Esechiel

32

Complenta pr’ ël Faraon, ël cocodril

¹Ël prim dì dël mèis ch’a fà dódes ëd l’ann dódes, Nosgnor a l’ha comunicame soa paròla. Am disìa: ²Fieul d'òm, anton-a na plenta për Faraon, rè d'Egit, e dije:

“Ti 't j'ere parèj d'un lionòt an tra le gent, ma tanme un mostro ant ij mar; con toe naris ti 't bolversave ij fium, con toe piòte it fasìe vnì tùrbole j'eve e t'ampautave tò cors d'eva. ³Ma ora sossì at fà savèj ël Signor Dé: ‘I dëstenderai mia rèj contra 'd ti con na ciambrea 'd vàire pòpoj; e an mè griseul at tireran a riva. ⁴It camperai an sla tèra, it lasrai an mes al camp. I farai calé tuti j'osej dël cel a fé pasturagi ëd ti e i permëtrai che le bes-ce ferose at divoro. ⁵I spatarerai toa carn an sle montagne, e ampinirai le combe dij tòch ëd toa caròpa marsa. ⁶Con lòn ch'a cola da ti, mi i-j darai da bèive a la tèra con tò sangh, fin-a le montagne e ij ravin a saran pien ëd tò sangh. ⁷Ant ël moment che it tomberas dësmortà, mi i quaterai ël cel; i farai scure le stèile. I cheuvrerai ël sol ëd nìvole e la lun-a a bërlusrà pa. ⁸I-i butrai ël deul për ti a tute le luminàrie dël cel e 'l top a sarà dëstendù dzora 'd toa tèra. I lo diso mi, ël Signor Dé’.

⁹Vàire gent a l'avran ël cheur sagrinà da mi, quand ch’i farai rivé la neuva 'd toa dëstrussion an tra ij pòpoj, an tra contrà che ti 't conòsse pa. ¹⁰Vàire nassion a resteran sesìe dëdnans a toa sòrt e ij sò rè a trambleran d'oror për tò motiv, ant ël moment che i ambrancherai mia spa dëdnans a lor, minca un moment, tuti lor a tërmoleran për soa vita, ant ël di ëd toa ruin-a.

¹¹Ël Signor Dé at fà savèj sossì: lë spà dël rè 'd Babilònia a t'arciaprà. ¹²I camperai giù toe òrde con la spa dij guerié pì coragios e le gent pì ferose a vasteran l'orgheuj d'Egit e tuti coj ch’a-i àbito a saran ësterminà. ¹³I farai meuire tut sò cabial an sle rivere dj'eve gròsse: pè d'òm a conturberà pa pì j'eve, nì ongia 'd bes-cia a-j farà vnì tùrbole. ¹⁴Antlora i farai torné pasie soe eve e parèj dl'euli a scoreran soe bialere. I lo diso mi, ël Signor Dé. ¹⁵Ant ël moment che i l'avrai fàit na desolassion ëd la tèra d'Egit e slontanà da tut lòn ch’a peul conten-e 'd fàit, quand che i l'avrai frapà tùit ij sò abitant, antlora as savrà ch’a l’é mi ël Signor.

¹⁶Costa-sì a l’é la plenta ch'a sarà cantà: a la canteran le fije dle gent, a la canteran an sl'Egit e për tuta soa forfa. I lo diso mi, ël Signor Dé”.

La Tampa: destin dij pòpoj potent

¹⁷Al quìndes dël mèis dl'ann ch'a fà vint, ël Signor a l’ha comunicame soa paròla. A l’ha dime: ¹⁸“Fieul d'òm, adess fà plenta 'd deul për la sòrt ëd la gent d'Egit; faje calé ansema a le fije 'd pòpoj potent ant la banda pì bassa dla tèra, con coj ch’a calo ant la Tampa. ¹⁹Dije: ‘Ëd chi ses-to pì bel? Ven giù e stà dëstèis ansem ai nen-sirconcis! ²⁰Lor a tomberan an tra ij mòrt dë spà; la spa a l'é già consignà: frapa a mòrt l'Egit e tuta soa gent. ²¹Da ‘n mes dël pais dij mòrt, ij mè guerié ansema ai sò aleà a-j parleran. Ij nen-sirconcis, vìtime dla spa, a saran dëstèis con coj ch’a son mòrt dë spa.

