2 Cronache 1

1

1:1 E Salomon fieul ëd David, a l'é afermasse ant ël regn. Nosgnor sò Dé a l'era con chiel e a l'ha falo pì grand. 1:2 E a l'ha parlaje, Salomon, a tuta Israel, ai cap dij milen-e e 'd senten-e, e a ij giùdes, e a tùit ij prinsi 'd tuta Israel, cap dij pare.

1:3 E a son andàit Salomon con tuta soa gent a l'auteur che a l'é an Ghibeon. Là a-i j'era la tenda dla radunansa 'd Nosgnor, fàita ant ël desert për Mosé, servitor ëd Nosgnor.

1:4 Ma David a l'avìa fàit monté l'Arca 'd Dé da Chiriataim al leu che David a l'avìa prontaje, përchè chiel a l'avìa montà na tenda a Gerusalem. 1:5 E l'autar ëd bronz che a l'avìa fàit Besalel, fieul d'Uri, fieul ëd Cur, a l'era stàit butà a Ghibeon dëdnans a la tenda dël Signor; e Salomon e la congregassion a l'han arsercà Nosgnor. 1:6 E a l'é stàit ambele-là che Salomon, an sl' autar ëd bronz, dëdnans Nosgnor, a l'intrada dla tenda dla radunansa a l'ha smonù mila olocàust.

1:7 Cola midema neuit, Nosgnor Dé a l'é comparije a Salomon e a l'ha dije: "Ciama lòn che 't vorerìe a mi it lo darai". 1:8 E a l'ha dije Salomon a Nosgnor: "Ti it l'avìe fàit a David, mè pare, ëd gròss bin, e it l'has fame regné a sò pòst. 1:9 Ora, Nosgnor Dé, che toa paròla a David, mè pare, as compissa; përchè ti 't l'has stabilime re ansima a na gent ëd bon nùmer parèj dla pover dla tèra. 1:10 Ora, dame la saviëssa e la conossensa, e mi i podrài seurte e intré dëdnans sta gent; përchè chi é-lo ch'a giudicrà tò pòpol che a l'é tant ëd bon nùmer! 1:11 E Nosgnor Dé a l'ha dije a Salomon: "Da già che ambelelà a l'é tò cheur, për ël motiv che ti 't ciame ni 'd beni, ni 'd glòria,e gnanca la mòrt dij tò nemis o na vita longa, ma che 't ciame për ti 'd saviëssa e 'd sust për giudiché mia gent andova che mi i l'hai fate regné ansima. 1:12 Saviëssa e conossensa a son acordà a ti; mi 't darai 'd richësse, e 'd beni, e 'd glòria, coma che a l'han mai avune ij re che a son ëstaie anans ëd ti, e coma che dòp ëd ti gnun a l'avrà.

1:13 E Salomon a l'é tornasne a Gerusalem da l'àut leu 'd Ghibeon, dëdnans dla Tenda dla Radunansa e a l'ha regnà dzora d' Israel. 1:14 E Salomon a l'ha butà ansema 'd cher e'd sivalié; a l'avìa milaquatzent cher e dodesmila sivalié che a l'ha butà con ij cher ant le sità e tacà a chiel a Gerusalem. 1:14 E chiel a l'ha giuntà 'd chèr e 'd gent a caval; a tenìa mila e quatzent chèr e dodes mila sivalié; e a l'ha butaje ant le sità andova a tenìa ij sò chèr e a-i në j'era 'dcò dacant al Re a Gerusalem. 1:15 E 'l re a l'ha fàit ëd pere d'òr e d'argent për Gerusalem e 'dcò gran quantità 'd séder tant com a l'ero ij fié ant la pian-a. 1:16 Ora, për lòn che rësguarda ij cavaj, a-j vnisìo catà da l'Egit; ij marossé dël re a-j catavo a strop, con un pressi convnù. 1:17 E a fasìo seurte da l'Egit minca 'n chèr për sessent sicl d'argent, e tùit ij cavaj për sentesinquanta; e parej che da le man ëd costi sensaj as në tiravo fòra për tùit ij re Hitita e për coj dla Siria.