Coelet 3

3

Tut a l’ha sò moment

3:1 Për tut a-i é sò moment¹ e un temp² për tute le còse sota 'l cél: 3:2 un temp për nasse e 'n temp për meuire; un temp për pianté e 'n temp për dësreisé. 3:3 Un temp për massé e 'n temp për varì; un temp për dëstruve e 'n temp për costruve. 3:4 Un temp për pioré e 'temp per rije; un temp për gëmme e 'n temp për balé. 3:5 Un temp për tiré 'd prassà e 'n temp për ramasseje; un temp pr'ambrassé e 'n temp për tense da j'ambrassament. 3:6 Un temp për serché e 'n temp për perde; un temp për guerné e 'n temp për campé vìa. 3:7 Un temp pr' ës-cianché e 'n temp për cuse; un temp pr' ësté ciuto e 'n temp për parlé. 3:8 Un temp për vorèj bin e 'n temp për odié; un temp për la guèra e 'n temp për la pas.

3:9 Che profit a n'ha col ch'as dà da fé³ con pen-a? 3:10 I l'hai considerà 'l but che Dé a l'ha daje a j'òm. 3:11 A sò temp chiel a l'ha fàit tut da bin ma a l'ha butaje an sò cheur ël sens ëd l'eternità⁴ sensa che l'òm a peussa rivé a capì, dal prinsipi a la fin, l’euvra che Dé a l’ha fàit. 3:12 I son rivà a la conclusion ch'a-i é pa 'd boneur se nen mach ant ël piasì e 'l fessla bin ant la vita. 3:13 E se n'òm a mangia, a bèiv e a gòd an sò travaj, sòn a l'é un don ëd Dé. 3:14 I sai 'dcò che tut lòn che Dé a fà a l'é për sèmper. A-i é gnente da gionteje, gnente da gaveje. Nosgnor a fà parèj përchè a veul esse onorà⁵. 3:15 Lòn ch'a l'era a l'é già stàit; lòn ch'a sarà a l'é già. A l’é Dé ch’a fà che tut a vada anans⁶.

Ij pior ëd coj ch’a son crasà

3:16 I vardo ancora sota 'l sol: al pòst dël dirit, ant ij tribunaj i treuvo l’ingiustissia⁷, al pòst dël giust i treuvo 'l criminal; 3:17 e i son dime: ël giust e 'l delinquent⁸, Dé a-j giudichërà, përché a-i é 'n temp për tut e për tute j'assion.

3:18 I son dime an tra 'd mi, a rësguard dij fieuj dj'òm: a l'é për proveje e mostreje ch' a son tanme ‘d bestie. 3:19 Përchè l'òm e le bestie a l'han la sòrt midema: coma ch'a meuir un a-i meuir l'àutr e a l'é për l'istess buf ëd vent ch'a-i son tùit e doi. Ël pì dl'òm an sla bestia a serv a gnente⁹, përchè tut a l'é vanità 3:20 Tuti a van anvers ël medésim leugh: "Tut a l'é rivà da la póer e tut a tornrà a la póer. 3:21 Va a savèj se 'l sofi dl'òm as àussa pròpi an àut o se col ëd la bestia a cala giù ant la tèra?¹⁰ 3:22 I son ancorzumne che për l'òm a-i é gnente 'd nej che prové 'l piasì an lòn ch'a fà përché costa a l'é soa sòrt¹¹! Chi ch'a l'é ch'a podrà mnelo a vëdde lòn ch'a-i sarà dòp ëd chiel?

Nòte

1 O “A-i é na stagion për tut”.

2 Col chìa lé savi përdabon a sa che tùit ij sò “temp” a son ant le man ëd Nosgnor (Salm 31:15) e che a-i é un temp giust për minca atività dl’òm.

3 O “ch’a travaja”.

4 O “ël sens dël passà e dl’avnì”.

5 O “fà 'n manera ch'a l'àbio tëmma 'd chiel”. Tëmma, o timor ëd Dé a veul dì deje l’onor ch’as confà con lòn che Chiel a l’é (Esod 34:8; Isaia 6:5; Revelassion 1:17).

6 O “Dé a l'arserca lòn ch'a l'é passà”.

7 O “ël delit”.

8 La mòrt a l’é per la creatura uman-a a l’é la mòrt (Genesi 3:19) tanme le bestie (vv. 18-20). Malgré sòn, la diferensa tra ‘l giust e col ch’a l’é nen a l’é nen gavè da la mòrt, ma a sarà arvelà al giudissi ùltim ëd Dé.

9 O “l’òm a l’é nen tant mej che le bestie”.

10 Ant n’àutr leugh l’autor a armarca che conbin che ‘l còrp fisich a torna a la poer, lë spirit a torna a Dé (12:7).

11 O “soa paga”.