²²¹Ambelelà a-i è l'Assìria e tuta soa gent, d'antorn a soa seportura: massà, tuti passà dë spa da part a part. ²³Përchè soe seporture a son butà ant ël fond ancreus ëd la Tampa. E soa ciambrea a l'é tuta d'antorn ëd la tomba: tuti massà, përtusà dë spà, lor che a spantiavo sparm ant la tèra 'd coj che a son viv. ²⁴Ambelelà a-i é Elam con tuta soa gent, d'antorn a sò sepolcr; tùit a son passà dë da part a part. Robatà, nen-siconcis, ant la region ch'a stà sota la tèra, lor ch’a sëmnavo afror ant la tèra dij vivent. Ora a pòrto soa ónta con coj che a tombo ant la Tampa.

²⁵An tra ij mòrt a l’han fàit për chila un let, ansema a tuta soa gent dantorn a soa tomba. A son tuti nen-sirconcis, massà da la spa, përchè a l'avìo spantià lë sbaruv ant la tèra 'd coj che a vivo, an portand sò dësdor con coj ch’a calo ant la Tampa; a son ëstàit piassà an tra ij mòrt ëd guèra.

²⁶Mesech-Tubal a l'é ambelelà, con tuta soa gent d'antorn a soa tomba: tuti nen-sirconcis, mòrt dë spà, përchè anfundìo lë sburdiment ant la tèra 'd coj ch’a son viv. ²⁷Lor a saran pa butà aranda dj'eròj tombà d'antan, calà ant ël pais dij mòrt con soe arme da guèra, con soe spa butà sota soa testa e jë scù^[1] dzora 'd sò òss, quand che lë sbuj dë sti guerié a l’era ant la tèra dij viv. ²⁸Ma ti 't saras ës-ciapà an tra coj ch’a son pa sirconcis e ti ‘t saras cogià ansem a coj ch’a son ëstàit massà da la spa.

²⁹Edom a l'é là con ij sò rè e tùit ij sò prinsi. Malgré sò valor a son ëstàit cogià ansema a coj che la spa a l’ha massà; a son cogià ansema ai nen-sirconcis e coj che a robato ant la Tampa. ³⁰Ambelelà a son tùit ij prinsi dël setentrion, tùit ij Sidonian, che a dispèt dël teror spantià da soa potensa ‘d lor a son calà con ësboj vërgognos ansem ai mòrt. A son cogià nen-sirconcis ansem ai trapassà da spa e a pòrto soa vergògna con coj ch’a calo ant la Tampa.

³¹Faraon a-j vedrà e a sarà consolà da la sòrt ëd tuta soa gent; chiel e tuta soa armeja e saran ëstàit vìtima dla spa. I lo diso mi, ël Signor Dé. 32:32 Dabon, i l’hai spaventalo ant la tèra dij viv, pura a sarà cogià an mes ai nen-sirconcis e coj ch’a l'ero stàit massà dë spà: Faraon e tute soe burià 'd gusaja. I lo diso mi, ël Signor Dé.

Nòte

1. Ebràich: "e soe përversità a l'ero dzora 'd sò òss. Pa ciàir lòn che a vorerìa dì costa afermassion. A la lus dël paralelism (vëdde "spa") a l'é mej emané עֲוֹנֹתָם ('avonotam; "soe përversità") për צִנּוֹתָם o צִנָּתָם (tsinnotam o tsinnatam; "ij sò scu" o " ël sò scu").