farai vnì ij Caldé, costa gent ferosa e pien-a 'd feu, coj che a traverso le dëstèise gròsse dël pais për fesse padron ëd le ca dj'àutri. ⁷A son tremend e feros, a fisso soa potensa e sò dirit ant la fòrsa! ⁸Ij sò cavaj a son pì lest che 'd pantere, e a mordo pì che ij luv noitej; ij sò sivalié a rivo da leugn, ij sò sivalié a rivo an pressa, lor a vòlo coma l'òja che as campa an sla pijàita për fela a tòch. ⁹Tuti a rivo për fé 'd ravagi, la facia afoà com un vent ëd levant; lor ambaron-o 'd përzoné parèj ëd sabia! ¹⁰Costa gent a dëspresia ij re, as na rij dij prinsi. le fortësse a jë sbaruvo pa, a j'ambaron-o 'd tèra contra e as jë pijo. ¹¹Peui com un vent che a vira, as na van da n'àutra part. A son ëd criminaj parèj coma tùit coj che'd soa fòrsa as na fan un dio!

¹²Dai temp pì lontan, ses-to pa ti, Nosgnor, ël mè Dé sant ch' a meuir nen? Ti, la Ròca, tut lolì it l'avìe stabililo për esercité la giustissia, ti it l'avìe fissalo për castighene!

¹³Ij tò euj a son tròp pur për vëdde 'l mal, ti it peule nen toleré 'l crasament. Antlora përchè staghes-to a vëdde j'euvre dij përvers, e it ëstaghe ciuto antant che 'l gram a travonda un pì giust che chiel?

¹⁴Ti it trates j'òm com ij pess dël mar, tanme la gent che a l'ha pa un padron! ¹⁵Ël tiran babilonèis a ciapa tuta la gent con l'amon, a-j tira su con so griseul, a-j ciapa col le rèj, e a na son motobin content, a son ant la gòj! ¹⁶A smon-o dcò sacrifissi a soe rèj, a bruso d'oferte dëdnans a sò griseul, përchè con lòn as procuro motobin da mangé e 'd piat savorì e bondos. ¹⁷Donch, a-j daran-ne sèmper ël gir a sò griseul sensa fërmesse, an massand la gent, sensa misericòrdia?