Levitich 23

23:1 Ël Signor a l'ha parlaje a Mosè e a l'ha dije: 23:2 Parla a j'Israelita e dije: Le feste avosà dël Signor, che voi i fareve, a saran convocassion sacrà; ambelessì a son mie feste solenisà. 23:3 As travajerà ses di, ma al sétim di, che a l'é Saba d'arpòs, a-i sarà na ciambreja santa; vojàutri i fareve gnun-a euvra: a sarà Saba sensa fin, an tute vòstre ca. 23:4 E coste a son le feste solenisà dël Signor, ciambreje sacrà, andova i ciamreve ij fieuj d'Israel ant ij temp stabilì. 23:5 Ant ël prim mèis, ël di che a fà quatòrdes ëd cost mèis, an fra 'l calé dël sol e sò tramont a sarà Pasca dël Signor. 23:6 E 'l di che a fà quìndes, dël midem mèis, ancamin-a la festa dij Pan sensa Alvà an onor ëd Nosgnor. I mangereve pan sensa alvà për na sman-a. 23:7 Ël prim di a sarà për vojàutri na ciambreja santa: an col di-lì i fareve gnun-a corvé. 23:8 Për na sman-a i smonreve 'd sacrifìssi a Nosgnor, ma 'l sétim di a sarà për vojàutri torna n'adunansa sacrà: an col di i fareve gnun travaj da s-ciavandé. 23:9 Nosgnor a l'ha 'dcò dije a Mosè: 23:10 Parlje a j'Israelita e dije: Ant ël moment che voi i sareve intrà ant ël pais che mi i l'hai dave, e cora che vojàutri i l'avreve fàit l'amson: i-j portereve al sacrificator na brancà dle primìssie 'd lòn che i l'eve mëssonà. 23:11 Chiel a la smonrà an gest ëd presentassion an facia a Nosgnor përchè voi i sie agradì. A sarà ant l'andoman dël saba che a sarà presentà. 23:12 E 'l di che vojàutri i ufrireve costa pugnà, i sacrifichereve un babero'd n'ani sensa difèt an sacrifissi complet a Nosgnor. 23:13 L'oblassion ëd cost olocàust a sarà 'd doi décim ëd pur fior ëd farin-a, farsì d'euli, a sarà 'n mangè për ël Signor, përfum ch'a arlama: la libassion dël vin a sarà dla quarta part d' un sesté1. 23:14 E vojàutri i mangereve pa 'd pan, nì gran brusatà an ëspì, o panada, fin-a col di-là che i portereve l'oferta a vòst Dé; a l'é n'ordinansa sensa fin për vòstre generassion ch'a vniran, an tùit pòst andova i stareve. 23:15 I contereve set sman-e a partì da l'andoman dël saba, dal di che vojàutri i l'avìe portà la pugnà d'ëspì 'd presentassion. A saran set ësman-e antreghe. 23:16 Conté sinquanta di, valadì, fin-a al di dòp dël sétim saba, e mach antlora i smonreve al Signor na neuva oferta vegetala. 23:17 I portereve da vòste ca doi micon ampastà con d'alvà e doi décim ëd pur fior2, da eufre an presentassion. 23:18 Ansema a sti pan, i andreve a eufre 'dcò set agnej sensa macia, nassù ant l'ann, un bocin e doi moton, an sacrifissi complet a Nosgnor, ansema a oblassion e libagion: sacrifissi 'd përfum soasi për ël Signor. 23:19 'Dcò un boch a sarà sacrificà, tanme sacrifissi për ël delit, e doi babero nassù ant l'ani an sacrifissi 'd pas. 23:20 Ël prèivi a jë smonrà an gest ëd presentassion dëdnans dël Signor, ansema al pan dle primissie e ai doi agnej: a saran sacrà a Nosgnor e 'd proprietà dël prèivi. 23:21 An col midem di, vojàutri i selebrereve la festa e a sarà për voi na giornà 'd ciambreja santa: i-i fareve gnun travaj dë s-ciavensa. Costa a l'è na lej sensa fin an tùit ij leu andova che i andreve a sté, për tùit vòsti dëssendent ch'a rivran. 23:22 Quand che i fareve amson ëd lòn che a-i sarà da cheuje an vòstre campagne, andé pa a meje fin-a an brova dël camp, mëssoné pa le gèrbole restà dòp ch'i l'eve amsonà, ma lasseje al pòver e al frosté: Mi i son ël Signor vòst Dé.

