Giona 1

1

Giòna as arvira a soa mission

1:1 Costa paròla 'd Nosgnor a l'é stàira adressà a Giòna, fieul d'Amitai: 1:2 "Àuss-te e và a Ninive, la granda sità, e ambelelì proclama mè giudissi ‘d condana contra cola gent, përch'i peudo pì nen soporté soa cativeria¹".

1:3 Nopà, Giòna a l'é butasse an camin për scapé a Tarsis, leugn da Nosgnor. A l'é calà a Giafa, andova ch'a l'ha trovà na nav ch’a l’era për cole tère, a l’ha pagane ‘l passage e a l’é ambarcasse con ij marinar për scapé da la presensa ‘d Nosgnor².

1:4 Ma Nosgnor a l'ha dëscadnà an sël mar un fòrt vent³ e a l'é vnùita an mar na gròssa tempesta, a la mira che la nav a stasìa për dëssamblesse. 1:5 Ij marinar ësburdì a l'hanno invocà tùit Ij sò dé e a l'han campà a mar lòn ch'a l'avìo an sla nav për ëslegerila.

Antant Giòna, calà ant ël pòst pì stërmà dla nav, a l'é cugiasse e a l’é butasse a deurme da la gròssa. 1:6 Antlora a l'é avzinassje 'l cap dl'echipagi e a l'ha dije: "Còs fas-to andormì parèj? Àuss-te, prega tò Dé! Peul desse che Dé a pensrà a nojàutri e i meuriroma nen".

1:7 Peui a son disse an tra'd lor: "Vnì, campoma le sòrt⁴ për savèj për colpa 'd chi a l'é ancapitane sto maleur". A l'han tirà la sòrt e la sòrt a l'é tombà ansima a Giòna. 1:8 A l'han ciamaje: "Antlora ‘l colpèivol a l’é ti! Còsa ha-lo portate ambelessì? D'andova vènes-to? Ëd che gent fas-to part?”. 1:9 Chiel a l'ha rëspondù: "I son n'ebreo⁵ e a l'é Nosgnor ch'i adoro⁶, ël Dé dël cél⁷, col ch'a l'ha fàit ël mar e la tèra".

1:10 Parèj, quand ch’a l’ha spiegaje che chiel a scapava da la presensa dël Signor, tuti a son ëstàit ciapà da na gran tëmma e a l'han ciamaje: "Coma l’has-to podula fé na ròba parèj?".

1:11 A l'han dije: "Còs ch'i l'oma da fé përchè ch'as calma 'l mar, ch'a l'é contra 'd nojàutri?”. An efet ël mar a l'era sèmper pì furios. 1:12 Chiel a l'ha dije: "Pijeme e campeme a mar, e 'l mar ch'adess a l'é contra 'd vojàutri as pasierà, përchè mi i lo sai che sta tempesta gròssa a l'ha ciapave për colpa mia".

1:13 Coj òm, a fòrsa 'd remé a sercavo 'd vagné la riva, ma a-j la fasìo nen përchè 'l mar a chërsìa sèmper 'd pì contra 'lor. 1:14 Antlora a l'an amplorà Nosgnor e a l'han dije: "Ò Signor, fane nen meuire për motiv dij pecà dë st’òm-sì e dane nen la colpa ‘d soa mòrt. Ò Signor, ti ‘t l’has mandà costa tempesta an sù chiel për toe bon-e rason!”⁸

1:15 Antlora a l'han ciapà Giòna e a l'han campalo a mar e 'l mar a l'ha pasià soa burìa. 1:16 Për lòn ch’a l’é capitaje, coj òm a l'ha avù na gran tëmma 'd Dé, a l'han ësmonù 'd sacrifissi a Nosgnor e a l'han faje ‘d vot⁹.

1:17 Ma Nosgnor a l'ha vorsù ch' un pess gròss a travondèissa Giòna; Giòna a l'é restà ant la pansa dël pess tre dì e tre neuit¹⁰.

Nòte

1 O “përversità”, “malìssia”.

2 N’amprèisa ch’a l’é nen possibil: “ S'i dovèissa volé via an su j'ale dl'alba e pijé residensa dl'àutra part dël mar, fin-a là ti 't ëm farìe companìa e toa man drita am ciaprìa” (Salm 139:9-10).

3 Giòna a rend testimoniansa che Dé a l’é ‘l Creator e’l Signor dël mar (Genesi 1:10,231; Esod 14:21; March 4:41).

4 Coma ‘n métod ëd divinassion e për conòsse ‘l volèj ‘d Dé, tiré a sòrt a l’era nen antërdì ant l’antich Israel, përché Dé a l’é sovran fin-a an “sl’asar” dël tiré a sòrt (Nùmer 26:55; Giosué 18:6-10; Neemìa 16:33; At 1:24-26).

5 Giòna as identifixa an dij tèrmin etnich (Genesi 40:15; Esod 1:19; 3:18; 10:3).

6 O “A l’é dël Nosgnor ch’i-j l’hai timor”. Sò Dé, ël Signor, contut, a l’é nen na divinità dla soa përson-a, famija o nassion, ma ‘l Dé unich ëd l’univers, Creator dël cel, dël mar, dla tèra.

7 Cfr. Genesi 24:3-7; 2 Crònache 36:23; Esdra 1,2; Neemìa 1:4,5,24.

8 O “përchè Ti, Nosgnor, it fase conform a tò volèj”.

9 O “ëd promësse”.

10 Gesù as arfà al lìber ëd Giòna për nunsié la vrità a rësguard ëd sò mëssage e mission. (Maté 12:38-41; 16:4; Luca 11:29:32). Gesù a parla dël “segn dël profeta Giòna” nen mach për arfesse al temp che Giòna a l’era stàit ant la pansa del pess v(Maté 12:_39-40) ma ‘dcò a l’efet dla predicassion ëd Giòna. Sensa ‘l benefissi d’un segn miracolos, ij ninivita a l’avìo arconossù che ‘l message ‘d Giòna a l’avìa n’autorità divin-a e a-j rëspondo con la penitensa-

À à È è É é Ì ì Ò ò Ó ó Ù ù Ë ë