23:23 E Nosgnor a l'ha comandaje a Mosè: 23:24 Parla ai fieuj d'Israel e dije: Ël prim di dël sétim mèis, a sarà për vojàutri di d'arpòs, memorial d'aclamassion, convocassion sacrà. 23:25 An col di-lì i fareve gnun-a corvé, e i dovreve eufre 'd sacrifissi a Nosgnor. 23:26 Ël Signor a l'ha ancora parlà a Mosè, an disendje: 23:27 Ël des ëd cost sétim mèis a l'é di d'Espiassion: ch'a sia për vojàutri na giornà 'd ciambreja santa, fé digiun e smon-e 'd sacrifissi al Signor. 23:28 An cola giornà-là, voi i fareve gnun travaj, përchè a sarà 'l di andova che as compirà dzora 'd vojàutri 'l rit dl'Espiassion dëdnans al Signor vòst Dé. 23:29 Òi! Chi a digiunerà pa an col di-là a sarà rancà via dai sò; 23:30 col che an col di a travajerà, mi i lo soprimerai d'an mes ëd soa gent. 23:31 Vojàutri i fareve gnun travaj, a l'é na lej sensa fin për coj che a vniran dòp ëd voi, an qualsëssìa leu i podèisse esse. 23:32 A sarà tanme un saba për tùit: di d'arpòs complet. I fareve digiun, e da la sèira dël di che a fà neuv dël mèis, e fin-a a la sèira dël di ch'a ven: i chitereve 'l travaj.

23:33 Nosgnor a l'ha ancora comandaje a Mosè: 23:34 Parla a j'Israelita e dije: ël di che a fà quìndes ëd col sétim mèis as célebra për set di la Festa dle Benne, an onor dël Signor. 23:35 Ël prim di a l'é di 'd convocassion santa; i fareve an col di gnun-a euvra da servent. 23:36 Për set di i smonreve a Nosgnor ëd sacrifissi consumà dal feu; ant ël di ch'a fà eut, che a-i sia për vojàutri na ciambreja sacrà e ufrireve al Signor ëd sacrifissi. A l'é di 'd riunion, vojàutri i fareve gnun-a euvra 'd s-ciavensa.

23:37 Coste le solenità dël Signor andova che voi i convochereve ij fieuj d'Israel, ciambreje sante destinà a eufre 'd mangé a Nosgnor, olocàust, oblassion, sacrifissi, libassion, conform ël ritual pròpri 'd minca di, 23:38 oltra ij saba dël Signor, ij regaj present, j'oferte votive e volontàrie che i fareve a Nosgnor.

23:39 D'àutra part, ël di che a fà quìndes dël sétim mèis, cora che i l'avreve ambaronà la produssion dël pais, vojàutri i selebrereve la festa 'd Nosgnor për set di. Ël prim di e col che a fà eut a-i sarà arpòs assolù. 23:40 Ël prim di voi i pijereve 'd bela fruta da le piante con l'onor ëd soe rame: branch 'd palmera, d'erbo brondù, sales dij torent, e i fareve festa për set di an presensa dël Signor vòst Dé. 23:41 Vojàutri i selebrereve na festa për Nosgnor na sman-a a l'ann. Sòn a l'é ordonansa përpétua për voi e coj che a vniran dòp ëd vojàutri. A l'é ant ël sétim mèis ch'i fareve costa festa.

23:42 Vojàutri i abitereve na sman-a sota le bënne. Tùit ij nativ d'Israel a staran ant le caban-e, 23:43 përchè a sàpio le generassion pòstere, che mi i l'hai fàit abité ant le bënne ij fieuj d' Israel, cora che i l'avìa faje seurte fòra da l'Egit: Mi i son ël Signor, vòst Dé.

23:44 Përparèj Mosè a l'ha dëscrivù le solenità dël Signor.

1 o hin: valadì, un lìter e mes

2 o efa: visadì, ses chilo 'd farin-a